Ḵẖurooj 6
1rabb nay javaab diya, “ab too dekhega ki main firaaun kay saath kya kuchh karta hoon. meree azeem qudrat ka tajriba karkay vah meray logon ko jaanay dega balki unhen jaanay par majboor karega.”
2allaah nay moosa say yah bhee kaha, “main rabb hoon. 3main ibraaheem, ishaaq aur yaaqoob par zaahir hua. vah meray naam allaah qaadir-ay-mutlaq [a] ibraanee men el-shadaee. say vaaqif huay, lekin main nay un par apnay naam rab [b] ibraanee men yahevay. ka inkishaaf naheen kiya. 4main nay un say ahd karkay vaada kiya ki unhen mulk-ay-kan’aan doonga jis men vah ajnabee kay taur par rahetay thay. 5ab main nay suna hai ki israaeelee kis tarah misriyon kee ghulaamee men karaah rahay hain, aur main nay apna ahd yaad kiya hai. 6chunaanchay israaeeliyon ko bataana, ‘main rabb hoon. main tumhen misriyon kay jooay say aazaad karoonga aur un kee ghulaamee say bachaaoonga. main badee qudrat kay saath tumhen chhudaaoonga aur un kee adaalat karoonga. 7main tumhen apnee qaum banaaoonga aur tumhaara khuda hoonga. tab tum jaan logay ki main rabb tumhaara khuda hoon jis nay tumhen misriyon kay jooay say aazaad kar diya hai. 8main tumhen us mulk men lay jaaoonga jis ka vaada main nay qasam kha kar ibraaheem, ishaaq aur yaaqoob say kiya hai. vah mulk tumhaaree apnee milkiyat hoga. main rabb hoon’.”
9moosa nay yah sab kuchh israaeeliyon ko bata diya, lekin unhon nay us kee baat na maanee, kyoonki vah sakht kaam kay baais himmat haar gaay thay. 10tab rabb nay moosa say kaha, 11“ja, misr kay baadshaah firaaun ko bata dena ki israaeeliyon ko apnay mulk say jaanay day.” 12lekin moosa nay etiraaz kiya, “israaeelee meree baat sunna naheen chaahatay to firaaun kyoon meree baat maanay jabki main ruk ruk kar bolta hoon?”
13lekin rabb nay moosa aur haaroon ko hukm diya, “israaeeliyon aur misr kay baadshaah firaaun say baat karkay israaeeliyon ko misr say nikaalo.”
moosa aur haaroon kay aaba-o-ajdaad
14israaeel kay aabaaee gharaanon kay sarbaraah yah thay : israaeel kay pahelauthay roobin kay chaar betay hanook, falloo, hasron aur karmee thay. in say roobin kee chaar shaakhen nikleen.
15shamaaoon kay paanch betay yamooel, yameen, uhad, yakeen, suhar aur saaool thay. (saaool kan’aanee aurat ka bachcha tha). in say shamaaoon kee paanch shaakhen nikleen.
16laavee kay teen betay jairson, qihaat aur miraaree thay. (laavee 137 saal kee umr men faut hua).
17jairson kay do betay libnee aur simaee thay. in say jairson kee do shaakhen nikleen. 18qihaat kay chaar betay amraam, izhaar , habroon aur uzzeeel thay. (qihaat 133 saal kee umr men faut hua). 19miraaree kay do betay mahelee aur mooshee thay. in sab say laavee kee mukhtalif shaakhen nikleen.
20amraam nay apnee phoophee yookbid say shaadee kee. un kay do betay haaroon aur moosa paida huay. (amraam 137 saal kee umr men faut hua). 21izhaar kay teen betay qorah, nafaj aur zikree thay. 22uzzeeel kay teen betay meesaael, ilsafan aur sitree thay.
23haaroon nay ileesiba say shaadee kee. (ileesiba ammeenadaab kee betee aur nahson kee bahen thee). un kay chaar betay nadab, abeehoo, ileeazar aur itmar thay. 24qorah kay teen betay asseer, ilqaana aur abiyaasaf thay. un say qorahiyon kee teen shaakhen nikleen. 25haaroon kay betay ileeazar nay footeeel kee ek betee say shaadee kee. un ka ek beta feenhaas tha.
yah sab laavee kay aabaaee gharaanon kay sarbaraah thay.
26rabb nay amraam kay do beton haaroon aur moosa ko hukm diya ki meree qaum ko us kay khaandaanon kee tarteeb kay mutaabiq misr say nikaalo. 27in hee do aadmiyon nay misr kay baadshaah firaaun say baat kee ki israaeeliyon ko misr say jaanay day.
rabb dubaara moosa say hamkalaam hota hai
28misr men rabb nay moosa say kaha, 29“main rabb hoon. misr kay baadshaah ko vah sab kuchh bata dena jo main tujhay bataata hoon.” 30moosa nay etiraaz kiya, “main to ruk ruk kar bolta hoon. firaaun kis tarah meree baat maanega.”