Hizqeeel 16

yarooshalam bevafa aurat hai

¹rabb mujh say hamkalaam hua, ²“ai aadamzaad, yarooshalam kay zahen men us kee makrooh harkaton kee sanjeedgee bitha kar ³elaan kar ki rabb qaadir-ay-mutlaq farmaata hai, ‘ai yarooshalam betee, teree nasal mulk-ay-kan’aan kee hai, aur vaheen too paida huee. tera baap amoree, teree maan hittee thee. ⁴paida hotay vaqt naaf kay saath lagee naal ko kaat kar door naheen kiya gaya. na tujhay paanee say nahelaaya gaya, na teray jism par namak mala gaya, aur na tujhay kapdon men lapeta gaya. ⁵na kisee ko itna taras aaya, na kisee nay tujh par itna rahem kiya ki in kaamon men say ek bhee karta. is kay bajaay tujhay khulay maidaan men phaink kar chhod diya gaya. kyoonki jab too paida huee to sab tujhay haqeer jaantay thay.

⁶tab main vahaan say guzra. us vaqt too apnay khoon men tadap rahee thee. tujhay is haalat men dekh kar main bola, “jeetee rah!” haan, too apnay khoon men tadap rahee thee jab main bola, “jeetee rah! ⁷khet men hariyaalee kee tarah phaltee phooltee ja!” tab too phaltee phooltee huee parvaan chadhee. too nihaayat khoobsoorat ban gaee. chhaatiyaan aur baal dekhnay men piyaaray lagay. lekin abhee tak too nangee aur barahena thee.

⁸main dubaara teray paas say guzra to dekha ki too shaadee kay qaabil ho gaee hai. main nay apnay libaas ka daaman tujh par bichha kar teree barahenagee ko dhaamp diya. main nay qasam kha kar teray saath ahd baandha aur yoon tera maalik ban gaya. yah rabb qaadir-ay-mutlaq ka farmaan hai.

⁹main nay tujhay nahela kar khoon say saaf kiya, phir teray jism par tel mala. ¹⁰main nay tujhay shaandaar libaas aur chamday kay nafees jootay pahenaaay, tujhay baareek kataan aur qeemtee kapday say mulabbas kiya. ¹¹phir main nay tujhay khoobsoorat zevraat, choodiyon, haar, ¹²nath, baaliyon aur shaandaar taaj say sajaaya. ¹³yoon too sonay-chaandee say aaraasta aur baareek kataan, resham aur shaandaar kapday say mulabbas huee. teree khuraak behtareen maiday, shahed aur zaitoon kay tel par mushtamil thee. too nihaayat hee khoobsoorat huee, aur hotay hotay malika ban gaee.’ ¹⁴rabb qaadir-ay-mutlaq farmaata hai, ‘teray husn kee shuharat deegar aqvaam men phail gaee, kyoonki main nay tujhay apnee shaan-o-shaukat men yoon shareek kiya tha ki tera husn kaamil tha.

¹⁵lekin too nay kya kiya? too nay apnay husn par bharosa rakha. apnee shuharat say faaida utha kar too zinaakaar ban gaee. har guzarnay vaalay ko too nay apnay aap ko pesh kiya, har ek ko tera husn haasil hua. ¹⁶too nay apnay kuchh shaandaar kapday lay kar apnay liyay rangdaar bistar banaaya aur usay oonchee jagahon par bichha kar zina karnay lagee. aisa na maazee men kabhee hua, na aainda kabhee hoga. ¹⁷too nay vahee nafees zevraat liyay jo main nay tujhay diay thay aur meree hee sonay-chaandee say apnay liyay mardon kay but dhaal kar un say zina karnay lagee. ¹⁸unhen apnay shaandaar kapday pahena kar too nay mera hee tel aur bakhoor unhen pesh kiya.’ ¹⁹rabb qaadir-ay-mutlaq farmaata hai, ‘jo khuraak yaanee behtareen maida, zaitoon ka tel aur shahed main nay tujhay diya tha usay too nay unhen pesh kiya taaki us kee khushboo unhen pasand aaay.

²⁰jin betay-betiyon ko too nay meray haan janm diya tha unhen too nay qurbaan karkay buton ko khilaaya. kya too apnee zinaakaaree par iktifa na kar sakee? ²¹kya zaroorat thee ki meray bachchon ko bhee qatl karkay buton kay liyay jala day? ²²taajjub hai ki jab bhee too aisee makrooh harkaten aur zina kartee thee to tujhay ek baar bhee javaanee ka khayaal na aaya, yaanee vah vaqt jab too nangee aur barahena haalat men apnay khoon men tadaptee rahee.’

²³rabb qaadir-ay-mutlaq farmaata hai, ‘afsos, tujh par afsos! apnee baaqee tamaam sharaaraton kay ilaavaa ²⁴too nay har chauk men buton kay liyay qurbaangaah taameer karkay har ek kay saath zina karnay kee jagah bhee banaaee. ²⁵har galee kay konay men too nay zina karnay ka kamra banaaya. apnay husn kee behuramtee karkay too apnee ismatafaroshee zoron par laaee. har guzarnay vaalay ko too nay apna badan pesh kiya. ²⁶pahelay too apnay shahevataparast padosee misr kay saath zina karnay lagee. jab too nay apnee ismatafaroshee ko zoron par la kar mujhay mushtail kiyaa ²⁷to main nay apna haath teray khilaaf badha kar teray ilaaqay ko chhota kar diya. main nay tujhay filistee betiyon kay laalach kay havaalay kar diya, un kay havaalay jo tujh say nafrat kartee hain aur jin ko teray zinaakaaraana chaal-chalan par sharm aatee hai.

²⁸ab tak teree shahevat ko taskeen naheen milee thee, is liyay too asooriyon say zina karnay lagee. lekin yah bhee teray liyay kaafee na tha. ²⁹apnee zinaakaaree men izaafa karkay too saudaagaron kay mulk baabal kay peechhay pad gaee. lekin yah bhee teree shahevat kay liyay kaafee naheen tha.’ ³⁰rabb qaadir-ay-mutlaq farmaata hai, ‘aisee harkaten karkay too kitnee sargarm huee! saaf zaahir hua ki too zabardast kasbee hai. ³¹jab too nay har chauk men buton kee qurbaangaah banaaee aur har galee kay konay men zina karnay ka kamra taameer kiya to too aam kasbee say mukhtalif thee. kyoonki too nay apnay gaahakon say paisay lenay say inkaar kiya. ³²haay, too kaisee badkaar beevee hai! apnay shauhar par too deegar mardon ko tarjeeh detee hai. ³³har kasbee ko fees miltee hai, lekin too to apnay tamaam aashiqon ko tuhfay detee hai taaki vah har jagah say a kar teray saath zina karen. ³⁴is men too deegar kasbiyon say farq hai. kyoonki na gaahak teray peechhay bhaagtay, na vah teree muhabbat ka muaavaza detay hain balki too khud un kay peechhay bhaagtee aur unhen apnay saath zina karnay ka muaavaza detee hai.’

³⁵ai kasbee, ab rabb ka farmaan sun lay! ³⁶rabb qaadir-ay-mutlaq farmaata hai, ‘too nay apnay aashiqon ko apnee barahenagee dikha kar apnee ismatafaroshee kee, too nay makrooh but bana kar un kee pooja kee, too nay unhen apnay bachchon ka khoon qurbaan kiya hai. ³⁷is liyay main teray tamaam aashiqon ko ikattha karoonga, un sab ko jinhen too pasand aaee, unhen bhee jo tujhay piyaaray thay aur unhen bhee jin say too nay nafrat kee. main unhen chaaron taraf say jama karkay teray khilaaf bhejoonga. tab main un kay saamnay hee teray tamaam kapday utaaroonga taaki vah teree pooree barahenagee dekhen. ³⁸main teree adaalat karkay teree zinaakaaree aur qaatilaana harkaton ka faisla karoonga. mera ghussa aur meree ghairat tujhay khoonrezee kee saza degee.

³⁹main tujhay teray aashiqon kay havaalay karoonga, aur vah teray buton kee qurbaangaahen un kamron samet dha dengay jahaan too zinaakaaree kartee rahee hai. vah teray kapday aur shaandaar zevraat utaar kar tujhay uriyaan aur barahena chhod dengay. ⁴⁰vah teray khilaaf juloos nikaalengay aur tujhay sangasaar karkay talvaar say tukday tukday kar dengay. ⁴¹teray gharon ko jala kar vah mut’addid aurton kay dekhtay dekhtay tujhay saza dengay. yoon main teree zinaakaaree ko rok doonga, aur aainda too apnay aashiqon ko zina karnay kay paisay naheen day sakegee.

⁴²tab mera ghussa thanda ho jaaega, aur too meree ghairat ka nishaana naheen rahegee. meree naaraazee khatm ho jaaegee, aur mujhay dubaara taskeen milegee.’ ⁴³rabb qaadir-ay-mutlaq farmaata hai, ‘main teray sar par teree harkaton ka poora nateeja laaoonga, kyoonki tujhay javaanee men meree madad kee yaad na rahee balki too mujhay in tamaam baaton say taish dilaatee rahee. baaqee tamaam ghinaunee harkaten teray liyay kaafee naheen theen balki too zina bhee karnay lagee.

⁴⁴tab log yah kahaavat kah kar tera mazaaq udaaengay, “jaisee maan, vaisee betee!” ⁴⁵too vaaqaee apnee maan kee maanind hai, jo apnay shauhar aur bachchon say sakht nafrat kartee thee. too apnee bahenon kee maanind bhee hai, kyoonki vah bhee apnay shauharon aur bachchon say sakht nafrat kartee theen. teree maan hittee aur tera baap amoree tha. ⁴⁶teree badee bahen saamriya thee jo apnee betiyon kay saath teray shimaal men aabaad thee. aur teree chhotee bahen sadoom thee jo apnee betiyon kay saath teray junoob men rahetee thee. ⁴⁷too na sirf un kay ghalat namoonay par chal padee aur un kee see makrooh harkaten karnay lagee balki un say kaheen ziyaada bura kaam karnay lagee.’ ⁴⁸rabb qaadir-ay-mutlaq farmaata hai, ‘meree hayaat kee qasam, teree bahen sadoom aur us kee betiyon say kabhee itna ghalat kaam sarzad na hua jitna ki tujh say aur teree betiyon say hua hai. ⁴⁹teree bahen sadoom ka kya qusoor tha? vah apnee betiyon samet mutakabbir thee. go unhen khuraak kee kasrat aur aaraam-o-sukoon haasil tha to bhee vah museebatazadon aur ghareebon ka sahaara naheen bantee theen. ⁵⁰vah maghroor theen aur meree maujoodgee men hee ghinauna kaam kartee theen. isee vajah say main nay unhen hata diya. too khud is kee gavaah hai. ⁵¹saamriya par bhee ghaur kar. jitnay gunaah tujh say sarzad huay un ka aadha hissa bhee us say na hua. apnee bahenon kee nisbat too nay kaheen ziyaada ghinaunee harkaten kee hain. teray muqaablay men teree bahenen farishtay hain. ⁵²chunaanchay ab apnee khajaalat ko bardaasht kar. kyoonki apnay gunaahon say too apnee bahenon kee jagah khadee ho gaee hai. too nay un say kaheen ziyaada qaabil-ay-ghin kaam kiay hain, aur ab vah teray muqaablay men maasoom bachchay lagtee hain. sharm kha kha kar apnee rusvaaee ko bardaasht kar, kyoonki tujh say aisay sangeen gunaah sarzad huay hain ki teree bahenen raastbaaz hee lagtee hain.

to bhee rabb vafaadaar rahegaa

⁵³lekin ek din aaega jab main sadoom, saamriya, tujhay aur tum sab kee betiyon ko bahaal karoonga. ⁵⁴tab too apnee rusvaaee bardaasht kar sakegee aur apnay saaray ghalat kaam par sharm khaaegee. sadoom aur saamriya yah dekh kar tasallee paaengee. ⁵⁵haan, teree bahenen sadoom aur saamriya apnee betiyon samet dubaara qaaim ho jaaengee. too bhee apnee betiyon samet dubaara qaaim ho jaaegee.

⁵⁶pahelay too itnee maghroor thee ki apnee bahen sadoom ka zikr tak naheen kartee thee. ⁵⁷lekin phir teree apnee buraaee par raushnee daalee gaee, aur ab teree tamaam padosanen tera hee mazaaq udaatee hain, khwaah adomee hon, khwaah filistee. sab tujhay haqeer jaantee hain. ⁵⁸chunaanchay ab tujhay apnee zinaakaaree aur makrooh harkaton ka nateeja bhugatna padega. yah rabb ka farmaan hai.’

⁵⁹rabb qaadir-ay-mutlaq farmaata hai, ‘main tujhay munaasib saza doonga, kyoonki too nay mera vah ahd tod kar us qasam ko haqeer jaana hai jo main nay teray saath ahd baandhtay vaqt khaaee thee. ⁶⁰to bhee main vah ahd yaad karoonga jo main nay teree javaanee men teray saath baandha tha. na sirf yah balki main teray saath abdee ahd qaaim karoonga. ⁶¹tab tujhay vah ghalat kaam yaad aaega jo pahelay tujh say sarzad hua tha, aur tujhay sharm aaegee jab main teree badee aur chhotee bahenon ko lay kar teray havaalay karoonga taaki vah teree betiyaan ban jaaen. lekin yah sab kuchh is vajah say naheen hoga ki too ahd kay mutaabiq chaltee rahee hai. ⁶²main khud teray saath apna ahd qaaim karoonga, aur too jaan legee ki main hee rabb hoon.’ ⁶³rabb qaadir-ay-mutlaq farmaata hai, ‘jab main teray tamaam gunaahon ko muaaf karoonga tab tujhay un ka khayaal a kar sharmindagee mahsoos hogee, aur too sharm kay maaray gumsum rahegee’.”