Hizqeeel 47

rabb kay ghar men say nikalnay vaala daryaa

¹is kay baad mera raahanuma mujhay ek baar phir rabb kay ghar kay darvaazay kay paas lay gaya. yah darvaaza mashriq men tha, kyoonki rabb kay ghar ka rukh hee mashriq kee taraf tha. main nay dekha ki daheleez kay neechay say paanee nikal raha hai. darvaazay say nikal kar vah pahelay rabb kay ghar kee junoobee deevaar kay saath saath baheta tha, phir qurbaangaah kay junoob men say guzar kar mashriq kee taraf bah nikla. ²mera raahanuma meray saath bairoonee sahen kay shimaalee darvaazay men say nikla. baahar chaardeevaaree kay saath saath chaltay chaltay ham bairoonee sahen kay mashriqee darvaazay kay paas pahunch gaay. main nay dekha ki paanee is darvaazay kay junoobee hissay men say nikal raha hai.

³ham paanee kay kinaaray kinaaray chal paday. meray raahanuma nay apnay feetay kay saath aadha kilomeetar ka faasila naapa. phir us nay mujhay paanee men say guzarnay ko kaha. yahaan paanee takhnon tak pahunchta tha. ⁴us nay mazeed aadhay kilomeetar ka faasila naapa, phir mujhay dubaara paanee men say guzarnay ko kaha. ab paanee ghutnon tak pahuncha. jab us nay teesree martaba aadha kilomeetar ka faasila naap kar mujhay us men say guzarnay diya to paanee kamar tak pahuncha. ⁵ek aakhiree dafa us nay aadhay kilomeetar ka faasila naapa. ab main paanee men say guzar na saka. paanee itna gahera tha ki us men say guzarnay kay liyay tairnay kee zaroorat thee.

⁶us nay mujh say poochha, “ai aadamzaad, kya too nay ghaur kiya hai?” phir vah mujhay darya kay kinaaray tak vaapas laaya.

⁷jab vaapas aaya to main nay dekha ki darya kay donon kinaaron par mut’addid darakht lagay hain. ⁸vah bola, “yah paanee mashriq kee taraf bah kar vaadee-ay-yardan men pahunchta hai. usay paar karkay vah baheera-ay-murdaar men a jaata hai. us kay asar say baheera-ay-murdaar ka namkeen paanee peenay kay qaabil ho jaaega. ⁹jahaan bhee darya bahega vahaan kay beshumaar jaandaar jeetay rahengay. bahut machhliyaan hongee, aur darya baheera-ay-murdaar ka namkeen paanee peenay kay qaabil banaaega. jahaan say bhee guzrega vahaan sab kuchh phalta phoolta rahega. ¹⁰ain-jadee say lay kar ain-ajlaim tak us kay kinaaron par machheray khaday hongay. har taraf un kay jaal sookhnay kay liyay phailaaay huay nazar aaengay. darya men har qism kee machhliyaan hongee, utnee jitnee baheera-ay-room men paaee jaatee hain. ¹¹sirf baheera-ay-murdaar kay ird-gird kee daldlee jagahon aur johadon ka paanee namkeen rahega, kyoonki vah namak haasil karnay kay liyay istemaal hoga. ¹²darya kay donon kinaaron par har qism kay phaldaar darakht ugengay. in darakhton kay pattay na kabhee murajhaaengay, na kabhee un ka phal khatm hoga. vah har maheenay phal laaengay, is liyay ki maqdis ka paanee un kee aabpaashee karta rahega. un ka phal logon kee khuraak banega, aur un kay pattay shifa dengay.”

israaeel kee sarhadden

¹³phir rabb qaadir-ay-mutlaq nay farmaaya, “main tujhay us mulk kee sarhadden bataata hoon jo baarah qabeelon men taqseem karna hai. yoosuf ko do hissay denay hain, baaqee qabeelon ko ek ek hissa. ¹⁴main nay apna haath utha kar qasam khaaee thee ki main yah mulk tumhaaray baapdaada ko ata karoonga, is liyay tum yah mulk meeraas men paaogay. ab usay aapas men baraabar taqseem kar lo.

¹⁵shimaalee sarhadd baheera-ay-room say shuroo ho kar mashriq kee taraf hatloon, labo-hamaat aur sidaad kay paas say guzartee hai. ¹⁶vahaan say vah berota aur sibraim kay paas pahunchtee hai (sibraim mulk-ay-damishq aur mulk-ay-hamaat kay darmiyaan vaaqay hai). phir sarhadd hasar-enaan shaher tak aagay nikaltee hai jo hauraan kee sarhadd par vaaqay hai. ¹⁷gharaz shimaalee sarhadd baheera-ay-room say lay kar hasar-enaan tak pahunchtee hai. damishq aur hamaat kee sarhadden us kay shimaal men hain.

¹⁸mulk kee mashriqee sarhadd vahaan shuroo hotee hai jahaan damishq ka ilaaqa hauraan kay pahaadee ilaaqay say milta hai. vahaan say sarhadd darya-ay-yardan kay saath saath chaltee huee junoob men baheera-ay-room kay paas tamar shaher tak pahunchtee hai. yoon darya-ay-yardan mulk-ay-israaeel kee mashriqee sarhadd aur mulk-ay-jiliaad kee maghribee sarhadd hai.

¹⁹junoobee sarhadd tamar say shuroo ho kar junoob-maghrib kee taraf chaltee chaltee mareeba-qaadis kay chashmon tak pahunchtee hai. phir vah shimaal-maghrib kee taraf rukh karkay misr kee sarhadd yaanee vaadee-ay-misr kay saath saath baheera-ay-room tak pahunchtee hai.

²⁰maghribee sarhadd baheera-ay-room hai jo shimaal men labo-hamaat kay muqaabil khatm hotee hai.

²¹mulk ko apnay qabeelon men taqseem karo! ²²yah tumhaaree mauroosee zameen hogee. jab tum qur’a daal kar usay aapas men taqseem karo to un ghairmulkiyon ko bhee zameen milnee hai jo tumhaaray darmiyaan rahetay aur jin kay bachchay yahaan paida huay hain. tumhaara un kay saath vaisa sulook ho jaisa israaeeliyon kay saath. qur’a daaltay vaqt unhen israaeelee qabeelon kay saath zameen milnee hai. ²³rabb qaadir-ay-mutlaq farmaata hai ki jis qabeelay men bhee pardesee aabaad hon vahaan tumhen unhen mauroosee zameen denee hai.