Hizqeeel 26

soor ka satyaanaas

¹yahooyaakeen baadshaah kee jilaavatanee kay 11ven saal men rabb mujh say hamkalaam hua. maheenay ka pahela din tha. ²“ai aadamzaad, soor betee yarooshalam kee tabaahee dekh kar khush huee hai. vah kahetee hai, ‘lo, aqvaam ka darvaaza toot gaya hai! ab main hee is kee zimmaadaariyaan nibhaaoongee. ab jab yarooshalam veeraan hai to main hee farogh paaoongee.’

³javaab men rabb qaadir-ay-mutlaq farmaata hai ki ai soor, main tujh say nipat loonga! main mut’addid qaumon ko teray khilaaf bhejoonga. samundar kee zabardast maujon kee tarah vah tujh par toot padengee. ⁴vah soor shaher kee faseel ko dha kar us kay burjon ko khaak men mila dengee. tab main usay itnay zor say jhaad doonga ki mittee tak naheen rahegee. khaalee chataan hee nazar aaegee. ⁵rabb qaadir-ay-mutlaq farmaata hai ki vah samundar kay darmiyaan aisee jagah rahegee jahaan machheray apnay jaalon ko sukhaanay kay liyay bichha dengay. deegar aqvaam usay loot lengee, ⁶aur khushkee par us kee aabaadiyaan talvaar kee zad men a jaaengee. tab vah jaan lengay ki main hee rabb hoon.

⁷kyoonki rabb qaadir-ay-mutlaq farmaata hai ki main baabal kay baadshaah nabookadnazzar ko teray khilaaf bhejoonga jo ghoday, rath, ghudsavaar aur badee fauj lay kar shimaal say tujh par hamla karega. ⁸khushkee par teree aabaadiyon ko vah talvaar say tabaah karega, phir pushtay aur burjon say tujhay gher lega. us kay faujee apnee dhaalen utha kar tujh par hamla karengay. ⁹baadshaah apnee qil’aashikan masheenon say teree faseel ko dha dega aur apnay aalaat say teray burjon ko gira dega. ¹⁰jab us kay beshumaar ghoday chal padengay to itnee gard ud jaaegee ki too us men doob jaaegee. jab baadshaah teree faseel ko tod tod kar teray darvaazon men daakhil hoga to teree deevaaren ghodon aur rathon kay shor say laraz uthengee. ¹¹us kay ghodon kay khur teree tamaam galiyon ko kuchal dengay, aur teray baashinday talvaar say mar jaaengay, teray mazboot satoon zameenabos ho jaaengay. ¹²dushman teree daulat chheen lengay aur teree tijaarat ka maal loot lengay. vah teree deevaaron ko gira kar teree shaandaar imaaraton ko mismaar karengay, phir teray patthar, lakdee aur malba samundar men phaink dengay. ¹³main teray geeton ka shor band karoonga. aainda teray sarodon kee aavaaz sunaaee naheen degee. ¹⁴main tujhay nangee chataan men tabdeel karoonga, aur machheray tujhay apnay jaal bichha kar sukhaanay kay liyay istemaal karengay. aainda tujhay kabhee dubaara taameer naheen kiya jaaega. yah rabb qaadir-ay-mutlaq ka farmaan hai.

¹⁵rabb qaadir-ay-mutlaq farmaata hai ki ai soor betee, saahilee ilaaqay kaamp uthengay jab too dhadaam say gir jaaegee, jab har taraf zakhmee logon kee karaahatee aavaazen sunaaee dengee, har galee men qatl-o-ghaarat ka shor machega. ¹⁶tab saahilee ilaaqon kay tamaam hukmaraan apnay takhton say utar kar apnay choghay aur shaandaar libaas utaarengay. vah maatmee kapday pahen kar zameen par baith jaaengay aur baar baar laraz uthengay, yahaan tak vah teray anjaam par pareshaan hongay. ¹⁷tab vah tujh par maatam karkay geet gaaengay,

‘haay, too kitnay dhadaam say gir kar tabaah huee hai! ai saahilee shaher, ai soor betee, pahelay too apnay baashindon samet samundar kay darmiyaan rah kar kitnee mashhoor aur taaqatvar thee. gird-o-navaah kay tamaam baashinday tujh say dahshat khaatay thay. ¹⁸ab saahilee ilaaqay teray anjaam ko dekh kar tharathra rahay hain. samundar kay jazeeray teray khaatmay kee khabar sun kar dahshatzada ho gaay hain.’

¹⁹rabb qaadir-ay-mutlaq farmaata hai ki ai soor betee, main tujhay veeraan-o-sunsaan karoonga. too un deegar shaheron kee maanind ban jaaegee jo nest-o-naabood ho gaay hain. main tujh par sailaab laaoonga, aur gahera paanee tujhay dhaamp dega. ²⁰main tujhay paataal men utarnay doonga, aur too us qaum kay paas pahunchegee jo qadeem zamaanay say hee vahaan bastee hai. tab tujhay zameen kee gaheraaiyon men rahena padega, vahaan jahaan qadeem zamaanon kay khandaraat hain. too murdon kay mulk men rahegee aur kabhee zindagee kay mulk men vaapas naheen aaegee, na vahaan apna maqaam dubaara haasil karegee. ²¹main honay doonga ki tera anjaam dahshatanaak hoga, aur too saraasar tabaah ho jaaegee. log tera khoj lagaaengay lekin tujhay kabhee naheen paaengay. yah rabb qaadir-ay-mutlaq ka farmaan hai.”