Hizqeeel 24
yarooshalam aag par zang’aalooda deg hai
1yahooyaakeen baadshaah kee jilaavatanee kay navven saal men rabb ka kalaam mujh par naazil hua. dasven maheenay ka dasvaan din [a] 15 janvree. tha. paighaam yah tha, 2“ai aadamzaad, isee din kee taareekh likh lay, kyoonki isee din shaah-ay-baabal yarooshalam ka muhaasara karnay laga hai. 3phir is sarkash qaum israaeel ko tamseel pesh karkay bata,
‘rabb qaadir-ay-mutlaq farmaata hai ki aag par deg rakh kar us men paanee daal day. 4phir usay behtareen gosht say bhar day. raan aur shaanay kay tukday, neez behtareen haddiyaan us men daal day. 5sirf behtareen bhedon ka gosht istemaal kar. dhyaan day ki deg kay neechay aag zor say bhadaktee rahay. gosht ko haddiyon samet khoob paknay day.
6rabb qaadir-ay-mutlaq farmaata hai ki yarooshalam par afsos jis men itna khoon bahaaya gaya hai! yah shaher deg hai jis men zang laga hai, aisa zang jo utarta naheen. ab gosht kay tukdon ko yakay baad deegray deg say nikaal day. unhen kisee tarteeb say mat nikaalna balki qur’a daalay baghair nikaal day.
7jo khoon yarooshalam nay bahaaya vah ab tak us men maujood hai. kyoonki vah mittee par na gira jo usay jazab kar saktee balki nangee chataan par. 8main nay khud yah khoon nangee chataan par bahenay diya taaki vah chhup na jaaay balki mera ghazab yarooshalam par naazil ho jaaay aur main badla loon.
9rabb qaadir-ay-mutlaq farmaata hai ki yarooshalam par afsos jis nay itna khoon bahaaya hai! main bhee teray neechay lakdee ka bada dher lagaaoonga. 10a, lakdee ka bada dher karkay aag laga day. gosht ko khoob paka, phir shorba nikaal kar haddiyon ko bhasm honay day. 11is kay baad khaalee deg ko jaltay koilon par rakh day taaki peetal garm ho kar tamtamaanay lagay aur deg men mail pighal jaaay, us ka zang utar jaaay.
12lekin befaaida! itna zang laga hai ki vah aag men bhee naheen utarta.
13ai yarooshalam, apnee behaya harkaton say too nay apnay aap ko naapaak kar diya hai. agarchi main khud tujhay paak-saaf karna chaahata tha to bhee too paak-saaf na huee. ab too us vaqt tak paak naheen hogee jab tak main apna poora ghussa tujh par utaar na loon. 14meray rabb ka yah farmaan poora honay vaala hai, aur main dhyaan say usay amal men laaoonga. na main tujh par taras khaaoonga, na rahem karoonga. main teray chaal-chalan aur aamaal kay mutaabiq teree adaalat karoonga.’ yah rabb qaadir-ay-mutlaq ka farmaan hai.”
beevee kee vafaat par hizqeeel maatam na kare
15rabb mujh say hamkalaam hua, 16“ai aadamzaad, main tujh say achaanak teree aankh ka taara chheen loonga. lekin laazim hai ki too na aah-o-zaaree karay, na aansoo bahaaay. 17beshak chupkay say karaahata rah, lekin apnee azeeza kay liyay alaaniya maatam na kar. na sar say pagdee utaar aur na paaon say jootay. na daadhee ko dhaampna, na janaazay ka khaana kha.”
18subah ko main nay qaum ko yah paighaam sunaaya, aur shaam ko meree beevee intiqaal kar gaee. aglee subah main nay vah kuchh kiya jo rabb nay mujhay karnay ko kaha tha. 19yah dekh kar logon nay mujh say poochha, “aap kay ravayyay ka hamaaray saath kya taalluq hai? zara hamen bataaen.”
20main nay javaab diya, “rabb nay mujhe 21aap israaeeliyon ko yah paighaam sunaanay ko kaha, ‘rabb qaadir-ay-mutlaq farmaata hai ki mera ghar tumhaaray nazdeek panaahgaah hai jis par tum fakhar kartay ho. lekin yah maqdis jo tumhaaree aankh ka taara aur jaan ka piyaara hai tabaah honay vaala hai. main us kee behuramtee karnay ko hoon. aur tumhaaray jitnay betay-betiyaan yarooshalam men peechhay rah gaay thay vah sab talvaar kee zad men a kar mar jaaengay. 22tab tum vah kuchh karogay jo hizqeeel is vaqt kar raha hai. na tum apnee daadhiyon ko dhaampogay, na janaazay ka khaana khaaogay. 23na tum sar say pagdee, na paaon say jootay utaarogay. tumhaaray haan na maatam ka shor, na ronay kee aavaaz sunaaee degee balki tum apnay gunaahon kay sabab say zaaay hotay jaaogay. tum chupkay say ek doosray kay saath baith kar karaahatay rahogay. 24hizqeeel tumhaaray liyay nishaan hai. jo kuchh vah is vaqt kar raha hai vah tum bhee karogay. tab tum jaan logay ki main rabb qaadir-ay-mutlaq hoon’.”
25rabb mazeed mujh say hamkalaam hua, “ai aadamzaad, yah ghar israaeeliyon kay nazdeek panaahgaah hai jis kay baaray men vah khaas khushee mahsoos kartay hain, jis par vah fakhar kartay hain. lekin main yah maqdis jo un kee aankh ka taara aur jaan ka piyaara hai un say chheen loonga aur saath saath un kay betay-betiyon ko bhee. jis din yah pesh aaegaa 26us din ek aadmee bach kar tujhay is kee khabar pahunchaaega. 27usee vaqt too dubaara bol sakega. too goonga naheen rahega balki us say baaten karnay lagega. yoon too israaeeliyon kay liyay nishaan hoga. tab vah jaan lengay ki main hee rabb hoon.”