Hizqeeel 23

behaya bahenen ahola aur aholeebaa

¹rabb mujh say hamkalaam hua, ²“ai aadamzaad, do aurton kee kahaanee sun lay. donon ek hee maan kee betiyaan theen. ³vah abhee javaan hee theen jab misr men kasbee ban gaeen. vaheen mard donon kunvaariyon kee chhaatiyaan sahela kar apna dil bahelaatay thay. ⁴badee ka naam ahola aur chhotee ka naam aholeeba tha. ahola saamriya aur aholeeba yarooshalam hai. main donon ka maalik ban gaya, aur donon kay betay-betiyaan paida huay.

⁵go main ahola ka maalik tha to bhee vah zina karnay lagee. shahevat say bhar kar vah jangjoo asooriyon kay peechhay pad gaee, aur yahee us kay aashiq ban gaay. ⁶shaandaar kapdon say mulabbas yah gavarnar aur faujee afsar usay baday piyaaray lagay. sab khoobsoorat javaan aur achchhay ghudsavaar thay. ⁷asoor kay cheeda cheeda beton say us nay zina kiya. jis kee bhee usay shahevat thee us say aur us kay buton say vah naapaak huee. ⁸lekin us nay javaanee men misriyon kay saath jo zinaakaaree shuroo huee vah bhee na chhodee. vahee log thay jo us kay saath us vaqt hambistar huay thay jab vah abhee kunvaaree thee, jinhon nay us kee chhaatiyaan sahela kar apnee gandee khwaahishaat us say pooree kee theen.

⁹yah dekh kar main nay usay us kay asooree aashiqon kay havaalay kar diya, un hee kay havaalay jin kee shadeed shahevat usay thee. ¹⁰un hee say ahola kee adaalat huee. unhon nay us kay kapday utaar kar usay barahena kar diya aur us kay betay-betiyon ko us say chheen liya. usay khud unhon nay talvaar say maar daala. yoon vah deegar aurton kay liyay ibrat’angez misaal ban gaee.

¹¹go us kee bahen aholeeba nay yah sab kuchh dekha to bhee vah shahevat aur zinaakaaree kay lihaaz say apnee bahen say kaheen ziyaada aagay badhee. ¹²vah bhee shahevat kay maaray asooriyon kay peechhay pad gaee. yah khoobsoorat javaan sab usay piyaaray thay, khwaah asooree gavarnar ya afsar, khwaah shaandaar kapdon say mulabbas faujee ya achchhay ghudsavaar thay. ¹³main nay dekha ki us nay bhee apnay aap ko naapaak kar diya. is men donon betiyaan ek jaisee theen.

¹⁴lekin aholeeba kee zinaakaaraana harkaten kaheen ziyaada buree theen. ek din us nay deevaar par baabal kay mardon kee tasveer dekhee. tasveer laal rang say khainchee huee thee. ¹⁵mardon kee kamar men patka aur sar par pagdee bandhee huee thee. vah baabal kay un afsaron kee maanind lagtay thay jo rathon par savaar ladtay hain. ¹⁶mardon kee tasveer dekhtay hee aholeeba kay dil men un kay liyay shadeed aarzoo paida huee. chunaanchay us nay apnay qaasidon ko baabal bhej kar unhen aanay kee daavat dee. ¹⁷tab baabal kay mard us kay paas aaay aur us say hambistar huay. apnee zinaakaaree say unhon nay usay naapaak kar diya. lekin un say naapaak honay kay baad us nay tang a kar apna munh un say pher liya.

¹⁸jab us nay khulay taur par un say zina karkay apnee barahenagee sab par zaahir kee to main nay tang a kar apna munh us say pher liya, bilkul usee tarah jis tarah main nay apna munh us kee bahen say bhee pher liya tha. ¹⁹lekin yah bhee us kay liyay kaafee na tha balki us nay apnee zinaakaaree men mazeed izaafa kiya. usay javaanee kay din yaad aaay jab vah misr men kasbee thee. ²⁰vah shahevat kay maaray pahelay aashiqon kee aarzoo karnay lagee, un say jo gadhon aur ghodon kee see jinsee taaqat rakhtay thay. ²¹kyoonki too apnee javaanee kee zinaakaaree duharaanay kee mutmannee thee. too ek baar phir un say hambistar hona chaahatee thee jo misr men teree chhaatiyaan sahela kar apna dil bahelaatay thay.

²²chunaanchay rabb qaadir-ay-mutlaq farmaata hai, ‘ai aholeeba, main teray aashiqon ko teray khilaaf khada karoonga. jin say too nay tang a kar apna munh pher liya tha unhen main chaaron taraf say teray khilaaf laaoonga. ²³baabal, kasdiyon, fiqod, shoa aur qoa kay faujee mil kar tujh par toot padengay. ghudsavaar asooree bhee un men shaamil hongay, aisay khoobsoorat javaan jo sab gavarnar, afsar, rathasvaar faujee aur oonchay tabqay kay afraad hongay. ²⁴shimaal say vah rathon aur mukhtalif qaumon kay mut’addid faujiyon samet tujh par hamla karengay. vah tujhay yoon gher lengay ki har taraf chhotee aur badee dhaalen, har taraf khod nazar aaengay. main tujhay un kay havaalay kar doonga taaki vah tujhay saza day kar apnay qavaaneen kay mutaabiq teree adaalat karen. ²⁵too meree ghairat ka tajriba karegee, kyoonki yah log ghussay men tujh say nipat lengay. vah teree naak aur kaanon ko kaat daalengay aur bachay huon ko talvaar say maut kay ghaat utaarengay. teray betay-betiyon ko vah lay jaaengay, aur jo kuchh un kay peechhay rah jaaay vah bhasm ho jaaega. ²⁶vah teray libaas aur teray zevraat ko tujh par say utaarengay.

²⁷yoon main teree vah fahhaashee aur zinaakaaree rok doonga jis ka silsila too nay misr men shuroo kiya tha. tab na too aarzoomand nazron say in cheezon kee taraf dekhegee, na misr ko yaad karegee. ²⁸kyoonki rabb qaadir-ay-mutlaq farmaata hai ki main tujhay un kay havaalay karnay ko hoon jo tujh say nafrat kartay hain, un kay havaalay jin say too nay tang a kar apna munh pher liya tha. ²⁹vah badee nafrat say teray saath pesh aaengay. jo kuchh too nay mehanat say kamaaya usay vah chheen kar tujhay nangee aur barahena chhodengay. tab teree zinaakaaree ka sharmanaak anjaam aur teree fahhaashee sab par zaahir ho jaaegee. ³⁰tab tujhay is ka ajr milega ki too qaumon kay peechhay pad kar zina kartee rahee, ki too nay un kay buton kee pooja karkay apnay aap ko naapaak kar diya hai.

³¹too apnee bahen kay namoonay par chal padee, is liyay main tujhay vahee piyaala pilaaoonga jo usay peena pada. ³²rabb qaadir-ay-mutlaq farmaata hai ki tujhay apnee bahen ka piyaala peena padega jo bada aur gahera hai. aur too us vaqt tak usay peetee rahegee jab tak mazaaq aur laan-taan ka nishaana na ban gaee ho. ³³dahshat aur tabaahee ka piyaala pee pee kar too madahoshee aur dukh say bhar jaaegee. too apnee bahen saamriya ka yah piyaalaa ³⁴aakhiree qatray tak pee legee, phir piyaalay ko paash paash karkay us kay tukday chaba legee aur apnay seenay ko phaad legee.’ yah rabb qaadir-ay-mutlaq ka farmaan hai. ³⁵rabb qaadir-ay-mutlaq farmaata hai, ‘too nay mujhay bhool kar apna munh mujh say pher liya hai. ab tujhay apnee fahhaashee aur zinaakaaree ka nateeja bhugatna padega’.”

³⁶rabb mazeed mujh say hamkalaam hua, “ai aadamzaad, kya too ahola aur aholeeba kee adaalat karnay kay liyay tayyaar hai? phir un par un kee makrooh harkaten zaahir kar. ³⁷un say do jurm sarzad huay hain, zina aur qatl. unhon nay buton say zina kiya aur apnay bachchon ko jala kar unhen khilaaya, un bachchon ko jo unhon nay meray haan janm diay thay. ³⁸lekin yah un kay liyay kaafee naheen tha. saath saath unhon nay mera maqdis naapaak aur meray sabat kay dinon kee behuramtee kee. ³⁹kyoonki jab kabhee vah apnay bachchon ko apnay buton kay huzoor qurbaan kartee theen usee din vah meray ghar men a kar us kee behuramtee kartee theen. meray hee ghar men vah aisee harkaten kartee theen.

⁴⁰yah bhee in do bahenon kay liyay kaafee naheen tha balki aadmiyon kee talaash men unhon nay apnay qaasidon ko door door tak bhej diya. jab mard pahunchay to too nay un kay liyay naha kar apnee aankhon men surma lagaaya aur apnay zevraat pahen liyay. ⁴¹phir too shaandaar sofay par baith gaee. teray saamnay mez thee jis par too nay meray liyay makhsoos bakhoor aur tel rakha tha. ⁴²registaan say siba kay mut’addid aadmee laaay gaay to shaher men shor mach gaya, aur logon nay sukoon ka saans liya. aadmiyon nay donon bahenon kay baazooon men kaday pahenaaay aur un kay saron par shaandaar taaj rakhay. ⁴³tab main nay zinaakaaree say ghisee phatee aurat kay baaray men kaha, ‘ab vah us kay saath zina karen, kyoonki vah zinaakaar hee hai.’ ⁴⁴aisa hee hua. mard un behaya bahenon ahola aur aholeeba say yoon hambistar huay jis tarah kasbiyon say.

⁴⁵lekin raastbaaz aadmee un kee adaalat karkay unhen zina aur qatl kay mujrim thaheraaengay. kyoonki donon bahenen zinaakaar aur qaatil hee hain. ⁴⁶rabb qaadir-ay-mutlaq farmaata hai ki un kay khilaaf juloos nikaal kar unhen dahshat aur loot-maar kay havaalay karo. ⁴⁷log unhen sangasaar karkay talvaar say tukday tukday karen, vah un kay betay-betiyon ko maar daalen aur un kay gharon ko nazar-ay-aatish karen.

⁴⁸yoon main mulk men zinaakaaree khatm karoonga. is say tamaam aurton ko tambeeh milegee ki vah tumhaaray sharmanaak namoonay par na chalen. ⁴⁹tumhen zinaakaaree aur butparastee kee munaasib saza milegee. tab tum jaan logee ki main rabb qaadir-ay-mutlaq hoon.”