Ḵẖurooj 40

maqdis ko khada karnay kee hidaayaat

¹phir rabb nay moosa say kaha, ²“pahelay maheenay kee pahelee taareekh ko mulaaqaat ka khaima khada karna. ³ahd ka sandooq jis men shareeat kee takhtiyaan hain muqaddastareen kamray men rakh kar us kay darvaazay ka parda lagaana. ⁴is kay baad makhsoos rotiyon kee mez muqaddas kamray men la kar us par tamaam zarooree saamaan rakhna. us kamray men shamaadaan bhee lay aana aur us par us kay charaagh rakhna. ⁵bakhoor kee sonay kee qurbaangaah us parday kay saamnay rakhna jis kay peechhay ahd ka sandooq hai. phir khaimay men daakhil honay kay darvaazay par parda lagaana. ⁶jaanvaron ko chadhaanay kee qurbaangaah sahen men khaimay kay darvaazay kay saamnay rakhee jaaay. ⁷khaimay aur is qurbaangaah kay darmiyaan dhonay ka hauz rakh kar us men paanee daalna. ⁸sahen kee chaardeevaaree khadee karkay us kay darvaazay ka parda lagaana.

⁹phir masah ka tel lay kar usay khaimay aur us kay saaray saamaan par chhidak dena. yoon too usay meray liyay makhsoos karega aur vah muqaddas hoga. ¹⁰phir jaanvaron ko chadhaanay kee qurbaangaah aur us kay saamaan par masah ka tel chhidakna. yoon too usay meray liyay makhsoos karega aur vah nihaayat muqaddas hoga. ¹¹isee tarah hauz aur us dhaanchay ko bhee makhsoos karna jis par hauz rakha gaya hai.

¹²haaroon aur us kay beton ko mulaaqaat kay khaimay kay darvaazay par la kar ghusal karaana. ¹³phir haaroon ko muqaddas libaas pahenaana aur usay masah karkay meray liyay makhsoos-o-muqaddas karna taaki imaam kay taur par meree khidmat karay. ¹⁴us kay beton ko la kar unhen zerjaamay pahena dena. ¹⁵unhen un kay vaalid kee tarah masah karna taaki vah bhee imaamon kay taur par meree khidmat karen. jab unhen masah kiya jaaega to vah aur baad men un kee aulaad hamesha tak maqdis men is khidmat kay liyay makhsoos hongay.”

maqdis ko khada kiya jaata hai

¹⁶moosa nay sab kuchh rabb kee hidaayaat kay mutaabiq kiya. ¹⁷pahelay maheenay kee pahelee taareekh ko muqaddas khaima khada kiya gaya. unhen misr say niklay poora ek saal ho gaya tha. ¹⁸moosa nay deevaar kay takhton ko un kay paaiyon par khada karkay un kay saath shaheteer lagaaay. isee tarah us nay satoonon ko bhee khada kiya. ¹⁹us nay rabb kee hidaayaat kay ain mutaabiq deevaaron par kapday ka khaima lagaaya aur us par doosray ghilaaf rakhay.

²⁰us nay shareeat kee donon takhtiyaan lay kar ahd kay sandooq men rakh deen, uthaanay kay liyay lakdiyaan sandooq kay kadon men daal deen aur kaffaaray ka dhakna us par laga diya. ²¹phir us nay rabb kee hidaayaat kay ain mutaabiq sandooq ko muqaddastareen kamray men rakh kar us kay darvaazay ka parda laga diya. yoon ahd kay sandooq par parda pada raha. ²²moosa nay makhsoos rotiyon kee mez muqaddas kamray kay shimaalee hissay men us parday kay saamnay rakh dee jis kay peechhay ahd ka sandooq tha. ²³us nay rabb kee hidaayat kay ain mutaabiq rabb kay liyay makhsoos kee huee rotiyaan mez par rakheen. ²⁴usee kamray kay junoobee hissay men us nay shamaadaan ko mez kay muqaabil rakh diya. ²⁵us par us nay rabb kee hidaayat kay ain mutaabiq rabb kay saamnay charaagh rakh diay. ²⁶us nay bakhoor kee sonay kee qurbaangaah bhee usee kamray men rakhee, us parday kay bilkul saamnay jis kay peechhay ahd ka sandooq tha. ²⁷us nay us par rabb kee hidaayat kay ain mutaabiq khushboodaar bakhoor jalaaya.

²⁸phir us nay khaimay ka darvaaza laga diya. ²⁹baahar ja kar us nay jaanvaron ko chadhaanay kee qurbaangaah khaimay kay darvaazay kay saamnay rakh dee. us par us nay rabb kee hidaayat kay ain mutaabiq bhasm honay vaalee qurbaaniyaan aur ghalla kee nazren chadhaaeen.

³⁰us nay dhonay kay hauz ko khaimay aur us qurbaangaah kay darmiyaan rakh kar us men paanee daal diya. ³¹moosa, haaroon aur us kay betay usay apnay haath-paaon dhonay kay liyay istemaal kartay thay. ³²jab bhee vah mulaaqaat kay khaimay men daakhil hotay ya jaanvaron ko chadhaanay kee qurbaangaah kay paas aatay to rabb kee hidaayat kay ain mutaabiq pahelay ghusal kartay.

³³aakhir men moosa nay khaima, qurbaangaah aur chaardeevaaree khadee karkay sahen kay darvaazay ka parda laga diya. yoon moosa nay maqdis kee taameer mukammal kee.

khaimay men rabb ka jalaal

³⁴phir mulaaqaat kay khaimay par baadal chha gaya aur maqdis rabb kay jalaal say bhar gaya. ³⁵moosa khaimay men daakhil na ho saka, kyoonki baadal us par thahera hua tha aur maqdis rabb kay jalaal say bhar gaya tha.

³⁶tamaam safar kay dauraan jab bhee maqdis kay oopar say baadal uthta to israaeelee safar kay liyay tayyaar ho jaatay. ³⁷agar vah na uthta to vah us vaqt tak thaheray rahetay jab tak baadal uth na jaata. ³⁸din kay vaqt baadal maqdis kay oopar thahera raheta aur raat kay vaqt vah tamaam israaeeliyon ko aag kee soorat men nazar aata tha. yah silsila pooray safar kay dauraan jaaree raha.