Hizqeeel 29
misr ko saza milegee
1yahooyaakeen baadshaah kee jilaavatanee kay dasven saal men rabb mujh say hamkalaam hua. dasven maheenay ka 11vaan din [a] 7 janvree. tha. rabb nay farmaaya, 2“ai aadamzaad, misr kay baadshaah firaaun kee taraf rukh karkay us kay aur tamaam misr kay khilaaf nubuvvat kar!
3usay bata, ‘rabb qaadir-ay-mutlaq farmaata hai ki ai shaah-ay-misr firaaun, main tujh say nipatnay ko hoon. beshak too ek bada ajhdaha hai jo darya-ay-neel kee mukhtalif shaakhon kay beech men leta hua kaheta hai ki yah darya mera hee hai, main nay khud usay banaaya.
4lekin main teray munh men kaantay daal kar tujhay darya say nikaal laaoonga. meray kahenay par teree nadiyon kee tamaam machhliyaan teray chhilkon kay saath lag kar teray saath pakdee jaaengee. 5main tujhay in tamaam machhliyon samet registaan men phaink chhodoonga. too khulay maidaan men gir kar pada rahega. na koee tujhay ikattha karega, na jama karega balki main tujhay darindon aur parindon ko khila doonga. 6tab misr kay tamaam baashinday jaan lengay ki main hee rabb hoon.
too israaeel kay liyay sarkanday kee kachchee chhadee saabit hua hai. 7jab unhon nay tujhay pakadnay kee koshish kee to too nay tukday tukday ho kar un kay kandhay ko zakhmee kar diya. jab unhon nay apna poora vazan tujh par daala to too toot gaya, aur un kee kamar daanvaandol ho gaee. 8is liyay rabb qaadir-ay-mutlaq farmaata hai ki main teray khilaaf talvaar bhejoonga jo mulk men say insaan-o-haivaan mita daalegee. 9mulk-ay-misr veeraan-o-sunsaan ho jaaega. tab vah jaan lengay ki main hee rabb hoon.
choonki too nay daava kiya, “darya-ay-neel mera hee hai, main nay khud usay banaaya” 10is liyay main tujh say aur teree nadiyon say nipat loonga. misr men har taraf khandaraat nazar aaengay. shimaal men mijdaal say lay kar junoobee shaher asvaan balki ethopiya kee sarhadd tak main misr ko veeraan-o-sunsaan kar doonga. 11na insaan aur na haivaan ka paaon us men say guzrega. chaalees saal tak us men koee naheen basega. 12ird-gird kay deegar tamaam mamaalik kee tarah main misr ko bhee ujaadoonga, ird-gird kay deegar tamaam shaheron kee tarah main misr kay shaher bhee malbay kay dher bana doonga. chaalees saal tak un kee yahee haalat rahegee. saath saath main misriyon ko mukhtalif aqvaam-o-mamaalik men muntashir kar doonga.
13lekin rabb qaadir-ay-mutlaq yah bhee farmaata hai ki chaalees saal kay baad main misriyon ko un mamaalik say nikaal kar jama karoonga jahaan main nay unhen muntashir kar diya tha. 14main misr ko bahaal karkay unhen vatan yaanee junoobee misr men vaapas laaoonga. vahaan vah ek ghair’ahem saltanat qaaim karenge 15jo baaqee mamaalik kee nisbat chhotee hogee. aainda vah deegar qaumon par apna rob naheen daalengay. main khud dhyaan doonga ki vah aainda itnay kamzor rahen ki deegar qaumon par hukoomat na kar saken. 16aainda israaeel na misr par bharosa karnay aur na us say lipat jaanay kee aazmaaish men padega. tab vah jaan lengay ki main hee rabb qaadir-ay-mutlaq hoon’.”
shaah-ay-baabal ko misr milegaa
17yahooyaakeen baadshaah kee jilaavatanee kay 27ven saal men rabb mujh say hamkalaam hua. pahelay maheenay ka pahela din [b] 26 aprail. tha. us nay farmaaya, 18“ai aadamzaad, jab shaah-ay-baabal nabookadnazzar nay soor ka muhaasara kiya to us kee fauj ko sakht mehanat karnee padee. har sar ganja hua, har kandhay kee jild chhil gaee. lekin na usay aur na us kee fauj ko mehanat ka munaasib ajr mila.
19is liyay rabb qaadir-ay-mutlaq farmaata hai ki main shaah-ay-baabal nabookadnazzar ko misr day doonga. us kee daulat ko vah utha kar lay jaaega. apnee fauj ko paisay denay kay liyay vah misr ko loot lega. 20choonki nabookadnazzar aur us kee fauj nay meray liyay khoob mehanat-mashaqqat kee is liyay main nay usay muaavazay kay taur par misr day diya hai. yah rabb qaadir-ay-mutlaq ka farmaan hai.
21jab yah kuchh pesh aaega to main israaeel ko naee taaqat doonga. ai hizqeeel, us vaqt main tera munh khol doonga, aur too dubaara un kay darmiyaan bolega. tab vah jaan lengay ki main hee rabb hoon.”