Hizqeeel 39
1ai aadamzaad, jooj kay khilaaf nubuvvat karkay kah,
‘rabb qaadir-ay-mutlaq farmaata hai ki ai masak aur toobal kay aala raees jooj, ab main tujh say nipat loonga. 2main tera munh pher doonga aur tujhay shimaal kay doordaraaz ilaaqay say ghaseet kar israaeel kay pahaadon par laaoonga. 3vahaan main teray baaen haath say kamaan hataaoonga aur teray daaen haath say teer gira doonga. 4israaeel kay pahaadon par hee too apnay tamaam bain-ul-aqvaamee faujiyon kay saath halaak ho jaaega. main tujhay har qism kay shikaaree parindon aur darindon ko khila doonga. 5kyoonki teree laash khulay maidaan men gir kar padee rahegee. yah mera, rabb qaadir-ay-mutlaq ka farmaan hai.
6main maajooj par aur apnay aap ko mahfooz samajhnay vaalay saahilee ilaaqon par aag bhejoonga. tab vah jaan lengay ki main hee rabb hoon. 7apnee qaum israaeel kay darmiyaan hee main apna muqaddas naam zaahir karoonga. aainda main apnay muqaddas naam kee behuramtee bardaasht naheen karoonga. tab aqvaam jaan lengee ki main rabb aur israaeel ka quddoos hoon. 8rabb qaadir-ay-mutlaq farmaata hai ki yah sab kuchh honay vaala hai, yah zaroor pesh aaega! vahee din hai jis ka zikr main kar chuka hoon.
jooj aur us kee fauj kee tadfeen
9phir israaeelee shaheron kay baashinday maidaan-ay-jang men ja kar dushman kay asaliha ko eendhan kay liyay jama karengay. itnee chhotee aur badee dhaalen, kamaan, teer, laathiyaan aur nezay ikatthay ho jaaengay ki saat saal tak kisee aur eendhan kee zaroorat naheen hogee. 10israaeeliyon ko khulay maidaan men lakdee chunnay ya jangal men darakht kaatnay kee zaroorat naheen hogee, kyoonki vah yah hathiyaar eendhan kay taur par istemaal karengay. ab vah unhen lootengay jinhon nay unhen loot liya tha, vah un say maal-maveshee chheen lengay jinhon nay un say sab kuchh chheen liya tha. yah rabb qaadir-ay-mutlaq ka farmaan hai.
11us din main israaeel men jooj kay liyay qabristaan muqarrar karoonga. yah qabristaan vaadee-ay-abaareem [a] ya guzarnay vaalon kee vaadee. men hoga jo baheera-ay-murdaar kay mashriq men hai. jooj kay saath us kee tamaam fauj bhee dafan hogee, is liyay musaafir aainda us men say naheen guzar sakengay. tab vah jagah vaadee-ay-hamoon jooj [b] jooj kay faujee hujoom kee vaadee. bhee kahelaaegee. 12jab israaeelee tamaam laashen dafna kar mulk ko paak-saaf karengay to saat maheenay lagengay. 13tamaam ummat is kaam men masroof rahegee. rabb qaadir-ay-mutlaq farmaata hai ki jis din main duniya par apna jalaal zaahir karoonga us din yah un kay liyay shuharat ka baais hoga.
14saat maheenon kay baad kuchh aadmiyon ko alag karkay kaha jaaega ki pooray mulk men say guzar kar maaloom karen ki abhee kahaan kahaan laashen padee hain. kyoonki laazim hai ki sab dafan ho jaaen taaki mulk dubaara paak-saaf ho jaaay. 15jahaan kaheen koee laash nazar aaay us jagah kee vah nishaandihee karengay taaki dafnaanay vaalay usay vaadee-ay-hamoon jooj men lay ja kar dafan karen. 16yoon mulk ko paak-saaf kiya jaaega. us vaqt say israaeel kay ek shaher ka naam hamoonaa [c] hujoom yaanee jooj kay. kahelaaega.’
17ai aadamzaad, rabb qaadir-ay-mutlaq farmaata hai ki har qism kay parinday aur darinday bula kar kah, ‘aao, idhar jama ho jaao! chaaron taraf say a kar israaeel kay pahaadee ilaaqay men jama ho jaao! kyoonki yahaan main tumhaaray liyay qurbaanee kee zabardast ziyaafat tayyaar kar raha hoon. yahaan tumhen gosht khaanay aur khoon peenay ka sunahera mauqa milega. 18tum soormaaon ka gosht aur duniya kay hukmaraanon ka khoon piyogay. sab basan kay motay-taazay mendhon, bhed kay bachchon, bakron aur bailon jaisay mazedaar hongay. 19kyoonki jo qurbaanee men tumhaaray liyay tayyaar kar raha hoon us kee charbee tum jee bhar kar khaaogay, us ka khoon pee pee kar mast ho jaaogay. 20rabb farmaata hai ki tum meree mez par baith kar ghodon aur ghudasavaaron, soormaaon aur har qism kay faujiyon say ser ho jaaogay.’
rabb apnee qaum vaapas laaegaa
21yoon main deegar aqvaam par apna jalaal zaahir karoonga. kyoonki jab main jooj aur us kee fauj kee adaalat karkay un say nipat loonga to tamaam aqvaam is kee gavaah hongee. 22tab israaeelee qaum hamesha kay liyay jaan legee ki main rabb us ka khuda hoon. 23aur deegar aqvaam jaan lengee ki israaeelee apnay gunaahon kay sabab say jilaavatan huay. vah jaan lengee ki choonki israaeelee mujh say bevafa huay, isee liyay main nay apna munh un say chhupa kar unhen un kay dushmanon kay havaalay kar diya, isee liyay vah sab talvaar kee zad men a kar halaak huay. 24kyoonki main nay unhen un kee naapaakee aur jaraaim ka munaasib badla day kar apna chihara un say chhupa liya tha.
25chunaanchay rabb qaadir-ay-mutlaq farmaata hai ki ab main yaaqoob kee aulaad ko bahaal karkay tamaam israaeelee qaum par taras khaaoonga. ab main badee ghairat say apnay muqaddas naam ka difa karoonga. 26jab israaeelee sukoon say aur khauf khaaay baghair apnay mulk men rahengay to vah apnee rusvaaee aur meray saath bevafaaee ka etiraaf karengay. 27main unhen deegar aqvaam aur un kay dushmanon kay mamaalik men say jama karkay unhen vaapas laaoonga aur yoon un kay zareeay apna muqaddas kirdaar mut’addid aqvaam par zaahir karoonga. 28tab vah jaan lengay ki main hee rabb hoon. kyoonki unhen aqvaam men jilaavatan karnay kay baad main unhen un kay apnay hee mulk men dubaara jama karoonga. ek bhee peechhay naheen chhoda jaaega. 29rabb qaadir-ay-mutlaq farmaata hai ki aainda main apna chihara un say naheen chhupaaoonga. kyoonki main apna rooh israaeelee qaum par undel doonga.”