Hizqeeel 43

rabb apnay ghar men vaapas a jaata hai

¹mera raahanuma mujhay dubaara rabb kay ghar kay mashriqee darvaazay kay paas lay gaya. ²achaanak israaeel kay khuda ka jalaal mashriq say aata hua dikhaaee diya. zabardast aabshaar ka sa shor sunaaee diya, aur zameen us kay jalaal say chamak rahee thee. ³rabb mujh par yoon zaahir hua jis tarah deegar royaaon men, pahelay darya-ay-kibaar kay kinaaray aur phir us vaqt jab vah yarooshalam ko tabaah karnay aaya tha.

main munh kay bal gir gaya. ⁴rabb ka jalaal mashriqee darvaazay men say rabb kay ghar men daakhil hua. ⁵phir allaah ka rooh mujhay utha kar androonee sahen men lay gaya. vahaan main nay dekha ki poora ghar rabb kay jalaal say maamoor hai.

⁶meray paas khaday aadmee kee maujoodgee men koee rabb kay ghar men say mujh say mukhaatib hua,

⁷“ai aadamzaad, yah meray takht aur meray paaon kay talvon ka maqaam hai. yaheen main hamesha tak israaeeliyon kay darmiyaan sukoonat karoonga. aainda na kabhee israaeelee aur na un kay baadshaah meray muqaddas naam kee behuramtee karengay. na vah apnee zinaakaaraana butparastee say, na baadshaahon kee laashon say meray naam kee behuramtee karengay. ⁸maazee men israaeel kay baadshaahon nay apnay mahelon ko meray ghar kay saath hee taameer kiya. un kee daheleez meree daheleez kay saath aur un kay darvaazay ka baazoo meray darvaazay kay baazoo kay saath lagta tha. ek hee deevaar unhen mujh say alag rakhtee thee. yoon unhon nay apnee makrooh harkaton say meray muqaddas naam kee behuramtee kee, aur javaab men main nay apnay ghazab men unhen halaak kar diya. ⁹lekin ab vah apnee zinaakaaraana butparastee aur apnay baadshaahon kee laashen mujh say door rakhengay. tab main hamesha tak un kay darmiyaan sukoonat karoonga.

¹⁰ai aadamzaad, israaeeliyon ko is ghar kay baaray men suna day taaki unhen apnay gunaahon par sharm aaay. vah dhyaan say naay ghar kay naqshay ka mutaal’a karen. ¹¹agar unhen apnee harkaton par sharm aaay to unhen ghar kee tafseelaat bhee dikha day, yaanee us kee tarteeb, us kay aanay jaanay kay raastay aur us ka poora intizaam tamaam qavaaid aur ahkaam samet. sab kuchh un kay saamnay hee likh day taaki vah us kay pooray intizaam kay paaband rahen aur us kay tamaam qavaaid kee pairvee karen. ¹²rabb kay ghar kay liyay meree hidaayat sun! is pahaad kee chotee gird-o-navaah kay tamaam ilaaqay samet muqaddastareen jagah hai. yah ghar kay liyay meree hidaayat hai.”

bhasm honay vaalee qurbaaniyon kee qurbaangaah

¹³qurbaangaah yoon banaaee gaee thee ki us ka paaya naalee say ghira hua tha jo 21 inch gaheree aur utnee hee chaudee thee. baahar kee taraf naalee kay kinaaray par chhotee see deevaar thee jis kee oonchaaee 9 inch thee. ¹⁴qurbaangaah kay teen hissay thay. sab say nichla hissa saadhay teen fut ooncha tha. is par bana hua hissa 7 fut ooncha tha, lekin us kee chaudaaee kuchh kam thee, is liyay chaaron taraf nichlay hissay ka oopar vaala kinaara nazar aata tha. is kinaaray kee chaudaaee 21 inch thee. teesra aur sab say oopar vaala hissa bhee isee tarah banaaya gaya tha. vah doosray hissay kee nisbat kam chauda tha, is liyay chaaron taraf doosray hissay ka oopar vaala kinaara nazar aata tha. is kinaaray kee chaudaaee bhee 21 inch thee. ¹⁵teesray hissay par qurbaaniyaan jalaaee jaatee theen, aur chaaron konon par seeng lagay thay. yah hissa bhee 7 fut ooncha tha. ¹⁶qurbaangaah kee oopar vaalee satah murabba shakl kee thee. us kee chaudaaee aur lambaaee ikkees ikkees fut thee. ¹⁷doosra hissa bhee murabba shakl ka tha. us kee chaudaaee aur lambaaee saadhay chaubees chaubees fut thee. us ka oopar vaala kinaara nazar aata tha, aur us par 21 inch chaudee naalee thee, yoon ki kinaaray par chhotee see deevaar thee jis kee oonchaaee saadhay 10 inch thee. qurbaangaah par chadhnay kay liyay us kay mashriq men seedhee thee.

qurbaangaah kee makhsoosiyat

¹⁸phir rabb mujh say hamkalaam hua, “ai aadamzaad, rabb qaadir-ay-mutlaq farmaata hai ki is qurbaangaah ko taameer karnay kay baad tujhay is par qurbaaniyaan jala kar isay makhsoos karna hai. saath saath is par qurbaaniyon ka khoon bhee chhidakna hai. is silsilay men meree hidaayaat sun!

¹⁹sirf laavee kay qabeelay kay un imaamon ko rabb kay ghar men meray huzoor khidmat karnay kee ijaazat hai jo sadoq kee aulaad hain.

rabb qaadir-ay-mutlaq farmaata hai ki unhen ek javaan bail day taaki vah usay gunaah kee qurbaanee kay taur par pesh karen. ²⁰is bail ka kuchh khoon lay kar qurbaangaah kay chaaron seengon, nichlay hissay kay chaaron konon aur ird-gird us kay kinaaray par laga day. yoon too qurbaangaah ka kaffaara day kar usay paak-saaf karega. ²¹is kay baad javaan bail ko maqdis say baahar kisee muqarrara jagah par lay ja. vahaan usay jala dena hai.

²²aglay din ek beaib bakray ko qurbaan kar. yah bhee gunaah kee qurbaanee hai, aur is kay zareeay qurbaangaah ko pahelee qurbaanee kee tarah paak-saaf karna hai.

²³paak-saaf karnay kay is silsilay kee takmeel par ek beaib bail aur ek beaib mendhay ko chun kar ²⁴rabb ko pesh kar. imaam in jaanvaron par namak chhidak kar inhen rabb ko bhasm honay vaalee qurbaanee kay taur par pesh karen.

²⁵laazim hai ki too saat din tak rozaana ek bakra, ek javaan bail aur ek mendha qurbaan karay. sab jaanvar beaib hon. ²⁶saat dinon kee is kaar-ravaaee say tum qurbaangaah ka kaffaara day kar usay paak-saaf aur makhsoos karogay. ²⁷aathven din say imaam baaqaaida qurbaaniyaan shuroo kar sakengay. us vaqt say vah tumhaaray liyay bhasm honay vaalee aur salaamatee kee qurbaaniyaan chadhaaengay. tab tum mujhay manzoor hogay. yah rabb qaadir-ay-mutlaq ka farmaan hai.”