Ḵẖurooj 9
maveshiyon men vabaa
1phir rabb nay moosa say kaha, “firaaun kay paas ja kar usay bata ki rabb ibraaniyon ka khuda farmaata hai, ‘meree qaum ko jaanay day taaki vah meree ibaadat kar saken.’ 2agar aap inkaar karen aur unhen roktay rahen 3to rabb apnee qudrat ka izhaar karkay aap kay maveshiyon men bhayaanak vaba phaila dega jo aap kay ghodon, gadhon, oonton, gaay-bailon, bhed-bakriyon aur mendhon men phail jaaegee. 4lekin rabb israaeel aur misr kay maveshiyon men imtiyaaz karega. israaeeliyon ka ek bhee jaanvar naheen marega. 5rabb nay faisla kar liya hai ki vah kal hee aisa karega.”
6aglay din rabb nay aisa hee kiya. misr kay tamaam maveshee mar gaay, lekin israaeeliyon ka ek bhee jaanvar na mara. 7firaaun nay kuchh logon ko un kay paas bhej diya to pata chala ki ek bhee jaanvar naheen mara. taaham firaaun ada raha. us nay israaeeliyon ko jaanay na diya.
phoday-phunsiyaan
8phir rabb nay moosa aur haaroon say kaha, “apnee mutthiyaan kisee bhattee kee raakh say bhar kar firaaun kay paas jaao. phir moosa firaaun kay saamnay yah raakh hava men uda day. 9yah raakh baareek dhool ka baadal ban jaaegee jo pooray mulk par chha jaaega. us kay asar say logon aur jaanvaron kay jismon par phoday-phunsiyaan phoot nikalengay.”
10moosa aur haaroon nay aisa hee kiya. vah kisee bhattee say raakh lay kar firaaun kay saamnay khaday ho gaay. moosa nay raakh ko hava men uda diya to insaanon aur jaanvaron kay jismon par phoday-phunsiyaan nikal aaay. 11is martaba jaadoogar moosa kay saamnay khaday bhee na ho sakay kyoonki un kay jismon par bhee phoday nikal aaay thay. tamaam misriyon ka yahee haal tha. 12lekin rabb nay firaaun ko ziddee banaaay rakha, is liyay us nay moosa aur haaroon kee na sunee. yoon vaisa hee hua jaisa rabb nay moosa ko bataaya tha.
ole
13is kay baad rabb nay moosa say kaha, “subah-saveray uth aur firaaun kay saamnay khaday ho kar usay bata ki rabb ibraaniyon ka khuda farmaata hai, ‘meree qaum ko jaanay day taaki vah meree ibaadat kar saken. 14varna main apnee tamaam aaften tujh par, teray uhdedaaron par aur teree qaum par aanay doonga. phir too jaan lega ki tamaam duniya men mujh jaisa koee naheen hai. 15agar main chaahata to apnee qudrat say aisee vaba phaila sakta ki tujhay aur teree qaum ko duniya say mita diya jaata. 16lekin main nay tujhay is liyay barpa kiya hai ki tujh par apnee qudrat ka izhaar karoon aur yoon tamaam duniya men meray naam ka parchaar kiya jaaay. 17too abhee tak apnay aap ko sarfaraaz karkay meree qaum kay khilaaf hai aur unhen jaanay naheen deta. 18is liyay kal main isee vaqt bhayaanak qism kay olon ka toofaan bhej doonga. misree qaum kee ibtida say lay kar aaj tak misr men olon ka aisa toofaan kabhee naheen aaya hoga. 19apnay bandon ko abhee bhejna taaki vah teray maveshiyon ko aur kheton men paday teray maal ko la kar mahfooz kar len. kyoonki jo bhee khulay maidaan men rahega vah olon say mar jaaega, khwaah insaan ho ya haivaan’.”
20firaaun kay kuchh uhdedaar rabb ka paighaam sun kar dar gaay aur bhaag kar apnay jaanvaron aur ghulaamon ko gharon men lay aaay. 21lekin doosron nay rabb kay paighaam kee parva na kee. un kay jaanvar aur ghulaam baahar khulay maidaan men rahay.
22rabb nay moosa say kaha, “apna haath aasmaan kee taraf badha day. phir misr kay tamaam insaanon, jaanvaron aur kheton kay paudon par olay padengay.” 23moosa nay apnee laathee aasmaan kee taraf uthaaee to rabb nay ek zabardast toofaan bhej diya. olay paday, bijlee giree aur baadal garajtay rahay. 24olay padtay rahay aur bijlee chamaktee rahee. misree qaum kee ibtida say lay kar ab tak aisay khatarnaak olay kabhee naheen paday thay. 25insaanon say lay kar haivaanon tak kheton men sab kuchh barbaad ho gaya. olon nay kheton men tamaam pauday aur darakht bhee tod diay. 26vah sirf jushan kay ilaaqay men na paday jahaan israaeelee aabaad thay.
27tab firaaun nay moosa aur haaroon ko bulaaya. us nay kaha, “is martaba main nay gunaah kiya hai. rabb haq par hai. mujh say aur meree qaum say ghaltee huee hai. 28olay aur allaah kee garajtee aavaazen hadd say ziyaada hain. rabb say dua karo taaki olay ruk jaaen. ab main tumhen jaanay doonga. ab say tumhen yahaan rahena naheen padega.”
29moosa nay firaaun say kaha, “main shaher say nikal kar donon haath rabb kee taraf utha kar dua karoonga. phir garaj aur olay ruk jaaengay aur aap jaan lengay ki pooree duniya rabb kee hai. 30lekin main jaanta hoon ki aap aur aap kay uhdedaar abhee tak rabb khuda ka khauf naheen maantay.”
31us vaqt san kay phool nikal chukay thay aur jau kee baalen lag gaee theen. is liyay yah faslen tabaah ho gaeen. 32lekin gehoon aur ek aur qism kee gandum jo baad men paktee hai barbaad na huee.
33moosa firaaun ko chhod kar shaher say nikla. us nay rabb kee taraf apnay haath uthaaay to garaj, olay aur baarish ka toofaan ruk gaya. 34jab firaaun nay dekha ki toofaan khatm ho gaya hai to vah aur us kay uhdedaar dubaara gunaah karkay akad gaay. 35firaaun ada raha aur israaeeliyon ko jaanay na diya. vaisa hee hua jaisa rabb nay moosa say kaha tha.