Hizqeeel 27
soor kay anjaam par maatmee geet
1rabb mujh say hamkalaam hua, 2“ai aadamzaad, soor betee par maatmee geet ga, 3us shaher par jo samundar kee guzargaah par vaaqay hai aur mut’addid saahilee qaumon say tijaarat karta hai. us say kah,
‘rabb farmaata hai ki ai soor betee, too apnay aap par bahut fakhar karkay kahetee hai ki vaah, mera husn kamaal ka hai. 4aur vaaqaee, tera ilaaqa samundar kay beech men hee hai, aur jinhon nay tujhay taameer kiya unhon nay teray husn ko takmeel tak pahunchaaya, 5tujhay shaandaar baheree jahaaz kee maanind banaaya. teray takhtay saneer men ugnay vaalay jooneepar kay darakhton say banaaay gaay, tera mastool lubnaan ka deodaar ka darakht tha. 6teray chappoo basan kay baloot kay darakhton say banaaay gaay, jabki teray farsh kay liyay qubrus say sarv kee lakdee laaee gaee, phir usay haatheedaant say aaraasta kiya gaya. 7nafees kataan ka tera rangdaar baadbaan misr ka tha. vah tera imtiyaazee nishaan ban gaya. teray tarpaalon ka qirmizee aur arghvaanee rang ileesa kay saahilee ilaaqay say laaya gaya.
8saida aur arvad kay mard teray chappoo maartay thay, soor kay apnay hee daana teray mallaah thay. 9jabal [a] Biblos kay buzurg aur daanishmand aadmee dhyaan detay thay ki teree darzen band rahen. tamaam baheree jahaaz apnay mallaahon samet teray paas aaya kartay thay taaki teray saath tijaarat karen. 10faars, ludiya aur libiya kay afraad teree fauj men khidmat kartay thay. teree deevaaron say latkee un kee dhaalon aur khodon nay teree shaan mazeed badha dee. 11arvad aur khalak [b] ghaaliban Cilichia. kay aadmee teree faseel ka difa kartay thay, jammaad kay faujee teray burjon men paheraadaaree kartay thay. teree deevaaron say latkee huee un kee dhaalon nay teray husn ko kamaal tak pahuncha diya.
12too ameer thee, tujh men maal-o-asbaab kee kasrat kee tijaarat kee jaatee thee. is liyay tarsees tujhay chaandee, loha, teen aur seesa day kar tujh say sauda karta tha. 13yoonaan, toobal aur masak tujh say tijaarat kartay, tera maal khareed kar muaavazay men ghulaam aur peetal ka saamaan detay thay. 14bait-tujarma kay taajir teray maal kay liyay tujhay aam ghoday, faujee ghoday aur khachchar pahunchaatay thay. 15dadaan kay aadmee teray saath tijaarat kartay thay, haan mut’addid saahilee ilaaqay teray gaahak thay. un kay saath saudaabaazee karkay tujhay haatheedaant aur aabnoos kee lakdee miltee thee. 16shaam teree paidaavaar kee kasrat kee vajah say teray saath tijaarat karta tha. muaavazay men tujhay feeroza, arghvaanee rang, rangdaar kapday, baareek kataan, moonga aur yaaqoot milta tha. 17yahoodaah aur israaeel teray gaahak thay. tera maal khareed kar vah tujhay minneet ka gandum, pannag kee tikkiyaan, shahed, zaitoon ka tel aur balsaan detay thay. 18damishq teree vaafir paidaavaar aur maal kee kasrat kee vajah say teray saath kaarobaar karta tha. us say tujhay halboon kee mai aur saahar kee oon miltee thee. 19vidaan aur yoonaan teray gaahak thay. vah oozaal ka dhaala hua loha, daarcheenee aur kalmas ka masaala pahunchaatay thay. 20dadaan say tijaarat karnay say tujhay zeenposh miltee thee. 21arab aur qeedaar kay tamaam hukmaraan teray gaahak thay. teray maal kay ivz vah bhed kay bachchay, mendhay aur bakray detay thay. 22saba aur raama kay taajir tera maal haasil karnay kay liyay tujhay behtareen balsaan, har qism kay javaahir aur sona detay thay. 23haaraan, kanna, adan, saba, asoor aur kul maadee sab teray saath tijaarat kartay thay. 24vah teray paas a kar tujhay shaandaar libaas, qirmizee rang kee chaadren, rangdaar kapday aur kambal, neez mazboot rassay pesh kartay thay. 25tarsees kay umda jahaaz tera maal mukhtalif mamaalik men pahunchaatay thay. yoon too jahaaz kee maanind samundar kay beech men rah kar daulat aur shaan say maalaamaal ho gaee. 26teray chappoo chalaanay vaalay tujhay door door tak pahunchaatay hain.
lekin vah vaqt qareeb hai jab mashriq say tez aandhee a kar tujhay samundar kay darmiyaan hee tukday tukday kar degee. 27jis din too gir jaaegee us din teree tamaam milkiyat samundar kay beech men hee doob jaaegee. teree daulat, tera sauda, teray mallaah, teray baheree musaafir, teree darzen band rakhnay vaalay, teray taajir, teray tamaam faujee aur baaqee jitnay bhee tujh par savaar hain sab kay sab gharq ho jaaengay. 28teray mallaahon kee cheekhtee chillaatee aavaazen sun kar saahilee ilaaqay kaamp uthengay. 29tamaam chappoo chalaanay vaalay, mallaah aur baheree musaafir apnay jahaazon say utar kar saahil par khaday ho jaaengay. 30vah zor say ro padengay, badee talkhee say girya-o-zaaree karengay. apnay saron par khaak daal kar vah raakh men lot-pot ho jaaengay. 31teree hee vajah say vah apnay saron ko mundva kar taat ka libaas odh lengay, vah badee bechainee aur talkhee say tujh par maatam karengay. 32tab vah zaar-o-qataar ro kar maatam ka geet gaaengay,
“haay, kaun samundar say ghiray huay soor kee tarah khaamosh ho gaya hai?”
33jab tijaarat ka maal samundar kee chaaron taraf say tujh tak pahunchta tha to too mut’addid qaumon ko ser kartee thee. duniya kay baadshaah teree daulat aur tijaartee saamaan kee kasrat say ameer huay.
34afsos! ab too paash paash ho kar samundar kee gaheraaiyon men ghaaib ho gaee hai. tera maal aur teray tamaam afraad teray saath doob gaay hain.
35saahilee ilaaqon men basnay vaalay ghabra gaay hain. un kay baadshaahon kay rongtay khaday ho gaay, un kay chiharay pareshaan nazar aatay hain.
36deegar aqvaam kay taajir tujhay dekh kar “tauba tauba” kahetay hain. tera haulnaak anjaam achaanak hee a gaya hai. ab say too kabhee naheen uthegee’.”