Hizqeeel 4

yarooshalam ka muhaasaraa

¹ai aadamzaad, ab ek kachchee eent lay aur usay apnay saamnay rakh kar us par yarooshalam shaher ka naqsha kanda kar. ²phir yah naqsha shaher ka muhaasara dikhaanay kay liyay istemaal kar. burj aur pushtay bana kar ghera daal. yarooshalam kay baahar lashkargaah laga kar shaher kay ird-gird qil’aashikan masheenen tayyaar rakh. ³phir lohay kee plet lay kar apnay aur shaher kay darmiyaan rakh. is say muraad lohay kee deevaar hai. shaher ko ghoor ghoor kar zaahir kar ki too us ka muhaasara kar raha hai. is nishaan say too dikhaaega ki israaeeliyon kay saath kya kuchh honay vaala hai.

^4-5 is kay baad apnay baaen paheloo par let kar alaamtee taur par mulk-ay-israaeel kee saza pa. jitnay bhee saal vah gunaah kartay aaay hain utnay hee din tujhay isee haalat men letay rahena hai. vah 390 saal gunaah kartay rahay hain, is liyay too 390 din un kay gunaahon kee saza paaega. ⁶is kay baad apnay daaen paheloo par let ja aur mulk-ay-yahoodaah kee saza pa. main nay muqarrar kiya hai ki too 40 din yah karay, kyoonki yahoodaah 40 saal gunaah karta raha hai. ⁷gheray huay shaher yarooshalam ko ghoor ghoor kar apnay nangay baazoo say usay dhamkee day aur us kay khilaaf peshgoee kar. ⁸saath saath main tujhay rassiyon men jakad loonga taaki too utnay din karvaten badal na sakay jitnay din tera muhaasara kiya jaaega.

⁹ab kuchh gandum, jau, lobiya, masoor, baajra aur yahaan mustaamal ghatiya qism ka gandum jama karkay ek hee bartan men daal. baaen paheloo par lettay vaqt yaanee pooray 390 din in hee say rotee bana kar kha. ^10-11 fee din tujhay rotee ka ek paao khaanay aur paanee ka pauna litar peenay kee ijaazat hai. yah cheezen ehatiyaat say tol kar muqarrara auqaat par kha aur pee. ¹²rotee ko jau kee rotee kee tarah tayyaar karkay kha. eendhan kay liyay insaan ka fuzla istemaal kar. dhyaan day ki sab is kay gavaah hon.” ¹³rabb nay farmaaya, “jab main israaeeliyon ko deegar aqvaam men muntashir karoonga to unhen naapaak rotee khaanee padegee.”

¹⁴yah sun kar main bol utha, “haay, haay! ai rabb qaadir-ay-mutlaq, main kabhee bhee naapaak naheen hua. javaanee say lay kar aaj tak main nay kabhee bhee aisay jaanvar ka gosht naheen khaaya jisay zabah naheen kiya gaya tha ya jisay janglee jaanvaron nay phaada tha. naapaak gosht kabhee meray munh men naheen aaya.”

¹⁵tab rabb nay javaab diya, “theek hai, rotee ko banaanay kay liyay too insaan kay fuzlay kay bajaay gobar istemaal kar sakta hai. main tujhay is kee ijaazat deta hoon.”

¹⁶us nay mazeed farmaaya, “ai aadamzaad, main yarooshalam men rotee ka band-o-bast khatm ho jaanay doonga. tab log apna khaana badee ehatiyaat say aur pareshaanee men tol tol kar khaaengay. vah paanee ka qatra qatra gin kar usay laraztay huay piengay. ¹⁷kyoonki khaanay aur paanee kee qillat hogee. sab mil kar tabaah ho jaaengay, sab apnay gunaahon kay sabab say sad jaaengay.