Ḵẖurooj 8
mendhak
1phir rabb nay moosa say kaha, “firaaun kay paas ja kar usay bata dena ki rabb farmaata hai, ‘meree qaum ko meree ibaadat karnay kay liyay jaanay day, 2varna main pooray misr ko mendhkon say saza doonga. 3darya-ay-neel mendhkon say itna bhar jaaega ki vah darya say nikal kar teray mahel, teray sonay kay kamray aur teray bistar men ja ghusengay. vah teray uhdedaaron aur teree r’aaya kay gharon men aaengay balki tumhaaray tanooron aur aata goondhnay kay bartanon men bhee phudaktay phirengay. 4mendhak tujh par, teree qaum par aur teray uhdedaaron par chadh jaaengay’.”
5rabb nay moosa say kaha, “haaroon ko bata dena ki vah apnee laathee ko haath men lay kar usay daryaaon, naheron aur johadon kay oopar uthaaay taaki mendhak baahar nikal kar misr kay mulk men phail jaaen.” 6haaroon nay mulk-ay-misr kay paanee kay oopar apnee laathee uthaaee to mendhkon kay ghol paanee say nikal kar pooray mulk par chha gaay. 7lekin jaadoogaron nay bhee apnay jaadoo say aisa hee kiya. vah bhee darya say mendhak nikaal laaay.
8firaaun nay moosa aur haaroon ko bula kar kaha, “rabb say dua karo ki vah mujh say aur meree qaum say mendhkon ko door karay. phir main tumhaaree qaum ko jaanay doonga taaki vah rabb ko qurbaaniyaan pesh karen.”
9moosa nay javaab diya, “vah vaqt muqarrar karen jab main aap kay uhdedaaron aur aap kee qaum kay liyay dua karoon. phir jo mendhak aap kay paas aur aap kay gharon men hain usee vaqt khatm ho jaaengay. mendhak sirf darya men paaay jaaengay.”
10firaaun nay kaha, “theek hai, kal unhen khatm karo.” moosa nay kaha, “jaisa aap kahetay hain vaisa hee hoga. is tarah aap ko maaloom hoga ki hamaaray khuda kee maanind koee naheen hai. 11mendhak aap, aap kay gharon, aap kay uhdedaaron aur aap kee qaum ko chhod kar sirf darya men rah jaaengay.”
12moosa aur haaroon firaaun kay paas say chalay gaay, aur moosa nay rabb say minnat kee ki vah mendhkon kay vah ghol door karay jo us nay firaaun kay khilaaf bhejay thay. 13rabb nay us kee dua sunee. gharon, sahenon aur kheton men mendhak mar gaay. 14logon nay unhen jama karkay un kay dher laga diay. un kee badboo pooray mulk men phail gaee.
15lekin jab firaaun nay dekha ki masla hal ho gaya hai to vah phir akad gaya aur un kee na sunee. yoon rabb kee baat durust niklee.
jooen
16phir rabb nay moosa say kaha, “haaroon say kahena ki vah apnee laathee say zameen kee gard ko maaray. jab vah aisa karega to pooray misr kee gard jooon men badal jaaegee.”
17unhon nay aisa hee kiya. haaroon nay apnee laathee say zameen kee gard ko maara to pooray mulk kee gard jooon men badal gaee. un kay ghol jaanvaron aur aadmiyon par chha gaay. 18jaadoogaron nay bhee apnay jaadoo say aisa karnay kee koshish kee, lekin vah gard say jooen na bana sakay. jooen aadmiyon aur jaanvaron par chha gaeen. 19jaadoogaron nay firaaun say kaha, “allaah kee qudrat nay yah kiya hai.” lekin firaaun nay un kee na sunee. yoon rabb kee baat durust niklee.
kaatnay vaalee makkhiyaan
20phir rabb nay moosa say kaha, “jab firaaun subah-saveray darya par jaaay to too us kay raastay men khada ho jaana. usay kahena ki rabb farmaata hai, ‘meree qaum ko jaanay day taaki vah meree ibaadat kar saken. 21varna main teray aur teray uhdedaaron kay paas, teree qaum kay paas aur teray gharon men kaatnay vaalee makkhiyaan bhej doonga. misriyon kay ghar makkhiyon say bhar jaaengay balki jis zameen par vah khaday hain vah bhee makkhiyon say dhaankee jaaegee. 22lekin us vaqt main apnee qaum kay saath jo jushan men rahetee hai farq sulook karoonga. vahaan ek bhee kaatnay vaalee makkhee naheen hogee. is tarah tujhay pata lagega ki is mulk men main hee rabb hoon. 23main apnee qaum aur teree qaum men imtiyaaz karoonga. kal hee meree qudrat ka izhaar hoga’.”
24rabb nay aisa hee kiya. kaatnay vaalee makkhiyon kay ghol firaaun kay mahel, us kay uhdedaaron kay gharon aur pooray misr men phail gaay. mulk ka satyaanaas ho gaya.
25phir firaaun nay moosa aur haaroon ko bula kar kaha, “chalo, isee mulk men apnay khuda ko qurbaaniyaan pesh karo.” 26lekin moosa nay kaha, “yah munaasib naheen hai. jo qurbaaniyaan ham rabb apnay khuda ko pesh karengay vah misriyon kee nazar men ghinaunee hain. agar ham yahaan aisa karen to kya vah hamen sangasaar naheen karengay? 27is liyay laazim hai ki ham teen din ka safar karkay registaan men hee rabb apnay khuda ko qurbaaniyaan pesh karen jis tarah us nay hamen hukm bhee diya hai.”
28firaaun nay javaab diya, “theek hai, main tumhen jaanay doonga taaki tum registaan men rabb apnay khuda ko qurbaaniyaan pesh karo. lekin tumhen ziyaada door naheen jaana hai. aur meray liyay bhee dua karna.”
29moosa nay kaha, “theek, main jaatay hee rabb say dua karoonga. kal hee makkhiyaan firaaun, us kay uhdedaaron aur us kee qaum say door ho jaaengee. lekin hamen dubaara fareb na dena balki hamen jaanay dena taaki ham rabb ko qurbaaniyaan pesh kar saken.”
30phir moosa firaaun kay paas say chala gaya aur rabb say dua kee. 31rabb nay moosa kee dua sunee. kaatnay vaalee makkhiyaan firaaun, us kay uhdedaaron aur us kee qaum say door ho gaeen. ek bhee makkhee na rahee. 32lekin firaaun phir akad gaya. us nay israaeeliyon ko jaanay na diya.