Hizqeeel 28
soor kay hukmaraan kay liyay paighaam
1rabb mujh say hamkalaam hua, 2“ai aadamzaad, soor kay hukmaraan ko bata,
‘rabb qaadir-ay-mutlaq farmaata hai ki too maghroor ho gaya hai. too kaheta hai ki main khuda hoon, main samundar kay darmiyaan hee apnay takht-ay-ilaahee par baitha hoon. lekin too khuda naheen balki insaan hai, go too apnay aap ko khuda sa samajhta hai. 3beshak too apnay aap ko daanyaal say kaheen ziyaada daanishmand samajh kar kaheta hai ki koee bhee bhed mujh say posheeda naheen raheta. 4aur yah haqeeqat bhee hai ki too nay apnee hikmat aur samajh say bahut daulat haasil kee hai, sonay aur chaandee say apnay khazaanon ko bhar diya hai. 5badee daanishmandee say too nay tijaarat kay zareeay apnee daulat badhaaee. lekin jitnee teree daulat badhtee gaee utna hee tera gharoor bhee badhta gaya.
6chunaanchay rabb qaadir-ay-mutlaq farmaata hai ki choonki too apnay aap ko khuda sa samajhta hai 7is liyay main sab say zaalim qaumon ko teray khilaaf bhejoonga jo apnee talvaaron ko teree khoobsoortee aur hikmat kay khilaaf khainch kar teree shaan-o-shaukat kee behuramtee karengee. 8vah tujhay paataal men utaarengee. samundar kay beech men hee tujhay maar daala jaaega. 9kya too us vaqt apnay qaatilon say kahega ki main khuda hoon? hargiz naheen! apnay qaatilon kay haath men hotay vaqt too khuda naheen balki insaan saabit hoga. 10too ajnabiyon kay haathon naamakhtoon kee see vafaat paaega. yah mera, rabb qaadir-ay-mutlaq ka farmaan hai’.”
11rabb mazeed mujh say hamkalaam hua, 12“ai aadamzaad, soor kay baadshaah par maatmee geet ga kar us say kah,
‘rabb qaadir-ay-mutlaq farmaata hai ki tujh par kaamiliyat ka thappa tha. too hikmat say bharpoor tha, tera husn kamaal ka tha. 13allaah kay baagh-ay-adan men rah kar too har qism kay javaahir say saja hua tha. laal [a] ya ek qism ka surkh aqeeq. yaad rahay ki choonki qadeem zamaanay kay aksar javaahiraat kay naam matrook hain ya un ka matlab badal gaya hai, is liyay un ka mukhtalif tarjuma ho sakta hai. , zabarjad [b] peridot , hajr-ul-qamar, [c] moonasatone pukhraaj [d] topas , aqeeq-ay-ahmar [e] charanelian aur yashab [f] jasper , sang-ay-laajvard [g] lapis lazuli , feeroza aur zumurrad sab tujhay aaraasta kartay thay. sab kuchh sonay kay kaam say mazeed khoobsoorat banaaya gaya tha. jis din tujhay khalaq kiya gaya usee din yah cheezen teray liyay tayyaar hueen.
14main nay tujhay allaah kay muqaddas pahaad par khada kiya tha. vahaan too karoobee farishtay kee haisiyat say apnay par phailaaay paheraadaaree karta tha, vahaan too jaltay huay pattharon kay darmiyaan hee ghoomta phirta raha.
15jis din tujhay khalaq kiya gaya tera chaal-chalan beilzaam tha, lekin ab tujh men naainsaafee paaee gaee hai. 16tijaarat men kaamyaabee kee vajah say too zulm-o-tashaddud say bhar gaya aur gunaah karnay laga.
yah dekh kar main nay tujhay allaah kay pahaad par say utaar diya. main nay tujhay jo paheraadaaree karnay vaala farishta tha tabaah karkay jaltay huay pattharon kay darmiyaan say nikaal diya. 17teree khoobsoortee teray liyay gharoor ka baais ban gaee, haan teree shaan-o-shaukat nay tujhay itna phula diya ki teree hikmat jaatee rahee. isee liyay main nay tujhay zameen par patakh kar deegar baadshaahon kay saamnay tamaasha bana diya. 18apnay beshumaar gunaahon aur beinsaaf tijaarat say too nay apnay muqaddas maqaamon kee behuramtee kee hai. javaab men main nay honay diya ki aag teray darmiyaan say nikal kar tujhay bhasm karay. main nay tujhay tamaasha dekhnay vaalay tamaam logon kay saamnay hee raakh kar diya. 19jitnee bhee qaumain tujhay jaantee theen un kay rongtay khaday ho gaay. tera haulnaak anjaam achaanak hee a gaya hai. ab say too kabhee naheen uthega’.”
saida ko saza dee jaaegee
20rabb mujh say hamkalaam hua, 21“ai aadamzaad, saida kee taraf rukh karkay us kay khilaaf nubuvvat kar! 22rabb qaadir-ay-mutlaq farmaata hai ki ai saida, main tujh say nipat loonga. teray darmiyaan hee main apna jalaal dikhaaoonga. tab vah jaan lengay ki main hee rabb hoon, kyoonki main shaher kee adaalat karkay apna muqaddas kirdaar un par zaahir karoonga. 23main us men muhalak vaba phaila kar us kee galiyon men khoon baha doonga. usay chaaron taraf say talvaar gher legee to us men phansay huay log halaak ho jaaengay. tab vah jaan lengay ki main hee rabb hoon.
israaeel kee bahaalee
24is vaqt israaeel kay padosee usay haqeer jaantay hain. ab tak vah usay chubhnay vaalay khaar aur zakhmee karnay vaalay kaantay hain. lekin aainda aisa naheen hoga. tab vah jaan lengay ki main rabb qaadir-ay-mutlaq hoon. 25kyoonki rabb qaadir-ay-mutlaq farmaata hai ki deegar aqvaam kay dekhtay dekhtay main zaahir karoonga ki main muqaddas hoon. kyoonki main israaeeliyon ko un aqvaam men say nikaal kar jama karoonga jahaan main nay unhen muntashir kar diya tha. tab vah apnay vatan men ja basengay, us mulk men jo main nay apnay khaadim yaaqoob ko diya tha. 26vah hifaazat say us men rah kar ghar taameer karengay aur angoor kay baagh lagaaengay. lekin jo padosee unhen haqeer jaantay thay un kee main adaalat karoonga. tab vah jaan lengay ki main rabb un ka khuda hoon.”