Ḵẖurooj 7
1lekin rabb nay kaha, “dekh, meray kahenay par too firaaun kay liyay allaah kee haisiyat rakhega aur tera bhaaee haaroon tera paighambar hoga. 2jo bhee hukm main tujhay doonga usay too haaroon ko bata day. phir vah sab kuchh firaaun ko bataaay taaki vah israaeeliyon ko apnay mulk say jaanay day. 3lekin main firaaun ko ad jaanay doonga. agarchi main misr men bahut say nishaanon aur mojizon say apnee qudrat ka muzaahara karoongaa 4to bhee firaaun tumhaaree naheen sunega. tab misriyon par mera haath bhaaree ho jaaega, aur main un ko sakht saza day kar apnee qaum israaeel ko khaandaanon kee tarteeb kay mutaabiq misr say nikaal laaoonga. 5jab main misr kay khilaaf apnee qudrat ka izhaar karkay israaeeliyon ko vahaan say nikaaloonga to misree jaan lengay ki main rabb hoon.”
6moosa aur haaroon nay sab kuchh vaisa hee kiya jaisa rabb nay unhen hukm diya. 7firaaun say baat kartay vaqt moosa 80 saal ka aur haaroon 83 saal ka tha.
moosa kee laathee saamp ban jaatee hai
8rabb nay moosa aur haaroon say kaha, 9“jab firaaun tumhen mojiza dikhaanay ko kahega to moosa haaroon say kahay ki apnee laathee zameen par daal day. is par vah saamp ban jaaegee.”
10moosa aur haaroon nay firaaun kay paas ja kar aisa hee kiya. haaroon nay apnee laathee firaaun aur us kay uhdedaaron kay saamnay daal dee to vah saamp ban gaee. 11yah dekh kar firaaun nay apnay aalimon aur jaadoogaron ko bulaaya. jaadoogaron nay bhee apnay jaadoo say aisa hee kiya. 12har ek nay apnee laathee zameen par phainkee to vah saamp ban gaee. lekin haaroon kee laathee nay un kee laathiyon ko nigal liya.
13taaham firaaun is say mut’assir na hua. us nay moosa aur haaroon kee baat sunnay say inkaar kiya. vaisa hee hua jaisa rabb nay kaha tha.
paanee khoon men badal jaata hai
14phir rabb nay moosa say kaha, “firaaun ad gaya hai. vah meree qaum ko misr chhodnay say rokta hai. 15kal subah-saveray jab vah darya-ay-neel par aaega to us say milnay kay liyay darya kay kinaaray par khaday ho jaana. us laathee ko thaamay rakhna jo saamp ban gaee thee. 16jab vah vahaan pahunchay to us say kahena, ‘rabb ibraaniyon kay khuda nay mujhay aap ko yah bataanay kay liyay bheja hai ki meree qaum ko meree ibaadat karnay kay liyay registaan men jaanay day. lekin aap nay abhee tak us kee naheen sunee. 17chunaanchay ab aap jaan lengay ki vah rabb hai. main is laathee ko jo meray haath men hai lay kar darya-ay-neel kay paanee ko maaroonga. phir vah khoon men badal jaaega. 18darya-ay-neel kee machhliyaan mar jaaengee, darya say badboo uthegee aur misree darya ka paanee naheen pee sakengay’.”
19rabb nay moosa say kaha, “haaroon ko bata dena ki vah apnee laathee lay kar apna haath un tamaam jagahon kee taraf badhaaay jahaan paanee jama hota hai. tab misr kee tamaam nadiyon, naheron, johadon aur taalaabon ka paanee khoon men badal jaaega. pooray mulk men khoon hee khoon hoga, yahaan tak ki lakdee aur patthar kay bartanon ka paanee bhee khoon men badal jaaega.”
20chunaanchay moosa aur haaroon nay firaaun aur us kay uhdedaaron kay saamnay apnee laathee utha kar darya-ay-neel kay paanee par maaree. is par darya ka saara paanee khoon men badal gaya. 21darya kee machhliyaan mar gaeen, aur us say itnee badboo uthnay lagee ki misree us ka paanee na pee sakay. misr men chaaron taraf khoon hee khoon tha.
22lekin jaadoogaron nay bhee apnay jaadoo kay zareeay aisa hee kiya. is liyay firaaun ad gaya aur moosa aur haaroon kee baat na maanee. vaisa hee hua jaisa rabb nay kaha tha. 23firaaun palat kar apnay ghar vaapas chala gaya. usay us kee parva naheen thee jo moosa aur haaroon nay kiya tha. 24lekin misree darya say paanee na pee sakay, aur unhon nay peenay ka paanee haasil karnay kay liyay darya kay kinaaray kinaaray gadhay khoday. 25paanee kay badal jaanay kay baad saat din guzar gaay.