Hizqeeel 44

rabb kay ghar ka bairoonee mashriqee darvaaza band kiya jaata hai

¹mera raahanuma mujhay dubaara maqdis kay bairoonee mashriqee darvaazay kay paas lay gaya. ab vah band tha. ²rabb nay farmaaya, “ab say yah darvaaza hamesha tak band rahay. isay kabhee naheen kholna hai. kisee ko bhee is men say daakhil honay kee ijaazat naheen, kyoonki rabb jo israaeel ka khuda hai is darvaazay men say ho kar rabb kay ghar men daakhil hua hai. ³sirf israaeel kay hukmaraan ko is darvaazay men baithnay aur meray huzoor qurbaanee ka apna hissa khaanay kee ijaazat hai. lekin is kay liyay vah darvaazay men say guzar naheen sakega balki bairoonee sahen kee taraf say us men daakhil hoga. vah darvaazay kay saath mulhiq baraamday say ho kar vahaan pahunchega aur isee raastay say vahaan say niklega bhee.”

aksar laaviyon kee khidmat ko mahdood kiya jaata hai

⁴phir mera raahanuma mujhay shimaalee darvaazay men say ho kar dubaara androonee sahen men lay gaya. ham rabb kay ghar kay saamnay pahunchay. main nay dekha ki rabb ka ghar rabb kay jalaal say maamoor ho raha hai. main munh kay bal gir gaya.

⁵rabb nay farmaaya, “ai aadamzaad, dhyaan say dekh, ghaur say sun! rabb kay ghar kay baaray men un tamaam hidaayaat par tavajjuh day jo main tujhay bataanay vaala hoon. dhyaan day ki kaun kaun us men ja sakega. ⁶is sarkash qaum israaeel ko bata,

‘ai israaeelee qaum, rabb qaadir-ay-mutlaq farmaata hai ki tumhaaree makrooh harkaten bahut hain, ab bas karo! ⁷tum pardesiyon ko meray maqdis men laaay ho, aisay logon ko jo baatin aur zaahir men naamakhtoon hain. aur yah tum nay us vaqt kiya jab tum mujhay meree khuraak yaanee charbee aur khoon pesh kar rahay thay. yoon tum nay meray ghar kee behuramtee karkay apnee ghinaunee harkaton say vah ahd tod daala hai jo main nay tumhaaray saath baandha tha. ⁸tum khud meray maqdis men khidmat naheen karna chaahatay thay balki tum nay pardesiyon ko yah zimmaadaaree dee thee ki vah tumhaaree jagah yah khidmat anjaam den.

⁹is liyay rabb qaadir-ay-mutlaq farmaata hai ki aainda jo bhee ghairmulkee androonee aur bairoonee taur par naamakhtoon hai usay meray maqdis men daakhil honay kee ijaazat naheen. is men vah ajnabee bhee shaamil hain jo israaeeliyon kay darmiyaan rahetay hain. ¹⁰jab israaeelee bhatak gaay aur mujh say door ho kar buton kay peechhay lag gaay to aksar laavee bhee mujh say door huay. ab unhen apnay gunaah kee saza bhugatnee padegee. ¹¹aainda vah meray maqdis men har qism kee khidmat naheen karengay. unhen sirf darvaazon kee paheraadaaree karnay aur jaanvaron ko zabah karnay kee ijaazat hogee. in jaanvaron men bhasm honay vaalee qurbaaniyaan bhee shaamil hongee aur zabah kee qurbaaniyaan bhee. laavee qaum kee khidmat kay liyay rabb kay ghar men haazir rahengay, ¹²lekin choonki vah apnay hamvatanon kay buton kay saamnay logon kee khidmat karkay un kay liyay gunaah ka baais banay rahay is liyay main nay apna haath utha kar qasam khaaee hai ki unhen is kee saza bhugatnee padegee. yah rabb qaadir-ay-mutlaq ka farmaan hai.

¹³ab say vah imaam kee haisiyat say meray qareeb a kar meree khidmat naheen karengay, ab say vah un cheezon kay qareeb naheen aaengay jin ko main nay muqaddastareen qaraar diya hai. ¹⁴is kay bajaay main unhen rabb kay ghar kay nichlay darjay kee zimmaadaariyaan doonga.

imaamon kay liyay hidaayaat

¹⁵lekin rabb qaadir-ay-mutlaq farmaata hai ki laavee ka ek khaandaan un men shaamil naheen hai. sadoq ka khaandaan aainda bhee meree khidmat karega. us kay imaam us vaqt bhee vafaadaaree say meray maqdis men meree khidmat kartay rahay jab israaeel kay baaqee log mujh say door ho gaay thay. is liyay yah aainda bhee meray huzoor a kar mujhay qurbaaniyon kee charbee aur khoon pesh karengay. ¹⁶sirf yahee imaam meray maqdis men daakhil hongay aur meree mez par meree khidmat karkay meray tamaam faraaiz ada karengay.

¹⁷jab bhee imaam androonee darvaazay men daakhil hotay hain to laazim hai ki vah kataan kay kapday pahen len. androonee sahen aur rabb kay ghar men khidmat kartay vaqt oon kay kapday pahenna mana hai. ¹⁸vah kataan kee pagdee aur paajaama pahenen, kyoonki unhen paseena dilaanay vaalay kapdon say gurez karna hai. ¹⁹jab bhee imaam androonee sahen say dubaara bairoonee sahen men jaana chaahen to laazim hai ki vah khidmat kay liyay mustaamal kapdon ko utaaren. vah in kapdon ko muqaddas kamron men chhod aaen aur aam kapday pahen len, aisa na ho ki muqaddas kapday chhoonay say aam logon kee jaan khatray men pad jaaay.

²⁰na imaam apna sar mundavaaen, na un kay baal lambay hon balki vah unhen katvaatay rahen. ²¹imaam ko androonee sahen men daakhil honay say pahelay mai peena mana hai.

²²imaam ko kisee talaakshuda aurat ya beva say shaadee karnay kee ijaazat naheen hai. vah sirf israaeelee kunvaaree say shaadee karay. sirf us vaqt beva say shaadee karnay kee ijaazat hai jab marhoom shauhar imaam tha.

²³imaam avaam ko muqaddas aur ghairmuqaddas cheezon men farq kee taaleem den. vah unhen naapaak aur paak cheezon men imtiyaaz karna sikhaaen. ²⁴agar tanaazo ho to imaam meray ahkaam kay mutaabiq hee us par faisla karen. un ka farz hai ki vah meree muqarrara eedon ko meree hidaayaat aur qavaaid kay mutaabiq hee manaaen. vah mera sabat ka din makhsoos-o-muqaddas rakhen.

²⁵imaam apnay aap ko kisee laash kay paas jaanay say naapaak na karay. is kee ijaazat sirf isee soorat men hai ki us kay maan-baap, bachchon, bhaaiyon ya ghairshaadeeshuda bahenon men say koee intiqaal kar jaaay. ²⁶agar kabhee aisa ho to vah apnay aap ko paak-saaf karnay kay baad mazeed saat din intizaar karay, ²⁷phir maqdis kay androonee sahen men ja kar apnay liyay gunaah kee qurbaanee pesh karay. tab hee vah dubaara maqdis men khidmat kar sakta hai. yah rabb qaadir-ay-mutlaq ka farmaan hai.

²⁸sirf main hee imaamon ka mauroosee hissa hoon. unhen israaeel men mauroosee milkiyat mat dena, kyoonki main khud un kee mauroosee milkiyat hoon. ²⁹khaanay kay liyay imaamon ko ghalla, gunaah aur qusoor kee qurbaaniyaan milengee, neez israaeel men vah sab kuchh jo rabb kay liyay makhsoos kiya jaata hai. ³⁰imaamon ko fasal kay pahelay phal ka behtareen hissa aur tumhaaray tamaam hadiay milengay. unhen apnay gundhay huay aatay say bhee hissa dena hai. tab allaah kee barkat teray gharaanay par thaheregee.

³¹jo parinda ya deegar jaanvar fitree taur par ya kisee doosray jaanvar kay hamlay say mar jaaay us ka gosht khaana imaam kay liyay mana hai.