Hizqeeel 12

nabee saamaan lapet kar jilaavatanee kee peshgoee karta hai

¹rabb mujh say hamkalaam hua, ²“ai aadamzaad, too ek sarkash qaum kay darmiyaan raheta hai. go un kee aankhen hain to bhee kuchh naheen dekhtay, go un kay kaan hain to bhee kuchh naheen suntay. kyoonki yah qaum hatdharm hai.

³ai aadamzaad, ab apna saamaan yoon lapet lay jis tarah tujhay jilaavatan kiya ja raha ho. phir din kay vaqt aur un kay dekhtay dekhtay ghar say ravaana ho kar kisee aur jagah chala ja. shaayad unhen samajh aaay ki unhen jilaavatan hona hai, haalaanki yah qaum sarkash hai. ⁴din kay vaqt un kay dekhtay dekhtay apna saamaan ghar say nikaal lay, yoon jaisay too jilaavatanee kay liyay tayyaariyaan kar raha ho. phir shaam kay vaqt un kee maujoodgee men jilaavatan ka sa kirdaar ada karkay ravaana ho ja. ⁵ghar say nikalnay kay liyay deevaar men sooraakh bana, phir apna saara saamaan us men say baahar lay ja. sab is kay gavaah hon. ⁶un kay dekhtay dekhtay andheray men apna saamaan kandhay par rakh kar vahaan say nikal ja. lekin apna munh dhaamp lay taaki too mulk ko dekh na sakay. laazim hai ki too yah sab kuchh karay, kyoonki main nay muqarrar kiya hai ki too israaeelee qaum ko aagaah karnay ka nishaan ban jaaay.”

⁷main nay vaisa hee kiya jaisa rabb nay mujhay hukm diya tha. main nay apna saamaan yoon lapet liya jaisay mujhay jilaavatan kiya ja raha ho. din kay vaqt main usay ghar say baahar lay gaya, shaam ko main nay apnay haathon say deevaar men sooraakh bana liya. logon kay dekhtay dekhtay main saamaan ko apnay kandhay par utha kar vahaan say nikal aaya. utnay men andhera ho gaya tha.

⁸subah kay vaqt rabb ka kalaam mujh par naazil hua, ⁹“ai aadamzaad, is hatdharm qaum israaeel nay tujh say poochha ki too kya kar raha hai? ¹⁰unhen javaab day, ‘rabb qaadir-ay-mutlaq farmaata hai ki is paighaam ka taalluq yarooshalam kay raees aur shaher men basnay vaalay tamaam israaeeliyon say hai.’ ¹¹unhen bata, ‘main tumhen aagaah karnay ka nishaan hoon. jo kuchh main nay kiya vah tumhaaray saath ho jaaega. tum qaidee ban kar jilaavatan ho jaaogay. ¹²jo raees tumhaaray darmiyaan hai vah andheray men apna saamaan kandhay par utha kar chala jaaega. deevaar men sooraakh banaaya jaaega taaki vah nikal sakay. vah apna munh dhaamp lega taaki mulk ko na dekh sakay. ¹³lekin main apna jaal us par daal doonga, aur vah meray phanday men phans jaaega. main usay baabal laaoonga jo baabliyon kay mulk men hai, agarchi vah usay apnee aankhon say naheen dekhega. vaheen vah vafaat paaega. ¹⁴jitnay bhee mulaazim aur dastay us kay ird-gird hongay un sab ko main hava men uda kar chaaron taraf muntashir kar doonga. apnee talvaar ko miyaan say khainch kar main un kay peechhay pada rahoonga. ¹⁵jab main unhen deegar aqvaam aur mukhtalif mamaalik men muntashir karoonga to vah jaan lengay ki main hee rabb hoon. ¹⁶lekin main un men say chand ek ko bacha kar talvaar, kaal aur muhalak vaba kee zad men naheen aanay doonga. kyoonki laazim hai ki jin aqvaam men bhee vah ja basen vahaan vah apnee makrooh harkaten sunaaen. tab yah aqvaam bhee jaan lengee ki main hee rabb hoon’.”

ek aur nishaan : hizqeeel ka kaampnaa

¹⁷rabb mujh say hamkalaam hua, ¹⁸“ai aadamzaad, khaana khaatay vaqt apnee rotee ko laraztay huay kha aur apnay paanee ko pareshaanee kay maaray thartharaatay huay pee. ¹⁹saath saath ummat ko bata, ‘rabb qaadir-ay-mutlaq farmaata hai ki mulk-ay-israaeel kay shaher yarooshalam kay baashinday pareshaanee men apna khaana khaaengay aur dahshatzada haalat men apna paanee piengay, kyoonki un ka mulk tabaah aur har barkat say khaalee ho jaaega. aur sabab us kay baashindon ka zulm-o-tashaddud hoga. ²⁰jin shaheron men log ab tak aabaad hain vah barbaad ho jaaengay, mulk veeraan-o-sunsaan ho jaaega. tab tum jaan logay ki main hee rabb hoon’.”

allaah ka kalaam jald hee poora ho jaaegaa

²¹rabb mujh say hamkalaam hua, ²²“ai aadamzaad, yah kaisee kahaavat hai jo mulk-ay-israaeel men aam ho gaee hai? log kahetay hain, ‘joon joon din guzartay jaatay hain toon toon har roya ghalat saabit hotee jaatee hai.’ ²³javaab men unhen bata, ‘rabb qaadir-ay-mutlaq farmaata hai ki main is kahaavat ko khatm karoonga, aainda yah israaeel men istemaal naheen hogee.’ unhen yah bhee bata, ‘vah vaqt qareeb hee hai jab har roya pooree ho jaaegee. ²⁴kyoonki aainda israaeelee qaum men na farebdih roya, na chaaploosee kee peshgoiyaan paaee jaaengee. ²⁵kyoonki main rabb hoon. jo kuchh main farmaata hoon vah vujood men aata hai. ai sarkash qaum, der naheen hogee balki tumhaaray hee ayyaam men main baat bhee karoonga aur usay poora bhee karoonga.’ yah rabb qaadir-ay-mutlaq ka farmaan hai.”

²⁶rabb mazeed mujh say hamkalaam hua, ²⁷“ai aadamzaad, israaeelee qaum teray baaray men kahetee hai, ‘jo roya yah aadmee dekhta hai vah badee der kay baad hee pooree hogee, us kee peshgoiyaan door kay mustaqbil kay baaray men hain.’ ²⁸lekin unhen javaab day, ‘rabb qaadir-ay-mutlaq farmaata hai ki jo kuchh bhee main farmaata hoon us men mazeed der naheen hogee balki vah jald hee poora hoga.’ yah rabb qaadir-ay-mutlaq ka farmaan hai.”