Hizqeeel 48

qabeelon men mulk kee taqseem

^1-7 israaeel kee shimaalee sarhadd baheera-ay-room say shuroo ho kar mashriq kee taraf hatloon, labo-hamaat aur hasar-enaan kay paas say guzartee hai. damishq aur hamaat sarhadd kay shimaal men hain. har qabeelay ko mulk ka ek hissa milega. har khittay ka ek sira mulk kee mashriqee sarhadd aur doosra sira maghribee sarhadd hoga. shimaal say lay kar junoob tak qabaailee ilaaqon kee yah tarteeb hogee : daan, aashar, naftaalee, manassee, ifraaeem, roobin aur yahoodaah.

mulk kay beech men makhsoos ilaaqaa

⁸yahoodaah kay junoob men vah ilaaqa hoga jo tumhen meray liyay alag karna hai. qabaailee ilaaqon kee tarah us ka bhee ek sira mulk kee mashriqee sarhadd aur doosra sira maghribee sarhadd hoga. shimaal say junoob tak ka faasila saadhay 12 kilomeetar hai. us kay beech men maqdis hai.

⁹is ilaaqay kay darmiyaan ek khaas khitta hoga. mashriq say maghrib tak us ka faasila saadhay 12 kilomeetar hoga jabki shimaal say junoob tak faasila 10 kilomeetar hoga. rabb kay liyay makhsoos is khitte ¹⁰ka ek hissa imaamon kay liyay makhsoos hoga. is hissay ka faasila mashriq say maghrib tak saadhay 12 kilomeetar aur shimaal say junoob tak 5 kilomeetar hoga. is kay beech men hee rabb ka maqdis hoga. ¹¹yah muqaddas ilaaqa laavee kay khaandaan sadoq kay makhsoos-o-muqaddas kiay gaay imaamon ko diya jaaega. kyoonki jab israaeelee mujh say bargashta huay to baaqee laavee un kay saath bhatak gaay, lekin sadoq ka khaandaan vafaadaaree say meree khidmat karta raha. ¹²is liyay unhen meray liyay makhsoos ilaaqay ka muqaddastareen hissa milega. yah laaviyon kay khittay kay shimaal men hoga. ¹³imaamon kay junoob men baaqee laaviyon ka khitta hoga. mashriq say maghrib tak us ka faasila saadhay 12 kilomeetar aur shimaal say junoob tak 5 kilomeetar hoga.

¹⁴rabb kay liyay makhsoos yah ilaaqa pooray mulk ka behtareen hissa hai. us ka koee bhee plaat kisee doosray kay haath men denay kee ijaazat naheen. usay na becha jaaay, na kisee doosray ko kisee plaat kay ivz men diya jaaay. kyoonki yah ilaaqa rabb kay liyay makhsoos-o-muqaddas hai.

¹⁵rabb kay maqdis kay is khaas ilaaqay kay junoob men ek aur khitta hoga jis kee lambaaee saadhay 12 kilomeetar aur chaudaaee adhaaee kilomeetar hai. vah muqaddas naheen hai balki aam logon kee rihaaish kay liyay hoga. is kay beech men shaher hoga, jis kay ird-gird charaagaahen hongee. ¹⁶yah shaher murabba shakl ka hoga. lambaaee aur chaudaaee donon sava do do kilomeetar hogee.

¹⁷shaher kay chaaron taraf jaanvaron ko charaanay kee khulee jagah hogee jis kee chaudaaee 133 meetar hogee. ¹⁸choonki shaher apnay khittay kay beech men hoga is liyay mazkoora khulee jagah kay mashriq men ek khitta baaqee rah jaaega jis ka mashriq say shaher tak faasila 5 kilomeetar aur shimaal say junoob tak faasila adhaaee kilomeetar hoga. shaher kay maghrib men bhee itna hee bada khitta hoga. in do khitton men kheteebaadee kee jaaegee jis kee paidaavaar shaher men kaam karnay vaalon kee khuraak hogee. ¹⁹shaher men kaam karnay vaalay tamaam qabeelon kay hongay. vahee in kheton kee kheteebaadee karengay.

²⁰chunaanchay meray liyay alag kiya gaya yah poora ilaaqa murabba shakl ka hai. us kee lambaaee aur chaudaaee saadhay baarah baarah kilomeetar hai. is men shaher bhee shaamil hai.

^21-22 mazkoora muqaddas khittay men maqdis, imaamon aur baaqee laaviyon kee zameenen hain. us kay mashriq aur maghrib men baaqeemaanda zameen hukmaraan kee milkiyat hai. muqaddas khittay kay mashriq men hukmaraan kee zameen mulk kee mashriqee sarhadd tak hogee aur muqaddas khittay kay maghrib men vah samundar tak hogee. shimaal say junoob tak vah muqaddas khittay jitnee chaudee yaanee saadhay 12 kilomeetar hogee. shimaal men yahoodaah ka qabaailee ilaaqa hoga aur junoob men binyameen ka.

deegar qabeelon kee zameen

^23-27 mulk kay is khaas darmiyaanee hissay kay junoob men baaqee qabeelon ko ek ek ilaaqa milega. har ilaaqay ka ek sira mulk kee mashriqee sarhadd aur doosra sira baheera-ay-room hoga. shimaal say lay kar junoob tak qabaailee ilaaqon kee yah tarteeb hogee : binyameen, shamaaoon, ishkaar, zabooloon aur jad.

²⁸jad kay qabeelay kee junoobee sarhadd mulk kee sarhadd bhee hai. vah tamar say junoob-maghrib men mareeba-qaadis kay chashmon tak chaltee hai, phir misr kee sarhadd yaanee vaadee-ay-misr kay saath saath shimaal-maghrib ka rukh karkay baheera-ay-room tak pahunchtee hai.

²⁹rabb qaadir-ay-mutlaq farmaata hai ki yahee tumhaara mulk hoga! usay israaeelee qabeelon men taqseem karo. jo kuchh bhee unhen qur’a daal kar milay vah un kee mauroosee zameen hogee.

yarooshalam kay darvaaze

^30-34 yarooshalam shaher kay 12 darvaazay hongay. faseel kee chaaron deevaaren sava do do kilomeetar lambee hongee. har deevaar kay teen darvaazay hongay, gharaz kul baarah darvaazay hongay. har ek ka naam kisee qabeelay ka naam hoga. chunaanchay shimaal men roobin ka darvaaza, yahoodaah ka darvaaza aur laavee ka darvaaza hoga, mashriq men yoosuf ka darvaaza, binyameen ka darvaaza aur daan ka darvaaza hoga, junoob men shamaaoon ka darvaaza, ishkaar ka darvaaza aur zabooloon ka darvaaza hoga, aur maghrib men jad ka darvaaza, aashar ka darvaaza aur naftaalee ka darvaaza hoga. ³⁵faseel kee pooree lambaaee 9 kilomeetar hai.

tab shaher ‘yahaan rabb hai’ kahelaaega.!”