Hizqeeel 32
ajhdahay firaaun ko maara jaaegaa
1yahooyaakeen baadshaah kay 12ven saal men rabb mujh say hamkalaam hua. 12ven maheenay ka pahela din [a] 3 maarch. tha. mujhay yah paighaam mila, 2“ai aadamzaad, misr kay baadshaah firaaun par maatmee geet ga kar usay bata,
‘go aqvaam kay darmiyaan tujhay javaan sherbabar samjha jaata hai, lekin daraheqeeqat too darya-ay-neel kee shaakhon men rahenay vaala ajhdaha hai jo apnee nadiyon ko ubalnay deta aur paaon say paanee ko zor say harkat men la kar gadla kar deta hai.
3rabb qaadir-ay-mutlaq farmaata hai ki main mut’addid qaumon ko jama karkay teray paas bhejoonga taaki tujh par jaal daal kar tujhay paanee say khainch nikaalen. 4tab main tujhay zor say khushkee par patakh doonga, khulay maidaan par hee tujhay phaink chhodoonga. tamaam parinday tujh par baith jaaengay, tamaam janglee jaanvar tujhay kha kha kar ser ho jaaengay. 5tera gosht main pahaadon par phaink doonga, teree laash say vaadiyon ko bhar doonga. 6teray bahetay khoon say main zameen ko pahaadon tak seraab karoonga, ghaatiyaan tujh say bhar jaaengee.
7jis vaqt main teree zindagee kee battee bujha doonga us vaqt main aasmaan ko dhaamp doonga. sitaaray taareek ho jaaengay, sooraj baadlon men chhup jaaega aur chaand kee raushnee nazar naheen aaegee. 8jo kuchh bhee aasmaan par chamakta damakta hai usay main teray baais taareek kar doonga. teray pooray mulk par taareekee chha jaaegee. yah rabb qaadir-ay-mutlaq ka farmaan hai.
9bahut qaumon kay dil ghabra jaaengay jab main teray anjaam kee khabar deegar aqvaam tak pahunchaaoonga, aisay mamaalik tak jin say too naavaaqif hai. 10mut’addid qaumon kay saamnay hee main tujh par talvaar chala doonga. yah dekh kar un par dahshat taaree ho jaaegee, aur un kay baadshaahon kay rongtay khaday ho jaaengay. jis din too dhadaam say gir jaaega us din un par marnay ka itna khauf chha jaaega ki vah baar baar kaamp uthengay.
11kyoonki rabb qaadir-ay-mutlaq farmaata hai ki shaah-ay-baabal kee talvaar tujh par hamla karegee. 12teree shaandaar fauj us kay soormaaon kee talvaar say gir kar halaak ho jaaegee. duniya kay sab say zaalim aadmee misr ka gharoor aur us kee tamaam shaan-o-shaukat khaak men mila dengay. 13main vaafir paanee kay paas khaday us kay maveshee ko bhee barbaad karoonga. aainda yah paanee na insaan, na haivaan kay paaon say gadla hoga. 14rabb qaadir-ay-mutlaq farmaata hai ki us vaqt main honay doonga ki un ka paanee saaf-shaffaaf ho jaaay aur nadiyaan tel kee tarah bahenay lagen. 15main misr ko veeraan-o-sunsaan karkay har cheez say maheroom karoonga, main us kay tamaam baashindon ko maar daaloonga. tab vah jaan lengay ki main hee rabb hoon’.”
16rabb qaadir-ay-mutlaq farmaata hai, “laazim hai ki darj-ay-baala maatmee geet ko gaaya jaaay. deegar aqvaam usay gaaen, vah misr aur us kee shaan-o-shaukat par maatam ka yah geet zaroor gaaen.”
paataal men deegar aqvaam misr kay intizaar men hain
17yahooyaakeen baadshaah kay 12ven saal men rabb mujh say hamkalaam hua. maheenay ka 15vaan din tha. us nay farmaaya, 18“ai aadamzaad, misr kee shaan-o-shaukat par vaavaila kar. usay deegar azeem aqvaam kay saath paataal men utaar day. usay un kay paas pahuncha day jo pahelay gadhay men pahunch chukay hain. 19misr ko bata,
‘ab teree khoobsoortee kahaan gaee? ab too is men kis ka muqaabla kar sakta hai? utar ja! paataal men naamakhtoonon kay paas hee pada rah.’ 20kyoonki laazim hai ki misree maqtoolon kay beech men hee gir kar halaak ho jaaen. talvaar un par hamla karnay kay liyay khainchee ja chukee hai. ab misr ko us kee tamaam shaan-o-shaukat kay saath ghaseet kar paataal men lay jaao! 21tab paataal men baday soormay misr aur us kay madadgaaron ka istiqbaal karkay kahengay, ‘lo, ab yah bhee utar aaay hain, yah bhee yahaan paday naamakhtoonon aur maqtoolon men shaamil ho gaay hain.’
22vahaan asoor pahelay say apnee pooree fauj samet pada hai, aur us kay ird-gird talvaar kay maqtoolon kee qabren hain. 23asoor ko paataal kay sab say gaheray gadhay men qabren mil gaeen, aur ird-gird us kee fauj dafan huee hai. pahelay yah zindon kay mulk men chaaron taraf dahshat phailaatay thay, lekin ab khud talvaar say halaak ho gaay hain.
24vahaan ailaam bhee apnee tamaam shaan-o-shaukat samet pada hai. us kay ird-gird dafan huay faujee talvaar kee zad men a gaay thay. ab sab utar kar naamakhtoonon men shaamil ho gaay hain, go zindon kay mulk men log un say shadeed dahshat khaatay thay. ab vah bhee paataal men utray huay deegar logon kee tarah apnee rusvaaee bhugat rahay hain. 25ailaam ka bistar maqtoolon kay darmiyaan hee bichhaaya gaya hai, aur us kay ird-gird us kee tamaam shaandaar fauj ko qabren mil gaee hain. sab naamakhtoon, sab maqtool hain, go zindon kay mulk men log un say sakht dahshat khaatay thay. ab vah bhee paataal men utray huay deegar logon kee tarah apnee rusvaaee bhugat rahay hain. unhen maqtoolon kay darmiyaan hee jagah mil gaee hai.
26vahaan masak-toobal bhee apnee tamaam shaan-o-shaukat samet pada hai. us kay ird-gird dafan huay faujee talvaar kee zad men a gaay thay. ab sab naamakhtoonon men shaamil ho gaay hain, go zindon kay mulk men log un say shadeed dahshat khaatay thay. 27aur unhen un soormaaon kay paas jagah naheen milee jo qadeem zamaanay men naamakhtoonon kay darmiyaan faut ho kar apnay hathiyaaron kay saath paataal men utar aaay thay aur jin kay saron kay neechay talvaar rakhee gaee. un ka qusoor un kee haddiyon par pada raheta hai, go zindon kay mulk men log in jangajooon say dahshat khaatay thay.
28ai firaaun, too bhee paash paash ho kar naamakhtoonon aur maqtoolon kay darmiyaan pada rahega. 29adom pahelay say apnay baadshaahon aur raeeson samet vahaan pahunch chuka hoga. go vah pahelay itnay taaqatvar thay, lekin ab maqtoolon men shaamil hain, un naamakhtoonon men jo paataal men utar gaay hain. 30is tarah shimaal kay tamaam hukmaraan aur saida kay tamaam baashinday bhee vahaan a maujood hongay. vah bhee maqtoolon kay saath paataal men utar gaay hain. go un kee zabardast taaqat logon men dahshat phailaatee thee, lekin ab vah sharminda ho gaay hain, ab vah naamakhtoon haalat men maqtoolon kay saath paday hain. vah bhee paataal men utray huay baaqee logon kay saath apnee rusvaaee bhugat rahay hain.
31tab firaaun in sab ko dekh kar tasallee paaega, go us kee tamaam shaan-o-shaukat paataal men utar gaee hogee. rabb qaadir-ay-mutlaq farmaata hai ki firaaun aur us kee pooree fauj talvaar kee zad men a jaaengay.
32pahelay meree marzee thee ki firaaun zindon kay mulk men khauf-o-hiraas phailaaay, lekin ab usay us kee tamaam shaan-o-shaukat kay saath naamakhtoonon aur maqtoolon kay darmiyaan rakha jaaega. yah mera rabb qaadir-ay-mutlaq ka farmaan hai.”