Hizqeeel 33
hizqeeel israaeel ka paheredaar hai
1rabb mujh say hamkalaam hua, 2“ai aadamzaad, apnay hamvatanon ko yah paighaam pahuncha day,
‘jab kabhee main kisee mulk men jang chhedta hoon to us mulk kay baashinday apnay mardon men say ek ko chun kar apna paheredaar bana letay hain. 3paheredaar kee zimmaadaaree yah hai ki joon hee dushman nazar aaay toon hee narsinga baja kar logon ko aagaah karay. 4us vaqt jo narsingay kee aavaaz sun kar parva na karay vah khud zimmaadaar thaherega agar dushman us par hamla karkay usay qatl karay. 5yah us ka apna qusoor hoga, kyoonki us nay narsingay kee aavaaz sunnay kay baavujood parva na kee. lekin agar vah paheredaar kee khabar maan lay to apnee jaan ko bachaaega.
6ab farz karo ki paheredaar dushman ko dekhay lekin na narsinga bajaay, na logon ko aagaah karay. agar nateejay men koee qatl ho jaaay to vah apnay gunaahon kay baais hee mar jaaega. lekin main paheredaar ko us kee maut ka zimmaadaar thaheraaoonga.’
7ai aadamzaad, main nay tujhay israaeelee qaum kee paheraadaaree karnay kee zimmaadaaree dee hai. is liyay laazim hai ki jab bhee main kuchh farmaaoon to too meree sun kar israaeeliyon ko meree taraf say aagaah karay. 8agar main kisee bedeen ko bataana chaahoon, ‘too yaqeenan marega’ to laazim hai ki too usay yah suna kar us kee ghalat raah say aagaah karay. agar too aisa na karay to go bedeen apnay gunaahon kay baais hee marega taaham main tujhay hee us kee maut ka zimmaadaar thaheraaoonga. 9lekin agar too usay us kee ghalat raah say aagaah karay aur vah na maanay to vah apnay gunaahon kay baais marega, lekin too nay apnee jaan ko bachaaya hoga.
tauba karo!
10ai aadamzaad, israaeeliyon ko bata, tum aahen bhar bhar kar kahetay ho, ‘haay ham apnay jaraaim aur gunaahon kay baais gal sad kar tabaah ho rahay hain. ham kis tarah jeetay rahen?’ 11lekin rabb qaadir-ay-mutlaq farmaata hai, ‘meree hayaat kee qasam, main bedeen kee maut say khush naheen hota balki main chaahata hoon ki vah apnee ghalat raah say hat kar zinda rahay. chunaanchay tauba karo! apnee ghalat raahon ko tark karkay vaapas aao! ai israaeelee qaum, kya zaroorat hai ki too mar jaaay?’
12ai aadamzaad, apnay hamvatanon ko bata,
‘agar raastbaaz ghalat kaam karay to yah baat usay naheen bachaaegee ki pahelay raastbaaz tha. agar vah gunaah karay to usay zinda naheen chhoda jaaega. is kay muqaablay men agar bedeen apnee bedeenee say tauba karkay vaapas aaay to yah baat us kee tabaahee ka baais naheen banegee ki pahelay bedeen tha.’ 13ho sakta hai main raastbaaz ko bataaoon, ‘too zinda rahega.’ agar vah yah sun kar samajhnay lagay, ‘meree raastbaazee mujhay har soorat men bachaaegee’ aur nateejay men ghalat kaam karay to main us kay tamaam raast kaamon ka lihaaz naheen karoonga balki us kay ghalat kaam kay baais usay saza-ay-maut doonga. 14lekin farz karo main kisee bedeen aadmee ko bataaoon, ‘too yaqeenan marega.’ ho sakta hai vah yah sun kar apnay gunaah say tauba karkay insaaf aur raastbaazee karnay lagay. 15vah apnay qarzdaar ko vah kuchh vaapas karay jo zamaanat kay taur par mila tha, vah choree huee cheezen vaapas kar day, vah zindageebakhsh hidaayaat kay mutaabiq zindagee guzaaray, gharaz vah har buray kaam say gurez karay. is soorat men vah marega naheen balki zinda hee rahega. 16jo bhee gunaah us say sarzad huay thay vah main yaad naheen karoonga. choonki us nay baad men vah kuchh kiya jo munsifaana aur raast tha is liyay vah yaqeenan zinda rahega.
17teray hamvatan etiraaz kartay hain ki rabb ka sulook saheeh naheen hai jabki un ka apna sulook saheeh naheen hai. 18agar raastbaaz apna raast chaal-chalan chhod kar badee karnay lagay to usay saza-ay-maut dee jaaegee. 19is kay muqaablay men agar bedeen apna bedeen chaal-chalan chhod kar vah kuchh karnay lagay jo munsifaana aur raast hai to vah is bina par zinda rahega.
20ai israaeeliyo, tum daava kartay ho ki rabb ka sulook saheeh naheen hai. lekin aisa hargiz naheen hai! tumhaaree adaalat kartay vaqt main har ek kay chaal-chalan ka khayaal karoonga.”
yarooshalam par dushman kay qabzay kee khabar
21yahooyaakeen baadshaah kee jilaavatanee kay 12ven saal men ek aadmee meray paas aaya. 10ven maheenay ka paanchvaan din [a] 8 janvree. tha. yah aadmee yarooshalam say bhaag nikla tha. us nay kaha, “yarooshalam dushman kay qabzay men a gaya hai!”
22ek din pahelay rabb ka haath shaam kay vaqt mujh par aaya tha, aur aglay din jab yah aadmee subah kay vaqt pahuncha to rabb nay meray munh ko khol diya, aur main dubaara bol saka.
bachay huay israaeelee apnay aap par ghalat etimaad kartay hain
23rabb mujh say hamkalaam hua, 24“ai aadamzaad, mulk-ay-israaeel kay khandaraat men rahenay vaalay log kah rahay hain, ‘go ibraaheem sirf ek aadmee tha to bhee us nay pooray mulk par qabza kiya. us kee nisbat ham bahut hain, is liyay laazim hai ki hamen yah mulk haasil ho.’ 25unhen bata,
‘rabb qaadir-ay-mutlaq farmaata hai ki tum gosht khaatay ho jis men khoon hai, tumhaaray haan butparastee aur khoonrezee aam hai. to phir mulk kis tarah tumhen haasil ho sakta hai? 26tum apnee talvaar par bharosa rakh kar qaabil-ay-ghin harkaten kartay ho, hatta ki har ek apnay padosee kee beevee say zina karta hai. to phir mulk kis tarah tumhen haasil ho sakta hai?’
27unhen bata, ‘rabb qaadir-ay-mutlaq farmaata hai ki meree hayaat kee qasam, jo israaeel kay khandaraat men rahetay hain vah talvaar kee zad men a kar halaak ho jaaengay, jo bach kar khulay maidaan men ja basay hain unhen main darindon ko khila doonga, aur jinhon nay pahaadee qilaon aur ghaaron men panaah lee hai vah muhalak beemaariyon ka shikaar ho jaaengay. 28main mulk ko veeraan-o-sunsaan kar doonga. jis taaqat par vah fakhar kartay hain vah jaatee rahegee. israaeel ka pahaadee ilaaqa bhee itna tabaah ho jaaega ki log us men say guzarnay say gurez karengay. 29phir jab main mulk ko un kee makrooh harkaton kay baais veeraan-o-sunsaan kar doonga tab vah jaan lengay ki main hee rabb hoon.’
jilaavatan israaeeliyon kee beparvaaee
30ai aadamzaad, teray hamvatan apnay gharon kee deevaaron aur darvaazon kay paas khaday ho kar tera zikr kartay hain. vah kahetay hain, ‘aao, ham nabee kay paas ja kar vah paighaam sunen jo rabb kee taraf say aaya hai.’ 31lekin go in logon kay hujoom a kar teray paighaamaat sunnay kay liyay teray saamnay baith jaatay hain to bhee vah un par amal naheen kartay. kyoonki un kee zabaan par ishq kay hee geet hain. un hee par vah amal kartay hain, jabki un ka dil naarva nafa kay peechhay pada raheta hai. 32asal men vah teree baaten yoon suntay hain jis tarah kisee gulookaar kay geet jo mahaarat say saaz baja kar sureelee aavaaz say ishq kay geet gaaay . go vah teree baaten sun kar khush ho jaatay hain to bhee un par amal naheen kartay. 33lekin yaqeenan ek din aanay vaala hai jab vah jaan lengay ki hamaaray darmiyaan nabee raha hai.”