Ḵẖurooj 4

¹moosa nay etiraaz kiya, “lekin israaeelee na meree baat ka yaqeen karengay, na meree sunengay. vah to kahengay, ‘rabb tum par zaahir naheen hua’.” ²javaab men rabb nay moosa say kaha, “too nay haath men kya pakda hua hai?” moosa nay kaha, “laathee.” ³rabb nay kaha, “usay zameen par daal day.” moosa nay aisa kiya to laathee saamp ban gaee, aur moosa dar kar bhaaga. ⁴rabb nay kaha, “ab saamp kee dum ko pakad lay.” moosa nay aisa kiya to saamp phir laathee ban gaya.

⁵rabb nay kaha, “yah dekh kar logon ko yaqeen aaega ki rabb jo un kay baapdaada ka khuda, ibraaheem ka khuda, ishaaq ka khuda aur yaaqoob ka khuda hai tujh par zaahir hua hai. ⁶ab apna haath apnay libaas men daal day.” moosa nay aisa kiya. jab us nay apna haath nikaala to vah barf kee maanind safed ho gaya tha. kodh jaisee beemaaree lag gaee thee. ⁷tab rabb nay kaha, “ab apna haath dubaara apnay libaas men daal.” moosa nay aisa kiya. jab us nay apna haath dubaara nikaala to vah phir sehatmand tha.

⁸rabb nay kaha, “agar logon ko pahela mojiza dekh kar yaqeen na aaay aur vah teree na sunen to shaayad unhen doosra mojiza dekh kar yaqeen aaay. ⁹agar unhen phir bhee yaqeen na aaay aur vah teree na sunen to darya-ay-neel say kuchh paanee nikaal kar usay khushk zameen par undel day. yah paanee zameen par girtay hee khoon ban jaaega.”

¹⁰lekin moosa nay kaha, “meray aaqa, main maazrat chaahata hoon, main achchhee tarah baat naheen kar sakta balki main kabhee bhee yah liyaaqat naheen rakhta tha. is vaqt bhee jab main tujh say baat kar raha hoon meree yahee haalat hai. main ruk ruk kar bolta hoon.” ¹¹rabb nay kaha, “kis nay insaan ka munh banaaya? kaun ek ko goonga aur doosray ko bahera bana deta hai? kaun ek ko dekhnay kee qaabiliyat deta hai aur doosray ko is say maheroom rakhta hai? kya main jo rabb hoon yah sab kuchh naheen karta? ¹²ab ja! teray boltay vaqt main khud teray saath hoonga aur tujhay vah kuchh sikhaaoonga jo tujhay kahena hai.”

¹³lekin moosa nay iltija kee, “meray aaqa, meharbaanee karkay kisee aur ko bhej day.”

¹⁴tab rabb moosa say sakht khafa hua. us nay kaha, “kya tera laavee bhaaee haaroon aisay kaam kay liyay haazir naheen hai? main jaanta hoon ki vah achchhee tarah bol sakta hai. dekh, vah tujh say milnay kay liyay nikal chuka hai. tujhay dekh kar vah nihaayat khush hoga. ¹⁵usay vah kuchh bata jo usay kahena hai. tumhaaray boltay vaqt main teray aur us kay saath hoonga aur tumhen vah kuchh sikhaaoonga jo tumhen karna hoga. ¹⁶haaroon teree jagah qaum say baat karega jabki too meree tarah usay vah kuchh bataaega jo usay kahena hai. ¹⁷lekin yah laathee bhee saath lay jaana, kyoonki isee kay zareeay too yah mojizay karega.”

moosa misr ko laut jaata hai

¹⁸phir moosa apnay susar yitro kay ghar vaapas chala gaya. us nay kaha, “mujhay zara apnay azeezon kay paas vaapas jaanay den jo misr men hain. main maaloom karna chaahata hoon ki vah abhee tak zinda hain ki naheen.” yitro nay javaab diya, “theek hai, salaamatee say jaaen.” ¹⁹moosa abhee midiyaan men tha ki rabb nay us say kaha, “misr ko vaapas chala ja, kyoonki jo aadmee tujhay qatl karna chaahatay thay vah mar gaay hain.” ²⁰chunaanchay moosa apnee beevee aur beton ko gadhay par savaar karkay misr ko lautnay laga. allaah kee laathee us kay haath men thee.

²¹rabb nay us say yah bhee kaha, “misr ja kar firaaun kay saamnay vah tamaam mojizay dikha jin ka main nay tujhay ikhtiyaar diya hai. lekin meray kahenay par vah ada rahega. vah israaeeliyon ko jaanay kee ijaazat naheen dega. ²²us vaqt firaaun ko bata dena, ‘rabb farmaata hai ki israaeel mera pahelautha hai. ²³main tujhay bata chuka hoon ki meray betay ko jaanay day taaki vah meree ibaadat karay. agar too meray betay ko jaanay say mana karay to main teray pahelauthay ko jaan say maar doonga’.”

²⁴ek din jab moosa apnay khaandaan kay saath raastay men kisee saraay men thahera hua tha to rabb nay us par hamla karkay usay maar denay kee koshish kee. ²⁵yah dekh kar saffoora nay ek tez patthar say apnay betay ka khatna kiya aur kaatay huay hissay say moosa kay pair chhuay. us nay kaha, “yaqeenan tum meray khoonee doolha ho.” ²⁶tab allaah nay moosa ko chhod diya. saffoora nay usay khatnay kay baais hee ‘khoonee doolha’ kaha tha.

²⁷rabb nay haaroon say bhee baat kee, “registaan men moosa say milnay ja.” haaroon chal pada aur allaah kay pahaad kay paas moosa say mila. us nay usay bosa diya. ²⁸moosa nay haaroon ko sab kuchh suna diya jo rabb nay usay kahenay kay liyay bheja tha. us nay usay un mojizon kay baaray men bhee bataaya jo usay dikhaanay thay.

²⁹phir donon mil kar misr gaay. vahaan pahunch kar unhon nay israaeel kay tamaam buzurgon ko jama kiya. ³⁰haaroon nay unhen vah tamaam baaten sunaaeen jo rabb nay moosa ko bataaee theen. us nay mazkoora mojizay bhee logon kay saamnay dikhaaay. ³¹phir unhen yaqeen aaya. aur jab unhon nay suna ki rabb ko tumhaara khayaal hai aur vah tumhaaree museebat say aagaah hai to unhon nay rabb ko sijda kiya.