Hizqeeel 1
allaah kay rath kee royaa
1-3 jab main yaanee imaam hizqeeel bin boozee tees saal ka tha to main yahoodaah kay jilaavatanon kay saath mulk-ay-baabal kay darya kibaar kay kinaaray thahera hua tha. yahooyaakeen baadshaah ko jilaavatan huay paanch saal ho gaay thay. chauthay maheenay kay paanchven din [a] 31 julaaee. aasmaan khul gaya aur allaah nay mujh par mukhtalif royaaen zaahir keen. us vaqt rabb mujh say hamkalaam hua, aur us ka haath mujh par a thahera.
4roya men main nay zabardast aandhee dekhee jis nay shimaal say a kar bada baadal meray paas pahunchaaya. baadal men chamaktee damaktee aag nazar aaee, aur vah tez raushnee say ghira hua tha. aag ka markaz chamakdaar dhaat kee tarah tamatma raha tha.
5aag men chaar jaandaaron jaisay chal rahay thay jin kee shakl-o-soorat insaanee thee. 6lekin har ek kay chaar chiharay aur chaar par thay. 7un kee taangen insaanon jaisee seedhee theen, lekin paaon kay talvay bachhdon kay say khur thay. vah paalish kiay huay peetal kee tarah jagamga rahay thay. 8chaaron kay chiharay aur par thay, aur chaaron paron kay neechay insaanee haath dikhaaee diay. 9jaandaar apnay paron say ek doosray ko chhoo rahay thay. chaltay vaqt mudnay kee zaroorat naheen thee, kyoonki har ek kay chaar chiharay chaaron taraf dekhtay thay. jab kabhee kisee simt jaana hota to usee simt ka chihara chal padta. 10chaaron kay chiharay ek jaisay thay. saamnay ka chihara insaan ka, daaeen taraf ka chihara sherbabar ka, baaeen taraf ka chihara bail ka aur peechhay ka chihara uqaab ka tha. 11un kay par oopar kee taraf phailay huay thay. do par baaen aur daaen haath kay jaandaaron say lagtay thay, aur do par un kay jismon ko dhaampay rakhtay thay. 12jahaan bhee allaah ka rooh jaana chaahata tha vahaan yah jaandaar chal padtay. unhen mudnay kee zaroorat naheen thee, kyoonki vah hamesha apnay chaaron chiharon men say ek ka rukh ikhtiyaar kartay thay.
13jaandaaron kay beech men aisa lag raha tha jaisay koilay dahek rahay hon, ki un kay darmiyaan mash’alen idhar udhar chal rahee hon. jhilamilaatee aag men say bijlee bhee chamak kar nikaltee thee. 14jaandaar khud itnee tezee say idhar udhar ghoom rahay thay ki baadal kee bijlee jaisay nazar a rahay thay.
15jab main nay ghaur say un par nazar daalee to dekha ki har ek jaandaar kay paas pahiya hai jo zameen ko chhoo raha hai. 16lagta tha ki chaaron pahiay pukhraaj [b] topas say banay huay hain. chaaron ek jaisay thay. har pahiay kay andar ek aur pahiya zaaviya-ay-qaaima men ghoom raha tha, 17is liyay vah muday baghair har rukh ikhtiyaar kar saktay thay. 18un kay lambay chakkar khaufnaak thay, aur chakkaron kee har jagah par aankhen hee aankhen theen. 19jab chaar jaandaar chaltay to chaaron pahiay bhee saath chaltay, jab jaandaar zameen say udtay to pahiay bhee saath udtay thay. 20jahaan bhee allaah ka rooh jaata vahaan jaandaar bhee jaatay thay. pahiay bhee ud kar saath saath chaltay thay, kyoonki jaandaaron kee rooh pahiyon men thee. 21jab kabhee jaandaar chaltay to yah bhee chaltay, jab ruk jaatay to yah bhee ruk jaatay, jab udtay to yah bhee udtay. kyoonki jaandaaron kee rooh pahiyon men thee.
22jaandaaron kay saron kay oopar gumbad sa phaila hua tha jo saaf-shaffaaf billaur jaisee lag raha tha. usay dekh kar insaan ghabra jaata tha. 23chaaron jaandaar is gumbad kay neechay thay, aur har ek apnay paron ko phaila kar ek say baaeen taraf kay saathee aur doosray say daaeen taraf kay saathee ko chhoo raha tha. baaqee do paron say vah apnay jism ko dhaampay rakhta tha. 24chaltay vaqt un kay paron ka shor mujh tak pahuncha. yoon lag raha tha jaisay qareeb hee zabardast aabshaar bah rahee ho, ki qaadir-ay-mutlaq koee baat farma raha ho, ya ki koee lashkar harkat men a gaya ho. ruktay vaqt vah apnay paron ko neechay lataknay detay thay.
25phir gumbad kay oopar say aavaaz sunaaee dee, aur jaandaaron nay ruk kar apnay paron ko lataknay diya. 26main nay dekha ki un kay saron kay oopar kay gumbad par sang-ay-laajvard [c] lapis lazuli ka takht sa nazar a raha hai jis par koee baitha tha jis kee shakl-o-soorat insaan kee maanind hai. 27lekin kamar say lay kar sar tak vah chamakdaar dhaat kee tarah tamatma raha tha, jabki kamar say lay kar paaon tak aag kee maanind bhadak raha tha. tez raushnee us kay ird-gird jhilmila rahee thee. 28usay dekh kar qaus-ay-quzah kee vah aab-o-taab yaad aatee thee jo baarish hotay vaqt baadal men dikhaaee detee hai. yoon rabb ka jalaal nazar aaya. yah dekhtay hee main aundhay munh gir gaya. isee haalat men koee mujh say baat karnay laga.