Hizqeeel 37
haddiyon say bharee vaadee kee royaa
1ek din rabb ka haath mujh par a thahera. rabb nay mujhay apnay rooh say baahar lay ja kar ek khulee vaadee kay beech men khada kiya. vaadee haddiyon say bharee thee. 2us nay mujhay un men say guzarnay diya to main nay dekha ki vaadee kee zameen par beshumaar haddiyaan bikhree padee hain. yah haddiyaan saraasar sookhee huee theen.
3rabb nay mujh say poochha, “ai aadamzaad, kya yah haddiyaan dubaara zinda ho saktee hain?” main nay javaab diya, “ai rabb qaadir-ay-mutlaq, too hee jaanta hai.”
4tab us nay farmaaya, “nubuvvat karkay haddiyon ko bata, ‘ai sookhee huee haddiyo, rabb ka kalaam suno! 5rabb qaadir-ay-mutlaq farmaata hai ki main tum men dam daaloonga to tum dubaara zinda ho jaaogee. 6main tum par nasen aur gosht chadha kar sab kuchh jild say dhaamp doonga. main tum men dam daal doonga, aur tum zinda ho jaaogee. tab tum jaan logee ki main hee rabb hoon’.”
7main nay aisa hee kiya. aur joon hee main nubuvvat karnay laga to shor mach gaya. haddiyaan khadkhadaatay huay ek doosree kay saath jud gaeen, aur hotay hotay pooray dhaanchay ban gaay. 8meray dekhtay dekhtay nasen aur gosht dhaanchon par chadh gaya aur sab kuchh jild say dhaampa gaya. lekin ab tak jismon men dam naheen tha.
9phir rabb nay farmaaya, “ai aadamzaad, nubuvvat karkay dam say mukhaatib ho ja, ‘ai dam, rabb qaadir-ay-mutlaq farmaata hai ki chaaron taraf say a kar maqtoolon par phoonk maar taaki dubaara zinda ho jaaen’.”
10main nay aisa hee kiya to maqtoolon men dam a gaya, aur vah zinda ho kar apnay paaon par khaday ho gaay. ek nihaayat badee fauj vujood men a gaee thee!
11tab rabb nay farmaaya, “ai aadamzaad, yah haddiyaan israaeelee qaum kay tamaam afraad hain. vah kahetay hain, ‘hamaaree haddiyaan sookh gaee hain, hamaaree ummeed jaatee rahee hai. ham khatm hee ho gaay hain!’ 12chunaanchay nubuvvat karkay unhen bata,
‘rabb qaadir-ay-mutlaq farmaata hai ki ai meree qaum, main tumhaaree qabron ko khol doonga aur tumhen un men say nikaal kar mulk-ay-israaeel men vaapas laaoonga. 13ai meree qaum, jab main tumhaaree qabron ko khol doonga aur tumhen un men say nikaal laaoonga tab tum jaan logay ki main hee rabb hoon. 14main apna rooh tum men daal doonga to tum zinda ho jaaogay. phir main tumhen tumhaaray apnay mulk men basa doonga. tab tum jaan logay ki yah mera, rabb ka farmaan hai aur main yah karoonga bhee’.”
yahoodaah aur israaeel muttahid ho jaaenge
15rabb mujh say hamkalaam hua, 16“ai aadamzaad, lakdee ka tukda lay kar us par likh day, ‘junoobee qabeela yahoodaah aur jitnay israaeelee qabeelay us kay saath muttahid hain.’ phir lakdee ka ek aur tukda lay kar us par likh day, ‘shimaalee qabeela yoosuf yaanee ifraaeem aur jitnay israaeelee qabeelay us kay saath muttahid hain.’ 17ab lakdee kay donon tukday ek doosray kay saath yoon jod day ki teray haath men ek ho jaaen.
18teray hamvatan tujh say poochhengay, ‘kya aap hamen is ka matlab naheen bataaengay?’ 19tab unhen bata, ‘rabb qaadir-ay-mutlaq farmaata hai ki main yoosuf yaanee lakdee kay maalik ifraaeem aur us kay saath muttahid israaeelee qabeelon ko lay kar yahoodaah kee lakdee kay saath jod doonga. meray haath men vah lakdee ka ek hee tukda ban jaaengay.’
20apnay hamvatanon kee maujoodgee men lakdee kay mazkoora tukday haath men thaamay rakh 21aur saath saath unhen bata, ‘rabb qaadir-ay-mutlaq farmaata hai ki main israaeeliyon ko un qaumon men say nikaal laaoonga jahaan vah ja basay hain. main unhen jama karkay un kay apnay mulk men vaapas laaoonga. 22vaheen israaeel kay pahaadon par main unhen muttahid karkay ek hee qaum bana doonga. un par ek hee baadshaah hukoomat karega. aainda vah na kabhee do qaumon men taqseem ho jaaengay, na do saltanaton men. 23aainda vah apnay aap ko na apnay buton ya baaqee makrooh cheezon say naapaak karengay, na un gunaahon say jo ab tak kartay aaay hain. main unhen un tamaam maqaamon say nikaal kar chhudaaoonga jin men unhon nay gunaah kiya hai. main unhen paak-saaf karoonga. yoon vah meree qaum hongay aur main un ka khuda hoonga. 24mera khaadim daaood un ka baadshaah hoga, un ka ek hee gallaabaan hoga. tab vah meree hidaayaat kay mutaabiq zindagee guzaarengay aur dhyaan say meray ahkaam par amal karengay.
25jo mulk main nay apnay khaadim yaaqoob ko diya tha aur jis men tumhaaray baapdaada rahetay thay us men israaeelee dubaara basengay. haan, vah aur un kee aulaad hamesha tak us men aabaad rahengay, aur mera khaadim daaood abad tak un par hukoomat karega. 26tab main un kay saath salaamatee ka ahd baandhoonga, ek aisa ahd jo hamesha tak qaaim rahega. main unhen qaaim karkay un kee taadaad badhaata jaaoonga, aur mera maqdis abad tak un kay darmiyaan rahega. 27vah meree sukoonatgaah kay saay men basengay. main un ka khuda hoonga, aur vah meree qaum hongay. 28jab mera maqdis abad tak un kay darmiyaan hoga to deegar aqvaam jaan lengee ki main hee rabb hoon, ki israaeel ko muqaddas karnay vaala main hee hoon’.”