Hizqeeel 38

israaeel ka dushman jooj

¹rabb mujh say hamkalaam hua, ²“ai aadamzaad, mulk-ay-maajooj kay hukmaraan jooj kee taraf rukh kar jo masak aur toobal ka aala raees hai. us kay khilaaf nubuvvat karke ³kah,

‘rabb qaadir-ay-mutlaq farmaata hai ki ai masak aur toobal kay aala raees jooj, ab main tujh say nipat loonga. ⁴main teray munh ko pher doonga, teray munh men kaantay daal kar tujhay pooree fauj samet nikaal doonga. shaandaar vardiyon say aaraasta teray tamaam ghudsavaar aur faujee apnay ghodon samet nikal aaengay, go teree badee fauj kay mard chhotee aur badee dhaalen uthaaay phirengay, aur har ek talvaar say les hoga. ⁵faars, ethopiya aur libiya kay mard bhee fauj men shaamil hongay. har ek badee dhaal aur khod say musallah hoga. ⁶jumar aur shimaal kay doordaraaz ilaaqay bait-tujarma kay tamaam dastay bhee saath hongay. gharaz us vaqt bahut see qaumen teray saath nikalengee. ⁷chunaanchay mustaid ho ja! jitnay lashkar teray ird-gird jama ho gaay hain un kay saath mil kar khoob tayyaariyaan kar! un kay liyay paheraadaaree kar.

⁸mut’addid dinon kay baad tujhay mulk-ay-israaeel par hamla karnay kay liyay bulaaya jaaega jisay abhee jang say chhutkaara mila hoga aur jis kay jilaavatan deegar bahut see qaumon men say vaapas a gaay hongay. go israaeel ka pahaadee ilaaqa badee der say barbaad hua hoga, lekin us vaqt us kay baashinday jilaavatanee say vaapas a kar amn-o-amaan say us men basengay.

⁹tab too toofaan kee tarah aagay badhega, teray dastay baadal kee tarah pooray mulk par chha jaaengay. teray saath bahut see qaumen hongee. ¹⁰rabb qaadir-ay-mutlaq farmaata hai ki us vaqt teray zahen men buray khayaalaat ubhar aaengay aur too shareer mansoobay baandhega. ¹¹too kahega, “yah mulk khula hai, aur us kay baashinday aaraam aur sukoon kay saath rah rahay hain. aao, main un par hamla karoon, kyoonki vah apnee hifaazat naheen kar saktay. na un kee chaardeevaaree hai, na darvaaza ya kunda. ¹²main israaeeliyon ko loot loonga. jo shaher pahelay khandaraat thay lekin ab naay siray say aabaad huay hain un par main toot padoonga. jo jilaavatan deegar aqvaam say vaapas a gaay hain un kee daulat main chheen loonga. kyoonki unhen kaafee maal-maveshee haasil huay hain, aur ab vah duniya kay markaz men a basay hain.” ¹³saba, dadaan aur tarsees kay taajir aur buzurg poochhengay ki kya too nay vaaqaee apnay faujiyon ko loot-maar kay liyay ikattha kar liya hai? kya too vaaqaee sona-chaandee, maal-maveshee aur baaqee bahut see daulat chheenna chaahata hai?’

¹⁴ai aadamzaad, nubuvvat karkay jooj ko bata, ‘rabb qaadir-ay-mutlaq farmaata hai ki us vaqt tujhay pata chalega ki meree qaum israaeel sukoon say zindagee guzaar rahee hai, ¹⁵aur too doordaraaz shimaal kay apnay mulk say niklega. teree vasee aur taaqatvar fauj men mut’addid qaumen shaamil hongee, aur sab ghodon par savaar ¹⁶meree qaum israaeel par dhaava bol dengay. vah us par baadal kee tarah chha jaaengay. ai jooj, un aakhiree dinon men main khud tujhay apnay mulk par hamla karnay doonga taaki deegar aqvaam mujhay jaan len. kyoonki jo kuchh main un kay dekhtay dekhtay teray saath karoonga us say mera muqaddas kirdaar un par zaahir ho jaaega. ¹⁷rabb qaadir-ay-mutlaq farmaata hai ki too vahee hai jis ka zikr main nay maazee men kiya tha. kyoonki maazee men meray khaadim yaanee israaeel kay nabee kaafee saalon say peshgoee kartay rahay ki main tujhay israaeel kay khilaaf bhejoonga.

allaah khud jooj ko tabaah karegaa

¹⁸rabb qaadir-ay-mutlaq farmaata hai ki jis din jooj mulk-ay-israaeel par hamla karega us din main aag-bagoola ho jaaoonga. ¹⁹main farmaata hoon ki us din meree ghairat aur shadeed qaher yoon bhadak uthega ki yaqeenan mulk-ay-israaeel men zabardast zalzla aaega. ²⁰sab meray saamnay tharathra uthengay, khwaah machhliyaan hon ya parinday, khwaah zameen par chalnay aur rengnay vaalay jaanvar hon ya insaan. pahaad un kee guzaragaahon samet khaak men milaaay jaaengay, aur har deevaar gir jaaegee.

²¹rabb qaadir-ay-mutlaq farmaata hai ki main apnay tamaam pahaadee ilaaqay men jooj kay khilaaf talvaar bhejoonga. tab sab aapas men ladnay lagengay. ²²main un men muhalak beemaariyaan aur qatl-o-ghaarat phaila kar un kee adaalat karoonga. saath saath main mooslaadhaar baarish, olay, aag aur gandhak jooj aur us kee bain-ul-aqvaamee fauj par barsa doonga. ²³yoon main apna azeem aur muqaddas kirdaar mut’addid qaumon par zaahir karoonga, un kay dekhtay dekhtay apnay aap ka izhaar karoonga. tab vah jaan lengee ki main hee rabb hoon.’