Hizqeeel 2
hizqeeel kee bulaahat, toomaar kee royaa
1vah bola, “ai aadamzaad, khada ho ja! main tujh say baat karna chaahata hoon.” 2joon hee vah mujh say hamkalaam hua to rooh nay mujh men a kar mujhay khada kar diya. phir main nay aavaaz ko yah kahetay huay suna,
3“ai aadamzaad, main tujhay israaeeliyon kay paas bhej raha hoon, ek aisee sarkash qaum kay paas jis nay mujh say baghaavat kee hai. shuroo say lay kar aaj tak vah apnay baapdaada samet mujh say bevafa rahay hain. 4jin logon kay paas main tujhay bhej raha hoon vah besharm aur ziddee hain. unhen vah kuchh suna day jo rabb qaadir-ay-mutlaq farmaata hai. 5khwaah yah baaghee sunen ya na sunen, vah zaroor jaan lengay ki hamaaray darmiyaan nabee barpa hua hai. 6ai aadamzaad, un say ya un kee baaton say mat darna. go too kaantedaar jhaadiyon say ghira rahega aur tujhay bichchhooon kay darmiyaan basna padega to bhee khaufzada na ho. na un kee baaton say khauf khaana, na un kay ravayyay say dahshat khaana. kyoonki yah qaum sarkash hai. 7khwaah yah sunen ya na sunen laazim hai ki too meray paighaamaat unhen sunaaay. kyoonki vah baaghee hee hain. 8ai aadamzaad, jab main tujh say hamkalaam hoonga to dhyaan day aur is sarkash qaum kee tarah baghaavat mat karna. apnay munh ko khol kar vah kuchh kha jo main tujhay khilaata hoon.”
9tab ek haath meree taraf badha hua nazar aaya jis men toomaar tha. 10toomaar ko khola gaya to main nay dekha ki us men aagay bhee aur peechhay bhee maatam aur aah-o-zaaree qalamband huee hai.