Hizqeeel 17

angoor kee bel aur uqaab kee tamseel

¹rabb mujh say hamkalaam hua, ²“ai aadamzaad, israaeelee qaum ko pahelee pesh kar, tamseel suna day. ³unhen bata, ‘rabb qaadir-ay-mutlaq farmaata hai ki ek bada uqaab ud kar mulk-ay-lubnaan men aaya. us kay baday baday par aur lambay lambay pankh thay, us kay ghanay aur rangeen baal-o-par chamak rahay thay. lubnaan men us nay ek deodaar kay darakht kee chotee pakad lee ⁴aur us kee sab say oonchee shaakh ko tod kar taajiron kay mulk men lay gaya. vahaan us nay usay saudaagaron kay shaher men laga diya. ⁵phir uqaab israaeel men aaya aur vahaan say kuchh beej lay kar ek baday darya kay kinaaray par zarkhez zameen men bo diya. ⁶tab angoor kee bel phoot niklee jo ziyaada oonchee na huee balki chaaron taraf phailtee gaee. shaakhon ka rukh uqaab kee taraf raha jabki us kee jaden zameen men dhanstee gaeen. chunaanchay achchhee bel ban gaee jo phoottee phoottee naee shaakhen nikaaltee gaee.

⁷lekin phir ek aur bada uqaab aaya. us kay bhee baday baday par aur ghanay ghanay baal-o-par thay. ab main kya dekhta hoon, bel doosray uqaab kee taraf rukh karnay lagtee hai. us kee jaden aur shaakhen us khet men na raheen jis men usay lagaaya gaya tha balki vah doosray uqaab say paanee milnay kee ummeed rakh kar usee kee taraf phailnay lagee. ⁸taajjub yah tha ki usay achchhee zameen men lagaaya gaya tha, jahaan usay kasrat ka paanee haasil tha. vahaan vah khoob phail kar phal la saktee thee, vahaan vah zabardast bel ban saktee thee.’

⁹ab rabb qaadir-ay-mutlaq poochhta hai, ‘kya bel kee nashv-o-numa jaaree rahegee? hargiz naheen! kya usay jad say ukhaad kar phainka naheen jaaega? zaroor! kya us ka phal chheen naheen liya jaaega? beshak balki aakhirkaar us kee taaza taaza komplen bhee sab kee sab murjha kar khatm ho jaaengee. tab usay jad say ukhaadnay kay liyay na ziyaada logon, na taaqat kee zaroorat hogee. ¹⁰go usay lagaaya gaya hai to bhee bel kee nashv-o-numa jaaree naheen rahegee. joon hee mashriqee loo us par chalegee vah mukammal taur par murjha jaaegee. jis khet men usay lagaaya gaya vaheen vah khatm ho jaaegee’.”

¹¹rabb mujh say mazeed hamkalaam hua, ¹²“is sarkash qaum say poochh, ‘kya tujhay is tamseel kee samajh naheen aaee?’ tab unhen is ka matlab samjha day. ‘baabal kay baadshaah nay yarooshalam par hamla kiya. vah us kay baadshaah aur afsaron ko giriftaar karkay apnay mulk men lay gaya. ¹³us nay yahoodaah kay shaahee khaandaan men say ek ko chun liya aur us kay saath ahd baandh kar usay takht par bitha diya. naay baadshaah nay baabal say vafaadaar rahenay kee qasam khaaee. baabal kay baadshaah nay yahoodaah kay raahanumaaon ko bhee jilaavatan kar diyaa ¹⁴taaki mulk-ay-yahoodaah aur us ka naya baadshaah kamzor rah kar sarkash honay kay qaabil na banen balki us kay saath ahd qaaim rakh kar khud qaaim rahen. ¹⁵to bhee yahoodaah ka baadshaah baaghee ho gaya aur apnay qaasid misr bhejay taaki vahaan say ghoday aur faujee mangavaaen. kya usay kaamyaabee haasil hogee? kya jis nay aisee harkaten kee hain bach niklega? hargiz naheen! kya jis nay ahd tod liya hai vah bachega? hargiz naheen!

¹⁶rabb qaadir-ay-mutlaq farmaata hai ki meree hayaat kee qasam, us shakhs nay qasam kay tahet shaah-ay-baabal say ahd baandha hai, lekin ab us nay yah qasam haqeer jaan kar ahd ko tod daala hai. is liyay vah baabal men vafaat paaega, us baadshaah kay mulk men jis nay usay takht par bithaaya tha. ¹⁷jab baabal kee fauj yarooshalam kay ird-gird pushtay aur burj bana kar us ka muhaasara karegee taaki bahuton ko maar daalay to firaaun apnee badee fauj aur mut’addid faujiyon ko lay kar us kee madad karnay naheen aaega. ¹⁸kyoonki yahoodaah kay baadshaah nay ahd ko tod kar vah qasam haqeer jaanee hai jis kay tahet yah baandha gaya. go us nay shaah-ay-baabal say haath mila kar ahd kee tasdeeq kee thee to bhee bevafa ho gaya, is liyay vah naheen bachega. ¹⁹rabb qaadir-ay-mutlaq farmaata hai ki meree hayaat kee qasam, us nay meray hee ahd ko tod daala, meree hee qasam ko haqeer jaana hai. is liyay main ahd todnay kay tamaam nataaij us kay sar par laaoonga. ²⁰main us par apna jaal daal doonga, usay apnay phanday men pakad loonga. choonki vah mujh say bevafa ho gaya hai is liyay main usay baabal lay ja kar us kee adaalat karoonga. ²¹us kay behtareen faujee sab mar jaaengay, aur jitnay bach jaaengay vah chaaron taraf muntashir ho jaaengay. tab tum jaan logay ki main, rabb nay yah sab kuchh farmaaya hai.

²²rabb qaadir-ay-mutlaq farmaata hai ki ab main khud deodaar kay darakht kee chotee say narm-o-naazuk kompal tod kar usay ek buland-o-baala pahaad par laga doonga. ²³aur jab main usay israaeel kee bulandiyon par laga doonga to us kee shaakhen phoot nikalengee, aur vah phal la kar shaandaar darakht banega. har qism kay parinday us men basera karengay, sab us kee shaakhon kay saay men panaah lengay. ²⁴tab mulk kay tamaam darakht jaan lengay ki main rabb hoon. main hee oonchay darakht ko khaak men mila deta, aur main hee chhotay darakht ko bada bana deta hoon. main hee saayaadaar darakht ko sookhnay deta aur main hee sookhay darakht ko phalnay phoolnay deta hoon. yah mera, rabb ka farmaan hai, aur main yah karoonga bhee’.”