Hizqeeel 3
1us nay farmaaya, “ai aadamzaad, jo kuchh tujhay diya ja raha hai usay kha lay! toomaar ko kha, phir ja kar israaeelee qaum say mukhaatib ho ja.” 2main nay apna munh khola to us nay mujhay toomaar khilaaya. 3saath saath us nay farmaaya, “aadamzaad, jo toomaar main tujhay khilaata hoon usay kha, pet bhar kar kha!” jab main nay usay khaaya to shahed kee tarah meetha laga.
4tab allaah mujh say hamkalaam hua, “ai aadamzaad, ab ja kar israaeelee gharaanay ko meray paighaamaat suna day. 5main tujhay aisee qaum kay paas naheen bhej raha jis kee ajnabee zabaan tujhay samajh na aaay balki tujhay israaeelee qaum kay paas bhej raha hoon. 6beshak aisee bahut see qaumen hain jin kee ajnabee zabaanen tujhay naheen aateen, lekin un kay paas main tujhay naheen bhej raha. agar main tujhay un hee kay paas bhejta to vah zaroor teree sunteen. 7lekin israaeelee gharaana teree sunnay kay liyay tayyaar naheen hoga, kyoonki vah meree sunnay kay liyay tayyaar hee naheen. kyoonki pooree qaum ka maatha sakht aur dil ada hua hai. 8lekin main nay tera chihara bhee un kay chiharay jaisa sakht kar diya, tera maatha bhee un kay maathay jaisa mazboot kar diya hai. 9too un ka muqaabla kar sakega, kyoonki main nay teray maathay ko heeray jaisa mazboot, chaqmaaq jaisa paaedaar kar diya hai. go yah qaum baaghee hai to bhee un say khauf na kha, na un kay sulook say dahshatzada ho.”
10allaah nay mazeed farmaaya, “ai aadamzaad, meree har baat par dhyaan day kar usay zahen men bitha. 11ab ravaana ho kar apnee qaum kay un afraad kay paas ja jo baabal men jilaavatan huay hain. unhen vah kuchh suna day jo rabb qaadir-ay-mutlaq unhen bataana chaahata hai, khwaah vah sunen ya na sunen.”
12phir allaah kay rooh nay mujhay vahaan say uthaaya. jab rabb ka jalaal apnee jagah say utha to main nay apnay peechhay ek gadgadaatee aavaaz sunee. 13fiza chaaron jaandaaron kay shor say goonj uthee jab un kay par ek doosray say lagnay aur un kay pahiay ghoomnay lagay. 14allaah ka rooh mujhay utha kar vahaan say lay gaya, aur main talkhamizaajee aur badee sargarmee say ravaana hua. kyoonki rabb ka haath zor say mujh par thahera hua tha. 15chaltay chaltay main darya-ay-kibaar kee aabaadee tal-abeeb men rahenay vaalay jilaavatanon kay paas pahunch gaya. main un kay darmiyaan baith gaya. saat din tak meree haalat gumsum rahee.
meree qaum ko aagaah kar!
16saat din kay baad rabb mujh say hamkalaam hua, 17“ai aadamzaad, main nay tujhay israaeelee qaum par paheredaar banaaya, is liyay jab bhee tujhay mujh say kalaam milay to unhen meree taraf say aagaah kar!
18main teray zareeay bedeen ko ittila doonga ki usay marna hee hai taaki vah apnee buree raah say hat kar bach jaaay. agar too usay yah paighaam na pahunchaaay, na usay tambeeh karay aur vah apnay qusoor kay baais mar jaaay to main tujhay hee us kee maut ka zimmaadaar thaheraaoonga. 19lekin agar vah teree tambeeh par apnee bedeenee aur buree raah say na hatay to yah alag baat hai. beshak vah marega, lekin too zimmaadaar naheen thaherega balki apnee jaan ko chhudaaega.
20jab raastbaaz apnee raastbaazee ko chhod kar buree raah par a jaaega to main tujhay usay aagaah karnay kee zimmaadaaree doonga. agar too yah karnay say baaz raha to too hee zimmaadaar thaherega jab main usay thokar khila kar maar daaloonga. us vaqt us kay raast kaam yaad naheen rahengay balki vah apnay gunaah kay sabab say marega. lekin too hee us kee maut ka zimmaadaar thaherega. 21lekin agar too usay tambeeh karay aur vah apnay gunaah say baaz aaay to vah meree tambeeh ko qabool karnay kay baais bachega, aur too bhee apnee jaan ko chhudaaega.”
22vaheen rabb ka haath dubaara mujh par a thahera. us nay farmaaya, “uth, yahaan say nikal kar vaadee kay khulay maidaan men chala ja! vahaan main tujh say hamkalaam hoonga.”
23main utha aur nikal kar vaadee kay khulay maidaan men chala gaya. jab pahuncha to kya dekhta hoon ki rabb ka jalaal vahaan yoon maujood hai jis tarah pahelee roya men darya-ay-kibaar kay kinaaray par tha. main munh kay bal gir gaya. 24tab allaah kay rooh nay a kar mujhay dubaara khada kiya aur farmaaya, “apnay ghar men ja kar apnay peechhay kundee laga. 25ai aadamzaad, log tujhay rassiyon men jakad kar band rakhengay taaki too nikal kar doosron men na phir sakay. 26main honay doonga ki teree zabaan taaloo say chipak jaaay aur too khaamosh rah kar unhen daant na sakay. kyoonki yah qaum sarkash hai. 27lekin jab bhee main tujh say hamkalaam hoonga to teray munh ko kholoonga. tab too mera kalaam suna kar kahega, ‘rabb qaadir-ay-mutlaq farmaata hai!’ tab jo sunnay kay liyay tayyaar ho vah sunay, aur jo tayyaar na ho vah na sunay. kyoonki yah qaum sarkash hai.