Hizqeeel 21

rabb israaeel kay khilaaf talvaar chalaanay ko hai

¹rabb mujh say hamkalaam hua, ²“ai aadamzaad, yarooshalam kee taraf rukh karkay muqaddas jagahon aur mulk-ay-israaeel kay khilaaf nubuvvat kar! ³mulk ko bata, ‘rabb farmaata hai ki ab main tujh say nipat loonga! apnee talvaar miyaan say khainch kar main teray tamaam baashindon ko mita doonga, khwaah raastbaaz hon ya bedeen. ⁴kyoonki main raastbaazon ko bedeenon samet maar daaloonga, is liyay meree talvaar miyaan say nikal kar junoob say lay kar shimaal tak har shakhs par toot padegee. ⁵tab tamaam logon ko pata chalega ki main, rabb nay apnee talvaar ko miyaan say khainch liya hai. talvaar maartee rahegee aur miyaan men vaapas naheen aaegee.’

⁶ai aadamzaad, aahen bhar bhar kar yah paighaam suna! logon kay saamnay itnee talkhee say aah-o-zaaree kar ki kamar men dard honay lagay. ⁷jab vah tujh say poochhen, ‘aap kyoon karaah rahay hain?’ to unhen javaab day, ‘mujhay ek haulnaak khabar ka ilm hai jo abhee aanay vaalee hai. jab yahaan pahunchegee to har ek kee himmat toot jaaegee aur har haath behiss-o-harkat ho jaaega. har jaan hausla haaregee aur har ghutna daanvaandol ho jaaega. rabb qaadir-ay-mutlaq farmaata hai ki is khabar ka vaqt qareeb a gaya hai, jo kuchh pesh aana hai vah jald hee pesh aaega’.”

⁸rabb ek baar phir mujh say hamkalaam hua, ⁹“ai aadamzaad, nubuvvat karkay logon ko bata,

‘talvaar ko ragad ragad kar tez kar diya gaya hai. ¹⁰ab vah qatl-o-ghaarat kay liyay tayyaar hai, bijlee kee tarah chamaknay lagee hai. ham yah dekh kar kis tarah khush ho saktay hain? ai meray betay, too nay laathee aur har tarbiyat ko haqeer jaana hai. ¹¹chunaanchay talvaar ko tez karvaanay kay liyay bheja gaya taaki usay khoob istemaal kiya ja sakay. ab vah ragad ragad kar tez kee gaee hai, ab vah qaatil kay haath kay liyay tayyaar hai.’

¹²ai aadamzaad, cheekh uth! vaavaila kar! afsos say apna seena peet! talvaar meree qaum aur israaeel kay buzurgon kay khilaaf chalnay lagee hai, aur sab us kee zad men a jaaengay. ¹³kyoonki qaadir-ay-mutlaq farmaata hai ki jaanch-padtaal ka vaqt a gaya hai, aur laazim hai ki vah aaay, kyoonki too nay laathee kee tarbiyat ko haqeer jaana hai.

¹⁴chunaanchay ai aadamzaad, ab taalee baja kar nubuvvat kar! talvaar ko do balki teen baar un par tootnay day! kyoonki qatl-o-ghaarat kee yah muhalak talvaar qabzay tak maqtoolon men ghompee jaaegee. ¹⁵main nay talvaar ko un kay shaheron kay har darvaazay par khada kar diya hai taaki aanay jaanay vaalon ko maar daalay, har dil himmat haaray aur mut’addid afraad halaak ho jaaen. afsos! usay bijlee kee tarah chamkaaya gaya hai, vah qatl-o-ghaarat kay liyay tayyaar hai.

¹⁶ai talvaar, daaeen aur baaeen taraf ghoomtee phir, jis taraf bhee too muday us taraf maartee ja! ¹⁷main bhee taaliyaan baja kar apna ghussa israaeel par utaaroonga. yah mera, rabb ka farmaan hai.”

do raaston ka naqsha, baabal kay zareeay yarooshalam kee tabaahee

¹⁸rabb ka kalaam mujh par naazil hua, ¹⁹“ai aadamzaad, naqsha bana kar us par vah do raastay dikha jo shaah-ay-baabal kee talvaar ikhtiyaar kar saktee hai. donon raastay ek hee mulk say shuroo ho jaaen. jahaan yah ek doosray say alag ho jaatay hain vahaan do saain-bord khaday kar jo do mukhtalif shaheron kay raastay dikhaaen, ²⁰ek ammoniyon kay shaher rabba ka aur doosra yahoodaah kay qil’aaband shaher yarooshalam ka.

yah vah do raastay hain jo shaah-ay-baabal kee talvaar ikhtiyaar kar saktee hai. ²¹kyoonki jahaan yah do raastay ek doosray say alag ho jaatay hain vahaan shaah-ay-baabal ruk kar maaloom karega ki kaun sa raasta ikhtiyaar karna hai. vah teeron kay zareeay qur’a daalega, apnay buton say ishaara milnay kee koshish karega aur kisee jaanvar kee kalejee ka muaaina karega. ²²tab usay yarooshalam ka raasta ikhtiyaar karnay kee hidaayat milegee, chunaanchay vah apnay faujiyon kay saath yarooshalam kay paas pahunch kar qatl-o-ghaarat ka hukm dega. tab vah zor say jang kay naaray laga laga kar shaher ko pushtay say gher lengay, muhaasaray kay burj taameer karengay aur darvaazon ko todnay kee qil’aashikan masheenen khadee karengay. ²³jinhon nay shaah-ay-baabal say vafaadaaree kee qasam khaaee hai unhen yah peshgoee ghalat lagegee, lekin vah unhen un kay qusoor kee yaad dila kar unhen giriftaar karega.

²⁴chunaanchay rabb qaadir-ay-mutlaq farmaata hai, ‘tum logon nay khud alaaniya taur par bevafa honay say apnay qusoor kee yaad dilaaee hai. tumhaaray tamaam aamaal men tumhaaray gunaah nazar aatay hain. is liyay tum say sakhtee say nipta jaaega.

²⁵ai israaeel kay bigday huay aur bedeen raees, ab vah vaqt a gaya hai jab tujhay hatmee saza dee jaaegee. ²⁶rabb qaadir-ay-mutlaq farmaata hai ki pagdee ko utaar, taaj ko door kar! ab sab kuchh ulat jaaega. zaleel ko sarfaraaz aur sarfaraaz ko zaleel kiya jaaega.

²⁷main yarooshalam ko malbay ka dher, malbay ka dher, malbay ka dher bana doonga. aur shaher us vaqt tak naay siray say taameer naheen kiya jaaega jab tak vah na aaay jo haqdaar hai. usee kay havaalay main yarooshalam karoonga.’

ammonee bhee talvaar kee zad men aaenge

²⁸ai aadamzaad, ammoniyon aur un kee laan-taan kay javaab men nubuvvat kar! unhen bata,

‘rabb qaadir-ay-mutlaq farmaata hai ki talvaar qatl-o-ghaarat kay liyay miyaan say khainch lee gaee hai, usay ragad ragad kar tez kiya gaya hai taaki bijlee kee tarah chamaktay huay maartee jaaay.

²⁹teray nabiyon nay tujhay farebdih royaaen aur jhootay paighaamaat sunaaay hain. lekin talvaar bedeenon kee gardan par naazil honay vaalee hai, kyoonki vah vaqt a gaya hai jab unhen hatmee saza dee jaaay.

³⁰lekin is kay baad apnee talvaar ko miyaan men vaapas daal, kyoonki main tujhay bhee saza doonga. jahaan too paida hua, teray apnay vatan men main teree adaalat karoonga. ³¹main apna ghazab tujh par naazil karoonga, apnay qaher kee aag teray khilaaf bhadakaaoonga. main tujhay aisay vaheshee aadmiyon kay havaalay karoonga jo tabaah karnay ka fan khoob jaantay hain. ³²too aag ka eendhan ban jaaega, tera khoon teray apnay mulk men bah jaaega. aainda tujhay koee yaad naheen karega. kyoonki yah mera, rabb ka farmaan hai’.”