Ḵẖurooj 5

moosa aur haaroon firaaun kay darbaar men

¹phir moosa aur haaroon firaaun kay paas gaay. unhon nay kaha, “rabb israaeel ka khuda farmaata hai, ‘meree qaum ko registaan men jaanay day taaki vah meray liyay eed manaaen’.” ²firaaun nay javaab diya, “yah rabb kaun hai? main kyoon us ka hukm maan kar israaeeliyon ko jaanay doon? na main rabb ko jaanta hoon, na israaeeliyon ko jaanay doonga.”

³haaroon aur moosa nay kaha, “ibraaniyon ka khuda ham par zaahir hua hai. is liyay meharbaanee karkay hamen ijaazat den ki registaan men teen din ka safar karkay rabb apnay khuda kay huzoor qurbaaniyaan pesh karen. kaheen vah hamen kisee beemaaree ya talvaar say na maaray.”

⁴lekin misr kay baadshaah nay inkaar kiya, “moosa aur haaroon, tum logon ko kaam say kyoon rok rahay ho? jaao, jo kaam ham nay tum ko diya hai us par lag jaao! ⁵israaeelee vaisay bhee taadaad men bahut badh gaay hain, aur tum unhen kaam karnay say rok rahay ho.”

javaab men firaaun ka sakht dabaao

⁶usee din firaaun nay misree nigraanon aur un kay tahet kay israaeelee nigraanon ko hukm diya, ⁷“ab say israaeeliyon ko eenten banaanay kay liyay bhoosa mat dena, balki vah khud ja kar bhoosa jama karen. ⁸to bhee vah utnee hee eenten banaaen jitnee pahelay banaatay thay. vah sust ho gaay hain aur isee liyay cheekh rahay hain ki hamen jaanay den taaki apnay khuda ko qurbaaniyaan pesh karen. ⁹un say aur ziyaada sakht kaam karaao, unhen kaam men lagaaay rakho. un kay paas itna vaqt hee na ho ki vah jhootee baaton par dhyaan den.”

¹⁰misree nigraan aur un kay tahet kay israaeelee nigraanon nay logon kay paas ja kar un say kaha, “firaaun ka hukm hai ki tumhen bhoosa na diya jaaay. ¹¹is liyay khud jaao aur bhoosa dhoond kar jama karo. lekin khabardaar! utnee hee eenten banaao jitnee pahelay banaatay thay.”

¹²yah sun kar israaeelee bhoosa jama karnay kay liyay pooray mulk men phail gaay. ¹³misree nigraan yah kah kar un par dabaao daaltay rahay ki utnee eenten banaao jitnee pahelay banaatay thay. ¹⁴jo israaeelee nigraan unhon nay muqarrar kiay thay unhen vah peettay aur kahetay rahay, “tum nay kal aur aaj utnee eenten kyoon naheen banvaaeen jitnee pahelay banvaatay thay?”

¹⁵phir israaeelee nigraan firaaun kay paas gaay. unhon nay shikaayat karkay kaha, “aap apnay khaadimon kay saath aisa sulook kyoon kar rahay hain? ¹⁶hamen bhoosa naheen diya ja raha aur saath saath yah kaha gaya hai ki utnee eenten banaao jitnee pahelay banaatay thay. nateejay men hamen maara peeta bhee ja raha hai haalaanki aisa karnay men aap kay apnay log ghaltee par hain.”

¹⁷firaaun nay javaab diya, “tum log sust ho, tum kaam karna naheen chaahatay. is liyay tum yah jagah chhodna aur rabb ko qurbaaniyaan pesh karna chaahatay ho. ¹⁸ab jaao, kaam karo. tumhen bhoosa naheen diya jaaega, lekin khabardaar! utnee hee eenten banaao jitnee pahelay banaatay thay.”

¹⁹jab israaeelee nigraanon ko bataaya gaya ki eenton kee matlooba taadaad kam na karo to vah samajh gaay ki ham phans gaay hain. ²⁰firaaun kay mahel say nikal kar un kee mulaaqaat moosa aur haaroon say huee jo un kay intizaar men thay. ²¹unhon nay moosa aur haaroon say kaha, “rabb khud aap kee adaalat karay. kyoonki aap kay sabab say firaaun aur us kay mulaazimon ko ham say ghin aatee hai. aap nay unhen hamen maar denay ka mauqa day diya hai.”

moosa kee shikaayat aur rabb ka javaab

²²yah sun kar moosa rabb kay paas vaapas aaya aur kaha, “ai aaqa, too nay is qaum say aisa bura sulook kyoon kiya? kya too nay isee maqsad say mujhay yahaan bheja hai? ²³jab say main nay firaaun kay paas ja kar usay teree marzee bataaee hai vah israaeelee qaum say bura sulook kar raha hai. aur too nay ab tak unhen bachaanay ka koee qadam naheen uthaaya.”