Hizqeeel 25

ammoniyon ka mulk un say chheen liya jaaegaa

¹rabb mujh say hamkalaam hua, ²“ai aadamzaad, ammoniyon kay mulk kee taraf rukh karkay un kay khilaaf nubuvvat kar. ³unhen bata,

‘suno rabb qaadir-ay-mutlaq ka kalaam! vah farmaata hai ki ai ammon betee, too nay khush ho kar qahqaha lagaaya jab meray maqdis kee behuramtee huee, mulk-ay-israaeel tabaah hua aur yahoodaah kay baashinday jilaavatan huay. ⁴is liyay main tujhay mashriqee qabeelon kay havaalay karoonga jo apnay deray tujh men laga kar pooree bastiyaan qaaim karengay. vah tera hee phal khaaengay, tera hee doodh piengay. ⁵rabba shaher ko main oonton kee charaagaah men badal doonga aur mulk-ay-ammon ko bhed-bakriyon kee aaraamgaah bana doonga. tab tum jaan logay ki main hee rabb hoon.

⁶kyoonki rabb qaadir-ay-mutlaq farmaata hai ki too nay taaliyaan baja baja kar aur paaon zameen par maar maar kar israaeel kay anjaam par apnee dilee khushee ka izhaar kiya. teree israaeel kay liyay hiqaarat saaf taur par nazar aaee. ⁷is liyay main apna haath teray khilaaf badha kar tujhay deegar aqvaam kay havaalay kar doonga taaki vah tujhay loot len. main tujhay yoon mita doonga ki aqvaam-o-mamaalik men tera naam-o-nishaan tak naheen rahega. tab too jaan legee ki main hee rabb hoon’.”

moaab kay shaher tabaah ho jaaenge

⁸“rabb qaadir-ay-mutlaq farmaata hai ki moaab aur saeer israaeel ka mazaaq uda kar kahetay hain, ‘lo, dekho yahoodaah kay gharaanay ka haal! ab vah bhee baaqee qaumon kee tarah ban gaya hai.’ ⁹is liyay main moaab kee pahaadee dhalaanon ko un kay shaheron say maheroom karoonga. mulk kay ek siray say doosray siray tak ek bhee aabaadee naheen rahegee. go moaabee apnay shaheron bait-yaseemot, baal-maoon aur qiryataaim par khaas fakhar kartay hain, lekin vah bhee zameenabos ho jaaengay. ¹⁰ammon kee tarah main moaab ko bhee mashriqee qabeelon kay havaalay karoonga. aakhirkaar aqvaam men ammoniyon kee yaad tak naheen rahegee, ¹¹aur moaab ko bhee mujh say munaasib saza milegee. tab vah jaan lengay ki main hee rabb hoon.”

allaah adomiyon say intiqaam legaa

¹²“rabb qaadir-ay-mutlaq farmaata hai ki yahoodaah say intiqaam lenay say adom nay sangeen gunaah kiya hai. ¹³is liyay main apna haath adom kay khilaaf badha kar us kay insaan-o-haivaan ko maar daaloonga, aur vah talvaar say maaray jaaengay. temaan say lay kar dadaan tak yah mulk veeraan-o-sunsaan ho jaaega. yah rabb qaadir-ay-mutlaq ka farmaan hai. ¹⁴rabb qaadir-ay-mutlaq farmaata hai ki apnee qaum kay haathon main adom say badla loonga, aur israaeel meray ghazab aur qaher kay mutaabiq hee adom say nipat lega. tab vah mera intiqaam jaan lengay.”

filistiyon ka khaatmaa

¹⁵“rabb qaadir-ay-mutlaq farmaata hai ki filistiyon nay baday zulm kay saath yahoodaah say badla liya hai. unhon nay us par apnee dilee hiqaarat aur daaimee dushmanee ka izhaar kiya aur intiqaam lay kar usay tabaah karnay kee koshish kee. ¹⁶is liyay rabb qaadir-ay-mutlaq farmaata hai ki main apna haath filistiyon kay khilaaf badhaanay ko hoon. main in karetiyon aur saahilee ilaaqay kay bachay huon ko mita doonga. ¹⁷main apna ghazab un par naazil karkay sakhtee say un say badla loonga. tab vah jaan lengay ki main hee rabb hoon.”