Hizqeeel 30
misr kee taaqat khatm ho jaaegee
1rabb mujh say hamkalaam hua, 2“ai aadamzaad, nubuvvat karkay yah paighaam suna day,
‘rabb qaadir-ay-mutlaq farmaata hai ki aah-o-zaaree karo! us din par afsos 3jo aanay vaala hai. kyoonki rabb ka din qareeb hee hai. us din ghanay baadal chha jaaengay, aur main aqvaam kee adaalat karoonga. 4misr par talvaar naazil ho kar vahaan kay baashindon ko maar daalegee. mulk kee daulat chheen lee jaaegee, aur us kee bunyaadon ko dha diya jaaega. yah dekh kar ethopiya laraz uthega, 5kyoonki us kay log bhee talvaar kee zad men a jaaengay. kaee qaumon kay afraad misriyon kay saath halaak ho jaaengay. ethopiya kay, libiya kay, ludiya kay, misr men basnay vaalay tamaam ajnabee qaumon kay, koob kay aur meray ahd kee qaum israaeel kay log halaak ho jaaengay. 6rabb qaadir-ay-mutlaq farmaata hai ki misr ko sahaara denay vaalay sab gir jaaengay, aur jis taaqat par vah fakhar karta hai vah jaatee rahegee. shimaal men mijdaal say lay kar junoobee shaher asvaan tak unhen talvaar maar daalegee. yah rabb qaadir-ay-mutlaq ka farmaan hai. 7ird-gird kay deegar mamaalik kee tarah misr bhee veeraan-o-sunsaan hoga, ird-gird kay deegar shaheron kee tarah us kay shaher bhee malbay kay dher hongay. 8jab main misr men yoon aag laga kar us kay madadgaaron ko kuchal daaloonga to log jaan lengay ki main hee rabb hoon.
9ab tak ethopiya apnay aap ko mahfooz samajhta hai, lekin us din meree taraf say qaasid nikal kar us mulk kay baashindon ko aisee khabar pahunchaaengay jis say vah tharathra uthengay. kyoonki qaasid kashtiyon men baith kar darya-ay-neel kay zareeay un tak pahunchengay aur unhen ittila dengay ki misr tabaah ho gaya hai. yah sun kar vahaan kay log kaamp uthengay. yaqeen karo, yah din jald hee aanay vaala hai. 10rabb qaadir-ay-mutlaq farmaata hai ki shaah-ay-baabal nabookadnazzar kay zareeay main misr kee shaan-o-shaukat chheen loonga. 11usay fauj samet misr men laaya jaaega taaki usay tabaah karay. tab aqvaam men say sab say zaalim yah log apnee talvaaron ko chala kar mulk ko maqtoolon say bhar dengay. 12main darya-ay-neel kee shaakhon ko khushk karoonga aur misr ko farokht karkay shareer aadmiyon kay havaalay kar doonga. pardesiyon kay zareeay main mulk aur jo kuchh bhee us men hai tabaah kar doonga. yah mera, rabb ka farmaan hai.
13rabb qaadir-ay-mutlaq farmaata hai ki main misree buton ko barbaad karoonga aur memfis kay mujassmay hata doonga. misr men hukmaraan naheen rahega, aur main mulk par khauf taaree karoonga. 14meray hukm par junoobee misr barbaad aur zuan nazar-ay-aatish hoga. main theebas kee adaalat 15aur misree qilaay paloosiyam par apna ghazab naazil karoonga. haan, theebas kee shaan-o-shaukat nest-o-naabood ho jaaegee. 16main misr ko nazar-ay-aatish karoonga. tab paloosiyam dard-ay-zah men mubtala aurat kee tarah pech-o-taab khaaega, theebas dushman kay qabzay men aaega aur memfis musalsal museebat men phansa rahega. 17dushman kee talvaar heeliyopulis aur boobastis kay javaanon ko maar daalegee jabki bachee huee aurten ghulaam ban kar jilaavatan ho jaaengee. 18tahfanhees men din taareek ho jaaega jab main vahaan misr kay jooay ko tod doonga. vaheen us kee zabardast taaqat jaatee rahegee. ghana baadal shaher par chha jaaega, aur gird-o-navaah kee aabaadiyaan qaidee ban kar jilaavatan ho jaaengee. 19yoon main misr kee adaalat karoonga aur vah jaan lengay ki main hee rabb hoon’.”
20yahooyaakeen baadshaah kee jilaavatanee kay gyaaraven saal men rabb mujh say hamkalaam hua. pahelay maheenay ka saatvaan din [a] 29 aprail. tha. us nay farmaaya tha, 21“ai aadamzaad, main nay misree baadshaah firaaun ka baazoo tod daala hai. shifa paanay kay liyay laazim tha ki baazoo par pattee baandhee jaaay, ki tootee huee haddee kay saath khapachchee baandhee jaaay taaki baazoo mazboot ho kar talvaar chalaanay kay qaabil ho jaaay. lekin is qism ka ilaaj hua naheen.
22chunaanchay rabb qaadir-ay-mutlaq farmaata hai ki main misree baadshaah firaaun say nipat kar us kay donon baazooon ko tod daaloonga, sehatmand baazoo ko bhee aur tootay huay ko bhee. tab talvaar us kay haath say gir jaaegee 23aur main misriyon ko mukhtalif aqvaam-o-mamaalik men muntashir kar doonga.
24main shaah-ay-baabal kay baazooon ko taqviyat day kar usay apnee hee talvaar pakda doonga. lekin firaaun kay baazooon ko main tod daaloonga, aur vah shaah-ay-baabal kay saamnay marnay vaalay zakhmee aadmee kee tarah karaah uthega. 25shaah-ay-baabal kay baazooon ko main taqviyat doonga jabki firaaun kay baazoo behiss-o-harkat ho jaaengay. jis vaqt main apnee talvaar ko shaah-ay-baabal ko pakda doonga aur vah usay misr kay khilaaf chalaaega us vaqt log jaan lengay ki main hee rabb hoon. 26haan, jis vaqt main misriyon ko deegar aqvaam-o-mamaalik men muntashir kar doonga us vaqt vah jaan lengay ki main hee rabb hoon.”