Hizqeeel 10
1main nay us gumbad par nazar daalee jo karoobee farishton kay saron kay oopar phailee huee thee. us par sang-ay-laajvard [a] lapis lazuli ka takht sa nazar aaya. 2rabb nay kataan say mulabbas mard say farmaaya, “karoobee farishton kay neechay lagay pahiyon kay beech men ja. vahaan say do mutthee bhar koilay lay kar shaher par bikher day.” aadmee meray dekhtay dekhtay farishton kay beech men chala gaya. 3us vaqt karoobee farishtay rabb kay ghar kay junoob men khaday thay, aur androonee sahen baadal say bhara hua tha.
4phir rabb ka jalaal jo karoobee farishton kay oopar thahera hua tha vahaan say uth kar rabb kay ghar kee daheleez par ruk gaya. poora makaan baadal say bhar gaya balki sahen bhee rabb kay jalaal kee aab-o-taab say bhar gaya. 5karoobee farishtay apnay paron ko itnay zor say phadaphda rahay thay ki us ka shor bairoonee sahen tak sunaaee day raha tha. yoon lag raha tha ki qaadir-ay-mutlaq khuda bol raha hai. 6jab rabb nay kataan say mulabbas aadmee ko hukm diya ki karoobee farishton kay pahiyon kay beech men say jaltay huay koilay lay to vah un kay darmiyaan chal kar ek pahiay kay paas khada hua. 7phir karoobee farishton men say ek nay apna haath badha kar beech men jalnay vaalay koilon men say kuchh lay liya aur aadmee kay haathon men daal diya. kataan say mulabbas yah aadmee koilay lay kar chala gaya.
rabb apnay ghar ko chhod deta hai
8main nay dekha ki karoobee farishton kay paron kay neechay kuchh hai jo insaanee haath jaisa lag raha hai. 9har farishtay kay paas ek pahiya tha. pukhraaj [b] topas say banay yah chaar pahie 10ek jaisay thay. har pahiay kay andar ek aur pahiya zaaviya-ay-qaaima men ghoom raha tha, 11is liyay yah muday baghair har rukh ikhtiyaar kar saktay thay. jis taraf ek chal padta us taraf baaqee bhee muday baghair chalnay lagtay. 12farishton kay jismon kee har jagah par aankhen hee aankhen theen. aankhen na sirf saamnay nazar aaeen balki un kee peeth, haathon aur paron par bhee balki chaaron pahiyon par bhee. 13to bhee yah pahiay hee thay, kyoonki main nay khud suna ki un kay liyay yahee naam istemaal hua.
14har farishtay kay chaar chiharay thay. pahela chihara karoobee ka, doosra aadmee ka, teesra sherbabar ka aur chautha uqaab ka chihara tha. 15phir karoobee farishtay ud gaay. vahee jaandaar thay jinhen main darya-ay-kibaar kay kinaaray dekh chuka tha. 16jab farishtay harkat men a jaatay to pahiay bhee chalnay lagtay, aur jab farishtay phadaphda kar udnay lagtay to pahiay bhee un kay saath udnay lagtay. 17farishton kay ruknay par pahiay ruk jaatay, aur un kay udnay par yah bhee ud jaatay, kyoonki jaandaaron kee rooh un men thee.
18phir rabb ka jalaal apnay ghar kee daheleez say hat gaya aur dubaara karoobee farishton kay oopar a kar thaher gaya. 19meray dekhtay dekhtay farishtay apnay paron ko phaila kar chal paday. chaltay chaltay vah rabb kay ghar kay mashriqee darvaazay kay paas ruk gaay. khuda-ay- israaeel ka jalaal un kay oopar thahera raha.
20vahee jaandaar thay jinhen main nay darya-ay-kibaar kay kinaaray khuda-ay- israaeel kay neechay dekha tha. main nay jaan liya ki yah karoobee farishtay hain. 21har ek kay chaar chiharay aur chaar par thay, aur paron kay neechay kuchh nazar aaya jo insaanee haathon kee maanind tha. 22un kay chiharon kee shakl-o-soorat un chiharon kee maanind thee jo main nay darya-ay-kibaar kay kinaaray dekhay thay. chaltay vaqt har jaandaar seedha apnay kisee ek chiharay ka rukh ikhtiyaar karta tha.