Hizqeeel 46

eedon par hukmaraan kee jaanib say qurbaaniyaan

¹rabb qaadir-ay-mutlaq farmaata hai ki laazim hai ki androonee sahen men pahunchaanay vaala mashriqee darvaaza itwaar say lay kar jumaay tak band rahay. usay sirf sabat aur naay chaand kay din kholna hai. ²us vaqt hukmaraan bairoonee sahen say ho kar mashriqee darvaazay kay baraamday men daakhil ho jaaay aur us men say guzar kar darvaazay kay baazoo kay paas khada ho jaaay. vahaan say vah imaamon ko us kee bhasm honay vaalee aur salaamatee kee qurbaaniyaan pesh kartay huay dekh sakega. darvaazay kee daheleez par vah sijda karega, phir chala jaaega. yah darvaaza shaam tak khula rahay. ³laazim hai ki baaqee israaeelee sabat aur naay chaand kay din bairoonee sahen men ibaadat karen. vah isee mashriqee darvaazay kay paas a kar meray huzoor aundhay munh ho jaaen.

⁴sabat kay din hukmaraan chhah beaib bhed kay bachchay aur ek beaib mendha chun kar rabb ko bhasm honay vaalee qurbaanee kay taur par pesh karay. ⁵vah har mendhay kay saath ghalla kee nazar bhee pesh karay yaanee 16 kilograam maida aur 4 litar zaitoon ka tel. har bhed kay bachchay kay saath vah utna hee ghalla day jitna jee chaahay. ⁶naay chaand kay din vah ek javaan bail, chhah bhed kay bachchay aur ek mendha pesh karay. sab beaib hon. ⁷javaan bail aur mendhay kay saath ghalla kee nazar bhee pesh kee jaaay. ghalla kee yah nazar 16 kilograam maiday aur 4 litar zaitoon kay tel par mushtamil ho. vah har bhed kay bachchay kay saath utna hee ghalla day jitna jee chaahay.

⁸hukmaraan androonee mashriqee darvaazay men bairoonee sahen say ho kar daakhil ho, aur vah isee raastay say niklay bhee. ⁹jab baaqee israaeelee kisee eed par rabb ko sijda karnay aaen to jo shimaalee darvaazay say bairoonee sahen men daakhil hon vah ibaadat kay baad junoobee darvaazay say niklen, aur jo junoobee darvaazay say daakhil hon vah shimaalee darvaazay say niklen. koee us darvaazay say na niklay jis men say vah daakhil hua balki muqaabil kay darvaazay say. ¹⁰hukmaraan us vaqt sahen men daakhil ho jab baaqee israaeelee daakhil ho rahay hon, aur vah us vaqt ravaana ho jab baaqee israaeelee ravaana ho jaaen.

¹¹eedon aur muqarrara tahevaaron par bail aur mendhay kay saath ghalla kee nazar pesh kee jaaay. ghalla kee yah nazar 16 kilograam maiday aur 4 litar zaitoon kay tel par mushtamil ho. hukmaraan bhed kay bachchon kay saath utna hee ghalla day jitna jee chaahay.

¹²jab hukmaraan apnee khushee say mujhay qurbaanee pesh karna chaahay khwaah bhasm honay vaalee ya salaamatee kee qurbaanee ho, to us kay liyay androonee darvaazay ka mashriqee darvaaza khola jaaay. vahaan vah apnee qurbaanee yoon pesh karay jis tarah sabat kay din karta hai. us kay nikalnay par yah darvaaza band kar diya jaaay.

rozaana kee qurbaanee

¹³israaeel rabb ko har subah ek beaib yaksaala bhed ka bachcha pesh karay. bhasm honay vaalee yah qurbaanee rozaana chadhaaee jaaay. ¹⁴saath saath ghalla kee nazar pesh kee jaaay. is kay liyay sava litar zaitoon ka tel dhaaee kilograam maiday kay saath milaaya jaaay. ghalla kee yah nazar hamesha hee mujhay pesh karnee hai. ¹⁵laazim hai ki har subah bhed ka bachcha, maida aur tel meray liyay jalaaya jaaay.

hukmaraan kee mauroosee zameen

¹⁶qaadir-ay-mutlaq farmaata hai ki agar israaeel ka hukmaraan apnay kisee betay ko kuchh mauroosee zameen day to yah zameen betay kee mauroosee zameen ban kar us kee aulaad kee milkiyat rahegee. ¹⁷lekin agar hukmaraan kuchh mauroosee zameen apnay kisee mulaazim ko day to yah zameen sirf aglay bahaalee kay saal tak mulaazim kay haath men rahegee. phir yah dubaara hukmaraan kay qabzay men vaapas aaegee. kyoonki yah mauroosee zameen mustaqil taur par us kee aur us kay beton kee milkiyat hai. ¹⁸hukmaraan ko jabran doosray israaeeliyon kee mauroosee zameen apnaanay kee ijaazat naheen. laazim hai ki jo bhee zameen vah apnay beton men taqseem karay vah us kee apnee hee mauroosee zameen ho. meree qaum men say kisee ko nikaal kar us kee mauroosee zameen say maheroom karna mana hai’.”

rabb kay ghar ka kichan

¹⁹is kay baad mera raahanuma mujhay un kamron kay darvaazay kay paas lay gaya jin ka rukh shimaal kee taraf tha aur jo androonee sahen kay junoobee darvaazay kay qareeb thay. yah imaamon kay muqaddas kamray hain. us nay mujhay kamron kay maghribee siray men ek jagah dikha kar ²⁰kaha, “yahaan imaam vah gosht ubaalengay jo gunaah aur qusoor kee qurbaaniyon men say un ka hissa banta hai. yahaan vah ghalla kee nazar lay kar rotee bhee banaaengay. qurbaaniyon men say koee bhee cheez bairoonee sahen men naheen laaee ja saktee, aisa na ho ki muqaddas cheezen chhoonay say aam logon kee jaan khatray men pad jaaay.”

²¹phir mera raahanuma dubaara meray saath bairoonee sahen men a gaya. vahaan us nay mujhay us kay chaar konay dikhaaay. har konay men ek sahen thaa ²²jis kee lambaaee 70 fut aur chaudaaee saadhay 52 fut thee. har sahen itna hee bada thaa ²³aur ek deevaar say ghira hua tha. deevaar kay saath saath choolhay thay. ²⁴meray raahanuma nay mujhay bataaya, “yah vah kichan hain jin men rabb kay ghar kay khaadim logon kee peshakarada qurbaaniyaan ubaalengay.”