Hizqeeel 13

jhootay nabee halaak ho jaaenge

¹rabb mujh say hamkalaam hua, ²“ai aadamzaad, israaeel kay naam-nihaad nabiyon kay khilaaf nubuvvat kar! jo nubuvvat kartay vaqt apnay dilon say ubharnay vaalee baaten hee pesh kartay hain, un say kah,

‘rabb ka farmaan suno! ³rabb qaadir-ay-mutlaq farmaata hai ki un ahemaq nabiyon par afsos jinhen apnee hee rooh say tahereek miltee hai aur jo haqeeqat men roya naheen dekhtay. ⁴ai israaeel, teray nabee khandaraat men lomdiyon kee tarah aavaara phir rahay hain. ⁵na koee deevaar kay rakhnon men khada hua, na kisee nay us kee marammat kee taaki israaeelee qaum rabb kay us din qaaim rah sakay jab jang chhid jaaegee. ⁶un kee royaaen dhoka hee dhoka, un kee peshgoiyaan jhoot hee jhoot hain. vah kahetay hain, “rabb farmaata hai” go rabb nay unhen naheen bheja. taajjub kee baat hai ki to bhee vah tavaqqo kartay hain ki main un kee peshgoiyaan pooree honay doon! ⁷haqeeqat men tumhaaree royaaen dhoka hee dhoka aur tumhaaree peshgoiyaan jhoot hee jhoot hain. to bhee tum kahetay ho, “rabb farmaata hai” haalaanki main nay kuchh naheen farmaaya.

⁸chunaanchay rabb qaadir-ay-mutlaq farmaata hai ki main tumhaaree farebdih baaton aur jhootee royaaon kee vajah say tum say nipat loonga. yah rabb qaadir-ay-mutlaq ka farmaan hai. ⁹main apna haath un nabiyon kay khilaaf badha doonga jo dhokay kee royaaen dekhtay aur jhootee peshgoiyaan sunaatay hain. na vah meree qaum kee majlis men shareek hongay, na israaeelee qaum kee faheriston men darj hongay. mulk-ay-israaeel men vah kabhee daakhil naheen hongay. tab tum jaan logay ki main rabb qaadir-ay-mutlaq hoon. ¹⁰vah meree qaum ko ghalat raah par la kar amn-o-amaan ka elaan kartay hain agarchi amn-o-amaan hai naheen. jab qaum apnay liyay kachchee see deevaar bana letee hai to yah nabee us par saphedee pher detay hain. ¹¹lekin ai saphedee karnay vaalo, khabardaar! yah deevaar gir jaaegee. mooslaadhaar baarish barsegee, olay padengay aur sakht aandhee us par toot padegee. ¹²tab deevaar gir jaaegee, aur log tanzan tum say poochhengay ki ab vah saphedee kahaan hai jo tum nay deevaar par pheree thee?

¹³rabb qaadir-ay-mutlaq farmaata hai ki main taish men a kar deevaar par zabardast aandhee aanay doonga, ghussay men us par mooslaadhaar baarish aur muhalak olay barsa doonga. ¹⁴main us deevaar ko dha doonga jis par tum nay saphedee pheree thee, usay khaak men yoon mila doonga ki us kee bunyaad nazar aaegee. aur jab vah gir jaaegee to tum bhee us kee zad men a kar tabaah ho jaaogay. tab tum jaan logay ki main hee rabb hoon. ¹⁵yoon main deevaar aur us kee saphedee karnay vaalon par apna ghussa utaaroonga. tab main tum say kahoonga ki deevaar bhee khatm hai aur us kee saphedee karnay vaalay bhee, ¹⁶yaanee israaeel kay vah nabee jinhon nay yarooshalam ko aisee peshgoiyaan aur royaaen sunaaeen jin kay mutaabiq amn-o-amaan ka daur qareeb hee hai, haalaanki amn-o-amaan ka imkaan hee naheen. yah rabb qaadir-ay-mutlaq ka farmaan hai.’

¹⁷ai aadamzaad, ab apnee qaum kee un betiyon ka saamna kar jo nubuvvat kartay vaqt vahee baaten pesh kartee hain jo un kay dilon say ubhar aatee hain. un kay khilaaf nubuvvat karke ¹⁸kah,

‘rabb qaadir-ay-mutlaq farmaata hai ki un aurton par afsos jo tamaam logon kay liyay kalaaee say baandhnay vaalay taaveez see letee hain, jo logon ko phansaanay kay liyay chhoton aur badon kay saron kay liyay parday bana letee hain. ai aurto, kya tum vaaqaee samajhtee ho ki meree qaum men say baaz ko phaans saktee aur baaz ko apnay liyay zinda chhod saktee ho? ¹⁹meree qaum kay darmiyaan hee tum nay meree behuramtee kee, aur yah sirf chand ek mutthee bhar jau aur rotee kay do chaar tukdon kay liyay. afsos, meree qaum jhoot sunna pasand kartee hai. is say faaida utha kar tum nay usay jhoot pesh karkay unhen maar daala jinhen marna naheen tha aur unhen zinda chhoda jinhen zinda naheen rahena tha.

²⁰is liyay rabb qaadir-ay-mutlaq farmaata hai ki main tumhaaray taaveezon say nipat loonga jin kay zareeay tum logon ko parindon kee tarah pakad letee ho. main jaadoogree kee yah cheezen tumhaaray baazooon say noch kar phaad daaloonga aur unhen riha karoonga jinhen tum nay parindon kee tarah pakad liya hai. ²¹main tumhaaray pardon ko phaad kar hata loonga aur apnee qaum ko tumhaaray haathon say bacha loonga. aainda vah tumhaara shikaar naheen rahegee. tab tum jaan logee ki main hee rabb hoon.

²²tum nay apnay jhoot say raastbaazon ko dukh pahunchaaya, haalaanki yah dukh meree taraf say naheen tha. saath saath tum nay bedeenon kee hausalaaafzaaee kee ki vah apnee buree raahon say baaz na aaen, haalaanki vah baaz aanay say bach jaatay. ²³is liyay aainda na tum farebdih roya dekhogee, na doosron kee qismat ka haal bataaogee. main apnee qaum ko tumhaaray haathon say chhutkaara doonga. tab tum jaan logee ki main hee rabb hoon’.”