Hizqeeel 36

israaeel apnay vatan vaapas aaegaa

¹ai aadamzaad, israaeel kay pahaadon kay baaray men nubuvvat karkay kah,

‘ai israaeel kay pahaado, rabb ka kalaam suno! ²rabb qaadir-ay-mutlaq farmaata hai ki dushman baghlen baja kar kaheta hai ki kya khoob, israaeel kee qadeem bulandiyaan hamaaray qabzay men a gaee hain! ³qaadir-ay-mutlaq farmaata hai ki unhon nay tumhen ujaad diya, tumhen chaaron taraf say tang kiya hai. nateejay men tum deegar aqvaam kay qabzay men a gaee ho aur log tum par kufr baknay lagay hain. ⁴chunaanchay ai israaeel kay pahaado, rabb qaadir-ay-mutlaq ka kalaam suno!

rabb qaadir-ay-mutlaq farmaata hai ki ai pahaado aur pahaadiyo, ai ghaatiyo aur vaadiyo, ai khandaraat aur insaan say khaalee shahero, tum gird-o-navaah kee aqvaam kay liyay loot-maar aur mazaaq ka nishaana ban gaay ho.

⁵is liyay rabb qaadir-ay-mutlaq farmaata hai ki main nay badee ghairat say in baaqee aqvaam kee sarzanish kee hai, khaaskar adom kee. kyoonki vah meree qaum ka nuqsaan dekh kar shaadiyaana bajaanay lageen aur apnee hiqaarat ka izhaar karkay meray mulk par qabza kiya taaki us kee charaagaah ko loot len. ⁶ai pahaado aur pahaadiyo, ai ghaatiyo aur vaadiyo, rabb qaadir-ay-mutlaq farmaata hai ki choonki deegar aqvaam nay teree itnee rusvaaee kee hai is liyay main apnee ghairat aur apna ghazab un par naazil karoonga. ⁷main rabb qaadir-ay-mutlaq apna haath utha kar qasam khaata hoon ki gird-o-navaah kee in aqvaam kee bhee rusvaaee kee jaaegee.

⁸lekin ai israaeel kay pahaado, tum par dubaara hariyaalee phalay phoolegee. tum naay siray say meree qaum israaeel kay liyay phal laaogay, kyoonki vah jald hee vaapas aanay vaalee hai. ⁹main dubaara tumhaaree taraf rujoo karoonga, dubaara tum par meharbaanee karoonga. tab log naay siray say tum par hal chala kar beej boengay.

¹⁰main tum par kee aabaadee badha doonga. kyoonki tamaam israaeelee a kar tumhaaree dhalaanon par apnay ghar bana lengay. tumhaaray shaher dubaara aabaad ho jaaengay, aur khandaraat kee jagah naay ghar ban jaaengay. ¹¹main tum par basnay vaalay insaan-o-haivaan kee taadaad badha doonga, aur vah badh kar phalen phoolengay. main honay doonga ki tumhaaray ilaaqay men maazee kee tarah aabaadee hogee, pahelay kee nisbat main tum par kaheen ziyaada meharbaanee karoonga. tab tum jaan logay ki main hee rabb hoon.

¹²main apnee qaum israaeel ko tumhaaray paas pahuncha doonga, aur vah dubaara tumhaaree dhalaanon par ghoomtay phirengay. vah tum par qabza karengay, aur tum un kee mauroosee zameen hogay. aainda kabhee tum unhen un kee aulaad say maheroom naheen karogay. ¹³rabb qaadir-ay-mutlaq farmaata hai ki beshak log tumhaaray baaray men kahetay hain ki tum logon ko hadap karkay apnee qaum ko us kee aulaad say maheroom kar detay ho. ¹⁴lekin aainda aisa naheen hoga. aainda tum na aadmiyon ko hadap karogay, na apnee qaum ko us kee aulaad say maheroom karogay. yah rabb qaadir-ay-mutlaq ka farmaan hai. ¹⁵main khud honay doonga ki aainda tumhen deegar aqvaam kee laan-taan naheen sunnee padegee. aainda tumhen un ka mazaaq bardaasht naheen karna padega, kyoonki aisa kabhee hoga naheen ki tum apnee qaum kay liyay thokar ka baais ho. yah rabb qaadir-ay-mutlaq ka farmaan hai’.”

allaah apnee qaum ko naya dil aur naya rooh bakhshegaa

¹⁶rabb mujh say hamkalaam hua, ¹⁷“ai aadamzaad, jab israaeelee apnay mulk men aabaad thay to mulk un kay chaal-chalan aur harkaton say naapaak hua. vah apnay buray ravayyay kay baais meree nazar men maahavaaree men mubtala aurat kee tarah naapaak thay. ¹⁸un kay haathon log qatl huay, un kee butparastee say mulk naapaak ho gaya.

javaab men main nay un par apna ghazab naazil kiya. ¹⁹main nay unhen mukhtalif aqvaam-o-mamaalik men muntashir karkay un kay chaal-chalan aur ghalat kaamon kee munaasib saza dee. ²⁰lekin jahaan bhee vah pahunchay vahaan un hee kay sabab say meray muqaddas naam kee behuramtee huee. kyoonki jin say bhee un kee mulaaqaat huee unhon nay kaha, ‘go yah rabb kee qaum hain to bhee inhen us kay mulk ko chhodna pada!’ ²¹yah dekh kar ki jis qaum men bhee israaeelee ja basay vahaan unhon nay meray muqaddas naam kee behuramtee kee main apnay naam kee fikr karnay laga. ²²is liyay israaeelee qaum ko bata,

‘rabb qaadir-ay-mutlaq farmaata hai ki jo kuchh main karnay vaala hoon vah main teree khaatir naheen karoonga balki apnay muqaddas naam kee khaatir. kyoonki tum nay deegar aqvaam men muntashir ho kar us kee behuramtee kee hai. ²³main zaahir karoonga ki mera azeem naam kitna muqaddas hai. tum nay deegar aqvaam kay darmiyaan rah kar us kee behuramtee kee hai, lekin main un kee maujoodgee men tumhaaree madad karkay apna muqaddas kirdaar un par zaahir karoonga. tab vah jaan lengee ki main hee rabb hoon. yah rabb qaadir-ay-mutlaq ka farmaan hai.

²⁴main tumhen deegar aqvaam-o-mamaalik say nikaal doonga aur tumhen jama karkay tumhaaray apnay mulk men vaapas laaoonga. ²⁵main tum par saaf paanee chhidakoonga to tum paak-saaf ho jaaogay. haan, main tumhen tamaam naapaakiyon aur buton say paak-saaf kar doonga.

²⁶tab main tumhen naya dil bakhsh kar tum men naee rooh daal doonga. main tumhaara sangeen dil nikaal kar tumhen gosht-post ka narm dil ata karoonga. ²⁷kyoonki main apna hee rooh tum men daal kar tumhen is qaabil bana doonga ki tum meree hidaayaat kee pairvee aur meray ahkaam par dhyaan say amal kar sako. ²⁸tab tum dubaara us mulk men sukoonat karogay jo main nay tumhaaray baapdaada ko diya tha. tum meree qaum hogay, aur main tumhaara khuda hoonga. ²⁹main khud tumhen tumhaaree tamaam naapaakee say chhudaaoonga. aainda main tumhaaray mulk men kaal padnay naheen doonga balki anaaj ko ugnay aur badhnay ka hukm doonga. ³⁰main baaghon aur kheton kee paidaavaar badha doonga taaki aainda tumhen mulk men kaal padnay kay baais deegar qaumon kay taanay sunnay na paden. ³¹tab tumhaaree buree raahen aur ghalat harkaten tumhen yaad aaengee, aur tum apnay gunaahon aur butparastee kay baais apnay aap say ghin khaaogay. ³²lekin yaad rahay ki main yah sab kuchh tumhaaree khaatir naheen kar raha. rabb qaadir-ay-mutlaq farmaata hai ki ai israaeelee qaum, sharm karo! apnay chaal-chalan par sharmasaar ho!

³³rabb qaadir-ay-mutlaq farmaata hai ki jis din main tumhen tumhaaray tamaam gunaahon say paak-saaf karoonga us din main tumhen dubaara tumhaaray shaheron men aabaad karoonga. tab khandaraat par naay ghar banengay. ³⁴go is vaqt mulk men say guzarnay vaalay har musaafir ko us kee tabaahashuda haalat nazar aatee hai, lekin us vaqt aisa naheen hoga balki zameen kee kheteebaadee kee jaaegee. ³⁵log yah dekh kar kahengay, “pahelay sab kuchh veeraan-o-sunsaan tha, lekin ab mulk baagh-ay-adan ban gaya hai! pahelay us kay shaher zameenabos thay aur un kee jagah malbay kay dher nazar aatay thay. lekin ab un kee naay siray say qil’aabandee ho gaee hai aur log un men aabaad hain.” ³⁶phir ird-gird kee jitnee qaumen bach gaee hongee vah jaan lengee ki main, rabb nay naay siray say vah kuchh taameer kiya hai jo pahelay dha diya gaya tha, main nay veeraan zameen men dubaara pauday lagaaay hain. yah mera, rabb ka farmaan hai, aur main yah karoonga bhee.

³⁷qaadir-ay-mutlaq farmaata hai ki ek baar phir main israaeelee qaum kee iltijaaen sun kar baashindon kee taadaad revad kee tarah badha doonga. ³⁸jis tarah maazee men eed kay din yarooshalam men har taraf qurbaanee kee bhed-bakriyaan nazar aatee theen usee tarah mulk kay shaheron men dubaara hujoom kay hujoom nazar aaengay. tab vah jaan lengay ki main hee rabb hoon’.”