Hizqeeel 22

yarooshalam khoonrezee ka shaher hai

¹rabb ka kalaam mujh par naazil hua, ²“ai aadamzaad, kya too yarooshalam kee adaalat karnay kay liyay tayyaar hai? kya too is qaatil shaher par faisla karnay kay liyay mustaid hai? phir us par us kee makrooh harkaten zaahir kar. ³usay bata,

‘rabb qaadir-ay-mutlaq farmaata hai ki ai yarooshalam betee, tera anjaam qareeb hee hai, aur yah tera apna qusoor hai. kyoonki too nay apnay darmiyaan maasoomon ka khoon bahaaya aur apnay liyay but bana kar apnay aap ko naapaak kar diya hai. ⁴apnee khoonrezee say too mujrim ban gaee hai, apnee butparastee say naapaak ho gaee hai. too khud apnee adaalat ka din qareeb laaee hai. isee vajah say tera anjaam qareeb a gaya hai, isee liyay main tujhay deegar aqvaam kee laan-taan aur tamaam mamaalik kay mazaaq ka nishaana bana doonga. ⁵sab tujh par thattha maarengay, khwaah vah qareeb hon ya door. teray naam par daagh lag gaya hai, tujh men fasaad hadd say ziyaada badh gaya hai.

⁶israaeel ka jo bhee buzurg tujh men raheta hai vah apnee pooree taaqat say khoon bahaanay kee koshish karta hai. ⁷teray baashinday apnay maan-baap ko haqeer jaantay hain. vah pardesee par sakhtee karkay yateemon aur bevaaon par zulm kartay hain. ⁸jo mujhay muqaddas hai usay too paaon talay kuchal detee hai. too meray sabat kay dinon kee behuramtee bhee kartee hai.

⁹tujh men aisay tuhamat lagaanay vaalay hain jo khoonrezee par tulay huay hain. teray baashinday pahaadon kee naajaaiz qurbaanagaahon kay paas qurbaaniyaan khaatay aur teray darmiyaan sharmanaak harkaten kartay hain. ¹⁰beta maan say hambistar ho kar baap kee behuramtee karta hai, shauhar maahavaaree kay dauraan beevee say sohbat karkay us say ziyaadtee karta hai. ¹¹ek apnay padosee kee beevee say zina karta hai jabki doosra apnee bahoo kee behuramtee aur teesra apnee sagee bahen kee ismatdaree karta hai. ¹²tujh men aisay log hain jo rishvat kay ivz qatl kartay hain. sood qaabil-ay-qabool hai, aur log ek doosray par zulm karkay naajaaiz nafa kamaatay hain. rabb qaadir-ay-mutlaq farmaata hai ki ai yarooshalam, too mujhay saraasar bhool gaee hai!

¹³tera naajaaiz nafa aur teray beech men khoonrezee dekh kar main ghussay men taalee bajaata hoon. ¹⁴soch lay! jis din main tujh say nipatoonga to kya tera hausla qaaim aur teray haath mazboot rahengay? yah mera, rabb ka farmaan hai, aur main yah karoonga bhee. ¹⁵main tujhay deegar aqvaam-o-mamaalik men muntashir karkay teree naapaakee door karoonga. ¹⁶phir jab deegar qaumon kay dekhtay dekhtay teree behuramtee ho jaaegee tab too jaan legee ki main hee rabb hoon’.”

israaeelee qaum bhattee men dhaat ka mail hai

¹⁷rabb mazeed mujh say hamkalaam hua, ¹⁸“ai aadamzaad, israaeelee qaum meray nazdeek us mail kee maanind ban gaee hai jo chaandee ko khaalis karnay kay baad bhattee men baaqee rah jaata hai. sab kay sab us taambay, teen, lohay aur seesay kee maanind hain jo bhattee men rah jaata hai. vah kachra hee hain. ¹⁹chunaanchay rabb qaadir-ay-mutlaq farmaata hai ki choonki tum bhattee men bacha hua mail ho is liyay main tumhen yarooshalam men ikattha karke ²⁰bhattee men phaink doonga. jis tarah chaandee, taambay, lohay, seesay aur teen kee aamezish ko taptee bhattee men phainka jaata hai taaki pighal jaaay usee tarah main tumhen ghussay men ikattha karoonga aur bhattee men phaink kar pighla doonga. ²¹main tumhen jama karkay aag men phaink doonga aur baday ghussay say hava day kar tumhen pighla doonga. ²²jis tarah chaandee bhattee men pighal jaatee hai usee tarah tum yarooshalam men pighal jaaogay. tab tum jaan logay ki main rabb nay apna ghazab tum par naazil kiya hai.”

pooree qaum qusoorvaar hai

²³rabb mujh say hamkalaam hua, ²⁴“ai aadamzaad, mulk-ay-israaeel ko bata, ‘ghazab kay din tujh par menh naheen barsega balki too baarish say maheroom rahega.’

²⁵mulk kay beech men saazish karnay vaalay raahanuma sherbabar kee maanind hain jo dahaadatay dahaadatay apna shikaar phaad letay hain. vah logon ko hadap karkay un kay khazaanay aur qeemtee cheezen chheen letay aur mulk kay darmiyaan hee mut’addid aurton ko bevaaen bana detay hain.

²⁶mulk kay imaam meree shareeat say ziyaadtee karkay un cheezon kee behuramtee kartay hain jo mujhay muqaddas hain. na vah muqaddas aur aam cheezon men imtiyaaz kartay, na paak aur naapaak ashya ka farq sikhaatay hain. neez, vah meray sabat kay din apnee aankhon ko band rakhtay hain taaki us kee behuramtee nazar na aaay. yoon un kay darmiyaan hee meree behuramtee kee jaatee hai.

²⁷mulk kay darmiyaan kay buzurg bhediyon kee maanind hain jo apnay shikaar ko phaad phaad kar khoon bahaatay aur logon ko maut kay ghaat utaartay hain taaki naarva nafa kamaaen.

²⁸mulk kay nabee farebdih royaaen aur jhootay paighaamaat suna kar logon kay buray kaamon par saphedee pher detay hain taaki un kee ghaltiyaan nazar na aaen. vah kahetay hain, ‘rabb qaadir-ay-mutlaq farmaata hai’ haalaanki rabb nay un par kuchh naazil naheen kiya hota.

²⁹mulk kay aam log bhee ek doosray ka istihsaal kartay hain. vah dakait ban kar ghareebon aur zarooratmandon par zulm kartay aur pardesiyon say badasulookee karkay un ka haq maartay hain.

³⁰israaeel men main aisay aadmee kee talaash men raha jo mulk kay liyay hifaaztee chaardeevaaree taameer karay, jo meray huzoor a kar deevaar kay rakhnay men khada ho jaaay taaki main mulk ko tabaah na karoon. lekin mujhay ek bhee na mila jo is qaabil ho. ³¹chunaanchay main apna ghazab un par naazil karoonga aur unhen apnay sakht qaher say bhasm karoonga. tab un kay ghalat kaamon ka nateeja un kay apnay saron par aaega. yah rabb qaadir-ay-mutlaq ka farmaan hai.”