Hizqeeel 11
allaah kee yarooshalam kay buzurgon kay liyay sakht sazaa
1tab rooh mujhay utha kar rabb kay ghar kay mashriqee darvaazay kay paas lay gaya. vahaan darvaazay par 25 mard khaday thay. main nay dekha ki qaum kay do buzurg yaazaniyaah bin azzoor aur falatiyaah bin binaayaah bhee un men shaamil hain. 2rabb nay farmaaya, “ai aadamzaad, yah vahee mard hain jo shareer mansoobay baandh rahay aur yarooshalam men buray mashvray day rahay hain. 3yah kahetay hain, ‘aanay vaalay dinon men ghar taameer karnay kee zaroorat naheen. hamaara shaher to deg hai jabki ham us men paknay vaala behtareen gosht hain.’ 4aadamzaad, choonki vah aisee baaten kartay hain is liyay nubuvvat kar! un kay khilaaf nubuvvat kar!”
5tab rabb ka rooh mujh par a thahera, aur us nay mujhay yah pesh karnay ko kaha, “rabb farmaata hai, ‘ai israaeelee qaum, tum is qism kee baaten kartay ho. main to un khayaalaat say khoob vaaqif hoon jo tumhaaray dilon say ubhartay rahetay hain. 6tum nay is shaher men mut’addid logon ko qatl karkay us kee galiyon ko laashon say bhar diya hai.’
7chunaanchay rabb qaadir-ay-mutlaq farmaata hai, ‘beshak shaher deg hai, lekin tum us men paknay vaala achchha gosht naheen hogay balki vahee jin ko tum nay us kay darmiyaan qatl kiya hai. tumhen main is shaher say nikaal doonga. 8jis talvaar say tum dartay ho, usee ko main tum par naazil karoonga.’ yah rabb qaadir-ay-mutlaq ka farmaan hai. 9‘main tumhen shaher say nikaaloonga aur pardesiyon kay havaalay karkay tumhaaree adaalat karoonga. 10tum talvaar kee zad men a kar mar jaaogay. israaeel kee hudood par hee main tumhaaree adaalat karoonga. tab tum jaan logay ki main hee rabb hoon. 11chunaanchay na yarooshalam shaher tumhaaray liyay deg hoga, na tum us men behtareen gosht hogay balki main israaeel kee hudood hee par tumhaaree adaalat karoonga. 12tab tum jaan logay ki main hee rabb hoon, jis kay ahkaam kay mutaabiq tum nay zindagee naheen guzaaree. kyoonki tum nay meray usoolon kee pairvee naheen kee balki apnee padosee qaumon kay usoolon kee’.”
13main abhee is peshgoee ka elaan kar raha tha ki falatiyaah bin binaayaah faut hua. yah dekh kar main munh kay bal gir gaya aur buland aavaaz say cheekh utha, “haay, haay! ai rabb qaadir-ay-mutlaq, kya too israaeel kay bachay khachay hissay ko saraasar mitaana chaahata hai?”
allaah israaeel ko bahaal karegaa
14rabb mujh say hamkalaam hua, 15“ai aadamzaad, yarooshalam kay baashinday teray bhaaiyon, teray rishtedaaron aur baabal men jilaavatan huay tamaam israaeeliyon kay baaray men kah rahay hain, ‘yah log rabb say kaheen door ho gaay hain, ab israaeel hamaaray hee qabzay men hai.’ 16jo is qism kee baaten kartay hain unhen javaab day, rabb qaadir-ay-mutlaq farmaata hai ki jee haan, main nay unhen door door bhaga diya, aur ab vah deegar qaumon kay darmiyaan hee rahetay hain. main nay khud unhen mukhtalif mamaalik men muntashir kar diya, aisay ilaaqon men jahaan unhen maqdis men meray huzoor aanay ka mauqa thoda hee milta hai. 17lekin rabb qaadir-ay-mutlaq yah bhee farmaata hai, ‘main tumhen deegar qaumon men say nikaal loonga, tumhen un mulkon say jama karoonga jahaan main nay tumhen muntashir kar diya tha. tab main tumhen mulk-ay-israaeel dubaara ata karoonga.’
18phir vah yahaan a kar tamaam makrooh but aur ghinaunee cheezen door karengay. 19us vaqt main unhen naya dil bakhsh kar un men naee rooh daaloonga. main un ka sangeen dil nikaal kar unhen gosht-post ka narm dil ata karoonga. 20tab vah meray ahkaam kay mutaabiq zindagee guzaarengay aur dhyaan say meree hidaayaat par amal karengay. vah meree qaum hongay, aur main un ka khuda hoonga. 21lekin jin logon kay dil un kay ghinaunay buton say liptay rahetay hain un kay sar par main un kay ghalat kaam ka munaasib ajr laaoonga. yah rabb qaadir-ay-mutlaq ka farmaan hai.”
rabb yarooshalam ko chhod deta hai
22phir karoobee farishton nay apnay paron ko phailaaya, un kay pahiay harkat men a gaay aur khuda-ay- israaeel ka jalaal jo un kay oopar thaa 23uth kar shaher say nikal gaya. chaltay chaltay vah yarooshalam kay mashriq men vaaqay pahaad par thaher gaya. 24allaah kay rooh kee ataakarada is roya men rooh mujhay utha kar mulk-ay-baabal kay jilaavatanon kay paas vaapas lay gaya. phir roya khatm huee, 25aur main nay jilaavatanon ko sab kuchh sunaaya jo rabb nay mujhay dikhaaya tha.