Hizqeeel 14

allaah butparastee ka munaasib javaab degaa

¹israaeel kay kuchh buzurg mujh say milnay aaay aur meray saamnay baith gaay. ²tab rabb mujh say hamkalaam hua, ³“ai aadamzaad, in aadmiyon kay dil apnay buton say liptay rahetay hain. jo cheezen un kay liyay thokar aur gunaah ka baais hain unhen unhon nay apnay munh kay saamnay hee rakha hai. to phir kya munaasib hai ki main unhen javaab doon jab vah mujh say darayaaft karnay aatay hain? ⁴unhen bata, ‘rabb qaadir-ay-mutlaq farmaata hai, yah log apnay buton say liptay rahetay aur vah cheezen apnay munh kay saamnay rakhtay hain jo thokar aur gunaah ka baais hain. saath saath yah nabee kay paas bhee jaatay hain taaki mujh say maaloomaat haasil karen. jo bhee israaeelee aisa karay usay main khud jo rabb hoon javaab doonga, aisa javaab jo us kay mut’addid buton kay ain mutaabiq hoga. ⁵main un say aisa sulook karoonga taaki israaeelee qaum kay dil ko mazbootee say pakad loon. kyoonki apnay buton kee khaatir sab kay sab mujh say door ho gaay hain.’

⁶chunaanchay israaeelee qaum ko bata, ‘rabb qaadir-ay-mutlaq farmaata hai ki tauba karo! apnay buton aur tamaam makrooh rasm-o-rivaaj say munh mod kar meray paas vaapas a jaao. ⁷us kay anjaam par dhyaan do jo aisa naheen karega, khwaah vah israaeelee ya israaeel men rahenay vaala pardesee ho. agar vah mujh say door ho kar apnay buton say lipat jaaay aur vah cheezen apnay saamnay rakhay jo thokar aur gunaah ka baais hain to jab vah nabee kee maarifat mujh say maaloomaat haasil karnay kee koshish karega to main, rabb usay munaasib javaab doonga. ⁸main aisay shakhs ka saamna karkay us say yoon nipat loonga ki vah doosron kay liyay ibrat’angez misaal ban jaaega. main usay yoon mita doonga ki meree qaum men us ka naam-o-nishaan tak naheen rahega. tab tum jaan logay ki main hee rabb hoon.

⁹agar kisee nabee ko kuchh sunaanay par uksaaya gaya jo meree taraf say naheen tha to yah is liyay hua ki main, rabb nay khud usay uksaaya. aisay nabee kay khilaaf main apna haath utha kar usay yoon tabaah karoonga ki meree qaum men us ka naam-o-nishaan tak naheen rahega. ¹⁰donon ko un kay qusoor kee munaasib saza milegee, nabee ko bhee aur usay bhee jo hidaayat paanay kay liyay us kay paas aata hai. ¹¹tab israaeelee qaum na mujh say door ho kar aavaara phiregee, na apnay aap ko in tamaam gunaahon say aalooda karegee. vah meree qaum hongay, aur main un ka khuda hoonga. yah rabb qaadir-ay-mutlaq ka farmaan hai’.”

sirf raastbaaz hee bachay rahenge

¹²rabb mujh say hamkalaam hua, ¹³“ai aadamzaad, farz kar ki koee mulk bevafa ho kar mera gunaah karay, aur main kaal kay zareeay usay saza day kar us men say insaan-o-haivaan mita daaloon. ¹⁴khwaah mulk men nooh, daanyaal aur ayyoob kyoon na bastay to bhee mulk na bachta. yah aadmee apnee raastbaazee say sirf apnee hee jaanon ko bacha saktay. yah rabb qaadir-ay-mutlaq ka farmaan hai.

¹⁵ya farz kar ki main mazkoora mulk men vaheshee darindon ko bhej doon jo idhar udhar phir kar sab ko phaad khaaen. mulk veeraan-o-sunsaan ho jaaay aur janglee darindon kee vajah say koee us men say guzarnay kee jur’at na karay. ¹⁶meree hayaat kee qasam, khwaah mazkoora teen raastbaaz aadmee mulk men kyoon na bastay to bhee akelay hee bachtay. vah apnay betay-betiyon ko bhee bacha na saktay balki poora mulk veeraan-o-sunsaan hota. yah rabb qaadir-ay-mutlaq ka farmaan hai.

¹⁷ya farz kar ki main mazkoora mulk ko jang say tabaah karoon, main talvaar ko hukm doon ki mulk men say guzar kar insaan-o-haivaan ko nest-o-naabood kar day. ¹⁸meree hayaat kee qasam, khwaah mazkoora teen raastbaaz aadmee mulk men kyoon na bastay vah akelay hee bachtay. vah apnay betay-betiyon ko bhee bacha na saktay. yah rabb qaadir-ay-mutlaq ka farmaan hai.

¹⁹ya farz kar ki main apna ghussa mulk par utaar kar us men muhalak vaba yoon phaila doon ki insaan-o-haivaan sab kay sab mar jaaen. ²⁰meree hayaat kee qasam, khwaah nooh, daanyaal aur ayyoob mulk men kyoon na bastay to bhee vah apnay betay-betiyon ko bacha na saktay. vah apnee raastbaazee say sirf apnee hee jaanon ko bachaatay. yah rabb qaadir-ay-mutlaq ka farmaan hai.

²¹ab yarooshalam kay baaray men rabb qaadir-ay-mutlaq ka farmaan suno! yarooshalam ka kitna bura haal hoga jab main apnee chaar sakht sazaaen us par naazil karoonga. kyoonki insaan-o-haivaan jang, kaal, vaheshee darindon aur muhalak vaba kee zad men a kar halaak ho jaaengay. ²²to bhee chand ek bachengay, kuchh betay-betiyaan jilaavatan ho kar baabal men tumhaaray paas aaengay. jab tum un ka bura chaal-chalan aur harkaten dekhogay to tumhen tasallee milegee ki har aafat munaasib thee jo main yarooshalam par laaya. ²³un ka chaal-chalan aur harkaten dekh kar tumhen tasallee milegee, kyoonki tum jaan logay ki jo kuchh bhee main nay yarooshalam kay saath kiya vah bilaavajah naheen tha. yah rabb qaadir-ay-mutlaq ka farmaan hai.”