Hizqeeel 31
misree darakht dhadaam say gir jaaegaa
1yahooyaakeen baadshaah kee jilaavatanee kay gyaaraven saal men rabb mujh say hamkalaam hua. teesray maheenay ka pahela din [a] 21 joon. tha. us nay farmaaya, 2“ai aadamzaad, misree baadshaah firaaun aur us kee shaan-o-shaukat say kah,
‘kaun tujh jaisa azeem tha? 3too sarv ka darakht, lubnaan ka deodaar ka darakht tha, jis kee khoobsoorat aur ghanee shaakhen jangal ko saaya detee theen. vah itna bada tha ki us kee chotee baadlon men ojhal thee. 4paanee kee kasrat nay usay itnee taraqqee dee, gaheray chashmon nay usay bada bana diya. us kee nadiyaan tanay kay chaaron taraf bahetee theen aur phir aagay ja kar khet kay baaqee tamaam darakhton ko bhee seraab kartee theen. 5chunaanchay vah deegar darakhton say kaheen ziyaada bada tha. us kee shaakhen badhtee aur us kee taheniyaan lambee hotee gaeen. vaafir paanee kay baais vah khoob phailta gaya. 6tamaam parinday apnay ghonslay us kee shaakhon men banaatay thay. us kee shaakhon kee aad men janglee jaanvaron kay bachchay paida hotay, us kay saay men tamaam azeem qaumen bastee theen. 7choonki darakht kee jadon ko paanee kee kasrat miltee thee is liyay us kee lambaaee aur shaakhen qaabil-ay-taareef aur khoobsoorat ban gaeen. 8baagh-ay-khuda kay deodaar kay darakht us kay baraabar naheen thay. na jooneepar kee taheniyaan, na chanaar kee shaakhen us kee shaakhon kay baraabar theen. baagh-ay-khuda men koee bhee darakht us kee khoobsoortee ka muqaabla naheen kar sakta tha. 9main nay khud usay mut’addid daaliyaan muhayya karkay khoobsoorat banaaya tha. allaah kay baagh-ay-adan kay tamaam deegar darakht us say rashak khaatay thay.
10lekin ab rabb qaadir-ay-mutlaq farmaata hai ki jab darakht itna bada ho gaya ki us kee chotee baadlon men ojhal ho gaee to vah apnay qad par fakhar karkay maghroor ho gaya.
11yah dekh kar main nay usay aqvaam kay sab say baday hukmaraan kay havaalay kar diya taaki vah us kee bedeenee kay mutaabiq us say nipat lay. main nay usay nikaal diya, 12to ajnabee aqvaam kay sab say zaalim logon nay usay tukday tukday karkay zameen par chhod diya. tab us kee shaakhen pahaadon par aur tamaam vaadiyon men gir gaeen, us kee taheniyaan toot kar mulk kee tamaam ghaatiyon men padee raheen. duniya kee tamaam aqvaam us kay saay men say nikal kar vahaan say chalee gaeen. 13tamaam parinday us kay katay huay tanay par baith gaay, tamaam janglee jaanvar us kee sookhee huee shaakhon par let gaay. 14yah is liyay hua ki aainda paanee kay kinaaray par laga koee bhee darakht itna bada na ho ki us kee chotee baadlon men ojhal ho jaaay aur nateejatan vah apnay aap ko doosron say bartar samjhay. kyoonki sab kay liyay maut aur zameen kee gaheraaiyaan muqarrar hain, sab ko paataal men utar kar murdon kay darmiyaan basna hai.
15rabb qaadir-ay-mutlaq farmaata hai ki jis vaqt yah darakht paataal men utar gaya us din main nay gaheraaiyon kay chashmon ko us par maatam karnay diya aur un kee nadiyon ko rok diya taaki paanee itnee kasrat say na bahay. us kee khaatir main nay lubnaan ko maatmee libaas pahenaaay. tab khulay maidaan kay tamaam darakht murjha gaay. 16vah itnay dhadaam say gir gaya jab main nay usay paataal men un kay paas utaar diya jo gadhay men utar chukay thay ki deegar aqvaam ko dhachka laga. lekin baagh-ay-adan kay baaqee tamaam darakhton ko tasallee milee. kyoonki go lubnaan kay in cheeda aur behtareen darakhton ko paanee kee kasrat miltee rahee thee taaham yah bhee paataal men utar gaay thay. 17go yah baday darakht kee taaqat rahay thay aur aqvaam kay darmiyaan rah kar us kay saay men apna ghar bana liya tha to bhee yah baday darakht kay saath vahaan utar gaay jahaan maqtool un kay intizaar men thay.
18ai misr, azmat aur shaan kay lihaaz say baagh-ay-adan ka kaun sa darakht tera muqaabla kar sakta hai? lekin tujhay baagh-ay-adan kay deegar darakhton kay saath zameen kee gaheraaiyon men utaara jaaega. vahaan too naamakhtoonon aur maqtoolon kay darmiyaan pada rahega. rabb qaadir-ay-mutlaq farmaata hai ki yahee firaaun aur us kee shaan-o-shaukat ka anjaam hoga’.”