Hizqeeel 40
rabb kay naay ghar kee royaa
1hamaaree jilaavatanee kay 25ven saal men rabb ka haath mujh par a thahera aur vah mujhay yarooshalam lay gaya. maheenay ka dasvaan din [a] 28 aprail. tha. us vaqt yarooshalam ko dushman kay qabzay men aaay 14 saal ho gaay thay. 2ilaahee royaaon men allaah nay mujhay mulk-ay-israaeel kay ek nihaayat buland pahaad par pahunchaaya. pahaad kay junoob men mujhay ek shaher sa nazar aaya. 3allaah mujhay shaher kay qareeb lay gaya to main nay shaher kay darvaazay men khaday ek aadmee ko dekha jo peetal ka bana hua lag raha tha. us kay haath men kataan kee rassee aur feeta tha. 4us nay mujh say kaha, “ai aadamzaad, dhyaan say dekh, ghaur say sun! jo kuchh bhee main tujhay dikhaaoonga, us par tavajjuh day. kyoonki tujhay isee liyay yahaan laaya gaya hai ki main tujhay yah dikhaaoon. jo kuchh bhee too dekhay usay israaeelee qaum ko suna day!”
rabb kay ghar kay bairoonee sahen ka mashriqee darvaazaa
5main nay dekha ki rabb kay ghar ka sahen chaardeevaaree say ghira hua hai. jo feeta meray raahanuma kay haath men tha us kee lambaaee saadhay 10 fut thee. is kay zareeay us nay chaardeevaaree ko naap liya. deevaar kee motaaee aur lambaaee donon saadhay das das fut thee.
6phir mera raahanuma mashriqee darvaazay kay paas pahunchaanay vaalee seedhee par chadh kar darvaazay kee daheleez par ruk gaya. jab us nay us kee paimaaish kee to us kee gaheraaee saadhay 10 fut niklee.
7jab vah darvaazay men khada hua to daaeen aur baaeen taraf paheredaaron kay teen teen kamray nazar aaay. har kamray kee lambaaee aur chaudaaee saadhay das das fut thee. kamron kay darmiyaan kee deevaar paunay nau fut motee thee. in kamron kay baad ek aur daheleez thee jo saadhay 10 fut gaheree thee. us par say guzar kar ham darvaazay say mulhiq ek baraamday men aaay jis ka rukh rabb kay ghar kee taraf tha. 8meray raahanuma nay baraamday kee paimaaish kee 9to pata chala ki us kee lambaaee 14 fut hai. darvaazay kay satoon-numa baazoo saadhay 3 fut motay thay. baraamday ka rukh rabb kay ghar kee taraf tha. 10paheredaaron kay mazkoora kamray sab ek jaisay baday thay, aur un kay darmiyaan vaalee deevaaren sab ek jaisee motee theen.
11is kay baad us nay darvaazay kee guzargaah kee chaudaaee naapee. yah mil mila kar paunay 23 fut thee, alabatta jab kivaad khulay thay to un kay darmiyaan ka faasila saadhay 17 fut tha. 12paheredaaron kay har kamray kay saamnay ek chhotee see deevaar thee jis kee oonchaaee 21 inch thee jabki har kamray kee lambaaee aur oonchaaee saadhay das das fut thee. 13phir meray raahanuma nay vah faasila naapa jo in kamron men say ek kee pichhlee deevaar say lay kar us kay muqaabil kay kamray kee pichhlee deevaar tak tha. maaloom hua ki paunay 44 fut hai.
14sahen men darvaazay say mulhiq vah baraamda tha jis ka rukh rabb kay ghar kee taraf tha. us kee chaudaaee 33 fut thee. [b] ibraanee matan men is aayat ka matlab ghairvaazih hai. 15jo baahar say darvaazay men daakhil hota tha vah saadhay 87 fut kay baad hee sahen men pahunchta tha.
16paheredaaron kay tamaam kamron men chhotee khidkiyaan theen. kuchh bairoonee deevaar men theen, kuchh kamron kay darmiyaan kee deevaaron men. darvaazay kay satoon-numa baazooon men khajoor kay darakht munaqqash thay.
rabb kay ghar ka bairoonee sahen
17phir mera raahanuma darvaazay men say guzar kar mujhay rabb kay ghar kay bairoonee sahen men laaya. chaardeevaaree kay saath saath 30 kamray banaaay gaay thay jin kay saamnay patthar ka farsh tha. 18yah farsh chaardeevaaree kay saath saath tha. jahaan darvaazon kee guzaragaahain theen vahaan farsh un kee deevaaron say lagta tha. jitna lamba in guzaragaahon ka vah hissa tha jo sahen men tha utna hee chauda farsh bhee tha. yah farsh androonee sahen kee nisbat neecha tha.
19bairoonee aur androonee sahenon kay darmiyaan bhee darvaaza tha. yah bairoonee darvaazay kay muqaabil tha. jab meray raahanuma nay donon darvaazon ka darmiyaanee faasila naapa to maaloom hua ki 175 fut hai.
bairoonee sahen ka shimaalee darvaazaa
20is kay baad us nay chaardeevaaree kay shimaalee darvaazay kee paimaaish kee.
21is darvaazay men bhee daaeen aur baaeen taraf teen teen kamray thay jo mashriqee darvaazay kay kamron jitnay baday thay. us men say guzar kar ham vahaan bhee darvaazay say mulhiq baraamday men aaay jis ka rukh rabb kay ghar kee taraf tha. us kee aur us kay satoon-numa baazooon kee lambaaee aur chaudaaee utnee hee thee jitnee mashriqee darvaazay kay baraamday aur us kay satoon-numa baazooon kee thee. guzargaah kee pooree lambaaee saadhay 87 fut thee. jab meray raahanuma nay vah faasila naapa jo paheredaaron kay kamron men say ek kee pichhlee deevaar say lay kar us kay muqaabil kay kamray kee pichhlee deevaar tak tha to maaloom hua ki paunay 44 fut hai. 22darvaazay say mulhiq baraamda, khidkiyaan aur kanda kiay gaay khajoor kay darakht usee tarah banaaay gaay thay jis tarah mashriqee darvaazay men. baahar ek seedhee darvaazay tak pahunchaatee thee jis kay saat qadamchay thay. mashriqee darvaazay kee tarah shimaalee darvaazay kay androonee siray kay saath ek baraamda mulhiq tha jis say ho kar insaan sahen men pahunchta tha.
23mashriqee darvaazay kee tarah is darvaazay kay muqaabil bhee androonee sahen men pahunchaanay vaala darvaaza tha. donon darvaazon ka darmiyaanee faasila 175 fut tha.
bairoonee sahen ka junoobee darvaazaa
24is kay baad mera raahanuma mujhay baahar lay gaya. chaltay chaltay ham junoobee chaardeevaaree kay paas pahunchay. vahaan bhee darvaaza nazar aaya. us men say guzar kar ham vahaan bhee darvaazay say mulhiq baraamday men aaay jis ka rukh rabb kay ghar kee taraf tha. yah baraamda darvaazay kay satoon-numa baazooon samet deegar darvaazon kay baraamday jitna bada tha. 25darvaazay aur baraamday kee khidkiyaan bhee deegar khidkiyon kee maanind theen. guzargaah kee pooree lambaaee saadhay 87 fut thee. jab us nay vah faasila naapa jo paheredaaron kay kamron men say ek kee pichhlee deevaar say lay kar us kay muqaabil kay kamray kee pichhlee deevaar tak tha to maaloom hua ki paunay 44 fut hai. 26baahar ek seedhee darvaazay tak pahunchaatee thee jis kay saat qadamchay thay. deegar darvaazon kee tarah junoobee darvaazay kay androonee siray kay saath baraamda mulhiq tha jis say ho kar insaan sahen men pahunchta tha. baraamday kay donon satoon-numa baazooon par khajoor kay darakht kanda kiay gaay thay.
27is darvaazay kay muqaabil bhee androonee sahen men pahunchaanay vaala darvaaza tha. donon darvaazon ka darmiyaanee faasila 175 fut tha.
androonee sahen ka junoobee darvaazaa
28phir mera raahanuma junoobee darvaazay men say guzar kar mujhay androonee sahen men laaya. jab us nay vahaan ka darvaaza naapa to maaloom hua ki vah bairoonee darvaazon kee maanind hai. 29-30 paheredaaron kay kamray, baraamda aur us kay satoon-numa baazoo sab paimaaish kay hisaab say deegar darvaazon kee maanind thay. is darvaazay aur is kay saath mulhiq baraamday men bhee khidkiyaan theen. guzargaah kee pooree lambaaee saadhay 87 fut thee. jab meray raahanuma nay vah faasila naapa jo paheredaaron kay kamray men say ek kee pichhlee deevaar say lay kar us kay muqaabil kay kamray kee pichhlee deevaar tak tha to maaloom hua ki paunay 44 fut hai. 31lekin us kay baraamday ka rukh bairoonee sahen kee taraf tha. us men pahunchnay kay liyay ek seedhee banaaee gaee thee jis kay aath qadamchay thay. darvaazay kay satoon-numa baazooon par khajoor kay darakht kanda kiay gaay thay.
androonee sahen ka mashriqee darvaazaa
32is kay baad mera raahanuma mujhay mashriqee darvaazay say ho kar androonee sahen men laaya. jab us nay yah darvaaza naapa to maaloom hua ki yah bhee deegar darvaazon jitna bada hai. 33paheredaaron kay kamray, darvaazay kay satoon-numa baazoo aur baraamda paimaaish kay hisaab say deegar darvaazon kee maanind thay. yahaan bhee darvaazay aur baraamday men khidkiyaan lagee theen. guzargaah kee lambaaee saadhay 87 fut aur chaudaaee paunay 44 fut thee. 34is darvaazay kay baraamday ka rukh bhee bairoonee sahen kee taraf tha. darvaazay kay satoon-numa baazooon par khajoor kay darakht kanda kiay gaay thay. baraamday men pahunchnay kay liyay ek seedhee banaaee gaee thee jis kay aath qadamchay thay.
androonee sahen ka shimaalee darvaazaa
35phir mera raahanuma mujhay shimaalee darvaazay kay paas laaya. us kee paimaaish karnay par maaloom hua ki yah bhee deegar darvaazon jitna bada hai. 36paheredaaron kay kamray, satoon-numa baazoo, baraamda aur deevaaron men khidkiyaan bhee doosray darvaazon kee maanind theen. guzargaah kee lambaaee saadhay 87 fut aur chaudaaee paunay 44 fut thee. 37us kay baraamday ka rukh bhee bairoonee sahen kee taraf tha. darvaazay kay satoon-numa baazooon par khajoor kay darakht kanda kiay gaay thay. us men pahunchnay kay liyay ek seedhee banaaee gaee thee jis kay aath qadamchay thay.
androonee shimaalee darvaazay kay paas zabah ka band-o-bast
38androonee shimaalee darvaazay kay baraamday men darvaaza tha jis men say guzar kar insaan us kamray men daakhil hota tha jahaan un zabah kiay huay jaanvaron ko dhoya jaata tha jinhen bhasm karna hota tha. 39baraamday men chaar mezen theen, kamray kay donon taraf do do mezen. in mezon par un jaanvaron ko zabah kiya jaata tha jo bhasm honay vaalee qurbaaniyon, gunaah kee qurbaaniyon aur qusoor kee qurbaaniyon kay liyay makhsoos thay. 40is baraamday say baahar mazeed chaar aisee mezen theen, do ek taraf aur do doosree taraf. 41mil mila kar aath mezen theen jin par qurbaaniyon kay jaanvar zabah kiay jaatay thay. chaar baraamday kay andar aur chaar us say baahar kay sahen men theen.
42baraamday kee chaar mezen taraashay huay patthar say banaaee gaee theen. har ek kee lambaaee aur chaudaaee saadhay 31 inch aur oonchaaee 21 inch thee. un par vah tamaam aalaat paday thay jo jaanvaron ko bhasm honay vaalee qurbaanee aur baaqee qurbaaniyon kay liyay tayyaar karnay kay liyay darkaar thay. 43jaanvaron ka gosht in mezon par rakha jaata tha. ird-gird kee deevaaron men teen teen inch lambee huken lagee theen.
44phir ham androonee sahen men daakhil huay. vahaan shimaalee darvaazay kay saath ek kamra mulhiq tha jo androonee sahen kee taraf khula tha aur jis ka rukh junoob kee taraf tha. junoobee darvaazay kay saath bhee aisa kamra tha. us ka rukh shimaal kee taraf tha. 45meray raahanuma nay mujh say kaha, “jis kamray ka rukh junoob kee taraf hai vah un imaamon kay liyay hai jo rabb kay ghar kee dekh-bhaal kartay hain, 46jabki jis kamray ka rukh shimaal kee taraf hai vah un imaamon kay liyay hai jo qurbaangaah kee dekh-bhaal kartay hain. tamaam imaam sadoq kee aulaad hain. laavee kay qabeelay men say sirf un hee ko rabb kay huzoor a kar us kee khidmat karnay kee ijaazat hai.”
androonee sahen aur rabb ka ghar
47meray raahanuma nay androonee sahen kee paimaaish kee. us kee lambaaee aur chaudaaee 175 fut thee. qurbaangaah is sahen men rabb kay ghar kay saamnay hee thee. 48phir us nay mujhay rabb kay ghar kay baraamday men lay ja kar darvaazay kay satoon-numa baazooon kee paimaaish kee. maaloom hua ki yah paunay 9 fut motay hain. darvaazay kee chaudaaee saadhay 24 fut thee jabki daaen baaen kee deevaaron kee lambaaee sava paanch paanch fut thee. 49chunaanchay baraamday kee pooree chaudaaee 35 aur lambaaee 21 fut thee. us men daakhil honay kay liyay das qadamchon vaalee seedhee banaaee gaee thee. darvaazay kay donon satoon-numa baazooon kay saath saath ek ek satoon khada kiya gaya tha.