Hizqeeel 18

har ek ko sirf apnay hee aamaal kee saza milegee

¹rabb mujh say hamkalaam hua, ²“tum log mulk-ay-israaeel kay liyay yah kahaavat kyoon istemaal kartay ho, ‘vaalidain nay khattay angoor khaaay, lekin un kay bachchon hee kay daant khattay ho gaay hain.’ ³rabb qaadir-ay-mutlaq farmaata hai ki meree hayaat kee qasam, aainda tum yah kahaavat israaeel men istemaal naheen karogay! ⁴har insaan kee jaan meree hee hai, khwaah baap kee ho ya betay kee. jis nay gunaah kiya hai sirf usee ko saza-ay-maut milegee.

⁵lekin us raastbaaz ka muaamala farq hai jo raastee aur insaaf kee raah par chaltay hue ⁶na oonchee jagahon kee naajaaiz qurbaaniyaan khaata, na israaeelee qaum kay buton kee pooja karta hai. na vah apnay padosee kee beevee kee behuramtee karta, na maahavaaree kay dauraan kisee aurat say hambistar hota hai. ⁷vah kisee par zulm naheen karta. agar koee zamaanat day kar us say qarza lay to paisay vaapas milnay par vah zamaanat vaapas kar deta hai. vah choree naheen karta balki bhookon ko khaana khilaata aur nangon ko kapday pahenaata hai. ⁸vah kisee say bhee sood naheen leta. vah ghalat kaam karnay say gurez karta aur jhagadnay vaalon ka munsifaana faisla karta hai. ⁹vah meray qavaaid kay mutaabiq zindagee guzaarta aur vafaadaaree say meray ahkaam par amal karta hai. aisa shakhs raastbaaz hai, aur vah yaqeenan zinda rahega. yah rabb qaadir-ay-mutlaq ka farmaan hai.

¹⁰ab farz karo ki us ka ek zaalim beta hai jo qaatil hai aur vah kuchh karta hai ¹¹jis say us ka baap gurez karta tha. vah oonchee jagahon kee naajaaiz qurbaaniyaan khaata, apnay padosee kee beevee kee behuramtee karta, ¹²ghareebon aur zarooratmandon par zulm karta aur choree karta hai. jab qarzdaar qarza ada karay to vah usay zamaanat vaapas naheen deta. vah buton kee pooja balki kaee qism kee makrooh harkaten karta hai. ¹³vah sood bhee leta hai. kya aisa aadmee zinda rahega? hargiz naheen! in tamaam makrooh harkaton kee bina par usay saza-ay-maut dee jaaegee. vah khud apnay gunaahon ka zimmaadaar thaherega.

¹⁴lekin farz karo ki is betay kay haan beta paida ho jaaay. go beta sab kuchh dekhta hai jo us kay baap say sarzad hota hai to bhee vah baap kay ghalat namoonay par naheen chalta. ¹⁵na vah oonchee jagahon kee naajaaiz qurbaaniyaan khaata, na israaeelee qaum kay buton kee pooja karta hai. vah apnay padosee kee beevee kee behuramtee naheen kartaa ¹⁶aur kisee par bhee zulm naheen karta. agar koee zamaanat day kar us say qarza lay to paisay vaapas milnay par vah zamaanat lauta deta hai. vah choree naheen karta balki bhookon ko khaana khilaata aur nangon ko kapday pahenaata hai. ¹⁷vah ghalat kaam karnay say gurez karkay sood naheen leta. vah meray qavaaid kay mutaabiq zindagee guzaarta aur meray ahkaam par amal karta hai. aisay shakhs ko apnay baap kee saza naheen bhugatnee padegee. usay saza-ay-maut naheen milegee, haalaanki us kay baap nay mazkoora gunaah kiay hain. naheen, vah yaqeenan zinda rahega. ¹⁸lekin us kay baap ko zaroor us kay gunaahon kee saza milegee, vah yaqeenan marega. kyoonki us nay logon par zulm kiya, apnay bhaaee say choree kee aur apnee hee qaum kay darmiyaan bura kaam kiya.

¹⁹lekin tum log etiraaz kartay ho, ‘beta baap kay qusoor men kyoon na shareek ho? usay bhee baap kee saza bhugatnee chaahiay.’ javaab yah hai ki beta to raastbaaz aur insaaf kee raah par chalta raha hai, vah ehatiyaat say meray tamaam ahkaam par amal karta raha hai. is liyay laazim hai ki vah zinda rahay. ²⁰jis say gunaah sarzad hua hai sirf usay hee marna hai. lihaaza na betay ko baap kee saza bhugatnee padegee, na baap ko betay kee. raastbaaz apnee raastbaazee ka ajr paaega, aur bedeen apnee bedeenee ka.

²¹to bhee agar bedeen aadmee apnay gunaahon ko tark karay aur meray tamaam qavaaid kay mutaabiq zindagee guzaar kar raastbaazee aur insaaf kee raah par chal paday to vah yaqeenan zinda rahega, vah marega naheen. ²²jitnay bhee ghalat kaam us say sarzad huay hain un ka hisaab main naheen loonga balki us kay raastbaaz chaal-chalan ka lihaaz karkay usay zinda rahenay doonga. ²³rabb qaadir-ay-mutlaq farmaata hai ki kya main bedeen kee halaakat dekh kar khush hota hoon? hargiz naheen, balki main chaahata hoon ki vah apnee buree raahon ko chhod kar zinda rahay.

²⁴is kay bar’aks kya raastbaaz zinda rahega agar vah apnee raastbaaz zindagee tark karay aur gunaah karkay vahee qaabil-ay-ghin harkaten karnay lagay jo bedeen kartay hain? hargiz naheen! jitna bhee achchha kaam us nay kiya us ka main khayaal naheen karoonga balki us kee bevafaaee aur gunaahon ka. un hee kee vajah say usay saza-ay-maut dee jaaegee.

²⁵lekin tum log daava kartay ho ki jo kuchh rabb karta hai vah theek naheen. ai israaeelee qaum, suno! yah kaisee baat hai ki mera amal theek naheen? apnay hee aamaal par ghaur karo! vahee durust naheen. ²⁶agar raastbaaz apnee raastbaaz zindagee tark karkay gunaah karay to vah is bina par mar jaaega. apnee naaraastee kee vajah say hee vah mar jaaega. ²⁷is kay bar’aks agar bedeen apnee bedeen zindagee tark karkay raastee aur insaaf kee raah par chalnay lagay to vah apnee jaan ko chhudaaega. ²⁸kyoonki agar vah apna qusoor tasleem karkay apnay gunaahon say munh mod lay to vah marega naheen balki zinda rahega. ²⁹lekin israaeelee qaum daava kartee hai ki jo kuchh rabb karta hai vah theek naheen. ai israaeelee qaum, yah kaisee baat hai ki mera amal theek naheen? apnay hee aamaal par ghaur karo! vahee durust naheen.

³⁰is liyay rabb qaadir-ay-mutlaq farmaata hai ki ai israaeel kee qaum, main teree adaalat karoonga, har ek ka us kay kaamon kay muvaafiq faisla karoonga. chunaanchay khabardaar! tauba karkay apnee bevafa harkaton say munh phero, varna tum gunaah men phans kar gir jaaogay. ³¹apnay tamaam ghalat kaam tark karkay naya dil aur naee rooh apna lo. ai israaeeliyo, tum kyoon mar jaao? ³²kyoonki main kisee kee maut say khush naheen hota. chunaanchay tauba karo, tab hee tum zinda rahogay. yah rabb qaadir-ay-mutlaq ka farmaan hai.