Hizqeeel 5

yarooshalam kay khilaaf talvaar

¹ai aadamzaad, tez talvaar lay kar apnay sar kay baal aur daadhee mundva. phir taraazoo men baalon ko tol kar teen hisson men taqseem kar. ²kachchee eent par kanda yarooshalam kay naqshay kay zareeay zaahir kar ki shaher ka muhaasara khatm ho gaya hai. phir baalon kee ek tihaaee shaher kay naqshay kay beech men jala day, ek tihaaee talvaar say maar maar kar shaher kay ird-gird zameen par girnay day, aur ek tihaaee hava men uda kar muntashir kar. kyoonki main isee tarah apnee talvaar ko miyaan say khainch kar logon kay peechhay pad jaaoonga. ³lekin baalon men say thoday thoday bacha lay aur apnee jholee men lapet kar mahfooz rakh. ⁴phir in men say kuchh lay aur aag men phaink kar bhasm kar. yahee aag israaeel kay pooray gharaanay men phail jaaegee.”

⁵rabb qaadir-ay-mutlaq farmaata hai, “yahee yarooshalam kee haalat hai! go main nay usay deegar aqvaam kay darmiyaan rakh kar deegar mamaalik ka markaz bana diyaa ⁶to bhee vah meray ahkaam aur hidaayaat say sarkash ho gaya hai. gird-o-navaah kee aqvaam-o-mamaalik kee nisbat us kee harkaten kaheen ziyaada buree hain. kyoonki us kay baashindon nay meray ahkaam ko radd karkay meree hidaayaat kay mutaabiq zindagee guzaarnay say inkaar kar diya hai.” ⁷rabb qaadir-ay-mutlaq farmaata hai, “tumhaaree harkaten ird-gird kee qaumon kee nisbat kaheen ziyaada buree hain. na tum nay meree hidaayaat kay mutaabiq zindagee guzaaree, na meray ahkaam par amal kiya. balki tum itnay sharaartee thay ki gird-o-navaah kee aqvaam kay rasm-o-rivaaj say bhee badtar zindagee guzaarnay lagay.” ⁸is liyay rabb qaadir-ay-mutlaq farmaata hai, “ai yarooshalam, ab main khud tujh say nipat loonga. deegar aqvaam kay dekhtay dekhtay main teree adaalat karoonga. ⁹teree ghinaunee butparastee kay sabab say main teray saath aisa sulook karoonga jaisa main nay pahelay kabhee naheen kiya hai aur aainda bhee kabhee naheen karoonga. ¹⁰tab teray darmiyaan baap apnay beton ko aur betay apnay baap ko khaaengay. main teree adaalat yoon karoonga ki jitnay bachengay vah sab hava men ud kar chaaron taraf muntashir ho jaaengay.”

¹¹rabb qaadir-ay-mutlaq farmaata hai, “meree hayaat kee qasam, too nay apnay ghinaunay buton aur rasm-o-rivaaj say meray maqdis kee behuramtee kee hai, is liyay main tujhay mundva kar tabaah kar doonga. na main tujh par taras khaaoonga, na rahem karoonga. ¹²teray baashindon kee ek tihaaee muhalak beemaariyon aur kaal say shaher men halaak ho jaaegee. doosree tihaaee talvaar kee zad men a kar shaher kay ird-gird mar jaaegee. teesree tihaaee ko main hava men uda kar muntashir kar doonga aur phir talvaar ko miyaan say khainch kar un ka peechha karoonga. ¹³yoon mera qaher thanda ho jaaega aur main intiqaam lay kar apna ghussa utaaroonga. tab vah jaan lengay ki main, rabb ghairat men un say hamkalaam hua hoon.

¹⁴main tujhay malbay ka dher aur ird-gird kee aqvaam kee laan-taan ka nishaana bana doonga. har guzarnay vaala teree haalat dekh kar ‘tauba tauba’ kahega. ¹⁵jab mera ghazab tujh par toot padega aur main teree sakht adaalat aur sarzanish karoonga to us vaqt too pados kee aqvaam kay liyay mazaaq aur laanat-malaamat ka nishaana ban jaaega. teree haalat ko dekh kar un kay rongtay khaday ho jaaengay aur vah muhtaat rahenay ka sabaq seekhengay. yah mera, rabb ka farmaan hai.

¹⁶ai yarooshalam kay baashindo, main kaal kay muhalak aur tabaahakun teer tum par barasaaoonga taaki tum halaak ho jaao. kaal yahaan tak zor pakdega ki khaanay ka band-o-bast khatm ho jaaega. ¹⁷main tumhaaray khilaaf kaal aur vaheshee jaanvar bhejoonga taaki too beaulaad ho jaaay. muhalak beemaariyaan aur qatl-o-ghaarat teray beech men say guzregee, aur main teray khilaaf talvaar chalaaoonga. yah mera, rabb ka farmaan hai.”