Ḵẖurooj 36

¹laazim hai ki bazaleeel, uhaliyaab aur baaqee kaareegar jin ko rabb nay maqdis kee taameer kay liyay hikmat aur samajh dee hai sab kuchh ain un hidaayaat kay mutaabiq banaaen jo rabb nay dee hain.”

israaeelee dilee khushee say detay hain

²moosa nay bazaleeel aur uhaliyaab ko bulaaya. saath hee us nay har us kaareegar ko bhee bulaaya jisay rabb nay maqdis kee taameer kay liyay hikmat aur mahaarat dee thee aur jo khushee say aana aur yah kaam karna chaahata tha. ³unhen moosa say tamaam hadiay milay jo israaeelee maqdis kee taameer kay liyay laaay thay.

is kay baad bhee log roz-ba-roz subah kay vaqt hadiay laatay rahay. ⁴aakhirkaar tamaam kaareegar jo maqdis banaanay kay kaam men lagay thay apna kaam chhod kar moosa kay paas aaay. ⁵unhon nay kaha, “log hadd say ziyaada la rahay hain. jis kaam ka hukm rabb nay diya hai us kay liyay itnay saamaan kee zaroorat naheen hai.” ⁶tab moosa nay pooree khaimaagaah men elaan karva diya ki koee mard ya aurat maqdis kee taameer kay liyay ab kuchh na laaay.

yoon unhen mazeed cheezen laanay say roka gaya, ⁷kyoonki kaam kay liyay saamaan zaroorat say ziyaada ho gaya tha.

mulaaqaat ka khaimaa

⁸jo kaareegar mahaarat rakhtay thay unhon nay khaimay ko banaaya. unhon nay baareek kataan aur neelay, arghvaanee aur qirmizee dhaagay say das parday banaaay. pardon par kisee maahir kaareegar kay kadaaee kay kaam say karoobee farishton ka dizaain banaaya gaya. ⁹har parday kee lambaaee 42 fut aur chaudaaee 6 fut thee. ¹⁰paanch pardon kay lambay haashiay ek doosray kay saath joday gaay aur isee tarah baaqee paanch bhee. yoon do baday tukday ban gaay. ¹¹donon tukdon ko ek doosray kay saath milaanay kay liyay unhon nay neelay dhaagay kay halqay banaaay. yah halqay har tukday kay 42 fut vaalay ek kinaaray par lagaaay gaay, ¹²ek tukday kay haashiay par 50 halqay aur doosray par bhee utnay hee halqay. in do haashiyon kay halqay ek doosray kay aamnay-saamnay thay. ¹³phir bazaleeel nay sonay kee 50 huken bana kar un say aamnay-saamnay kay halqon ko ek doosray kay saath milaaya. yoon donon tukdon kay jodnay say khaima ban gaya.

¹⁴us nay bakree kay baalon say bhee 11 parday banaaay jinhen kapday vaalay khaimay kay oopar rakhna tha. ¹⁵har parday kee lambaaee 45 fut aur chaudaaee 6 fut thee. ¹⁶paanch pardon kay lambay haashiay ek doosray kay saath joday gaay aur is tarah baaqee chhah bhee. ¹⁷in donon tukdon ko milaanay kay liyay us nay har tukday kay 45 fut vaalay ek kinaaray par pachaas pachaas halqay lagaaay. ¹⁸phir peetal kee 50 huken bana kar us nay donon hissay milaaay.

¹⁹ek doosray kay oopar kay donon khaimon kee hifaazat kay liyay bazaleeel nay do aur ghilaaf banaaay. bakree kay baalon kay khaimay par rakhnay kay liyay us nay mendhon kee surkh rangee huee khaalen jod deen aur us kay oopar rakhnay kay liyay takhas kee khaalen milaaeen.

²⁰is kay baad us nay keekar kee lakdee kay takhtay banaaay jo khaimay kee deevaaron ka kaam detay thay. ²¹har takhtay kee oonchaaee 15 fut thee aur chaudaaee sava do fut. ²²har takhtay kay neechay do do choolen theen. in choolon say har takhtay ko us kay paaiyon kay saath joda jaata tha taaki takhta khada rahay. ²³khaimay kee junoobee deevaar kay liyay 20 takhtay banaaay gae ²⁴aur saath hee chaandee kay 40 paaay bhee jin par takhtay khaday kiay jaatay thay. har takhtay kay neechay do paaay thay, aur har paaay men ek chool lagtee thee. ²⁵isee tarah khaimay kee shimaalee deevaar kay liyay bhee 20 takhtay banaaay gae ²⁶aur saath hee chaandee kay 40 paaay jo takhton ko khada karnay kay liyay thay. har takhtay kay neechay do paaay thay. ²⁷khaimay kee pichhlee yaanee maghribee deevaar kay liyay chhah takhtay banaaay gaay. ²⁸is deevaar ko shimaalee aur junoobee deevaaron kay saath jodnay kay liyay konay vaalay do takhtay banaaay gaay. ²⁹in do takhton men neechay say lay kar oopar tak kona tha taaki ek say shimaalee deevaar maghribee deevaar kay saath jud jaaay aur doosray say junoobee deevaar maghribee deevaar kay saath. in kay oopar kay siray kadon say mazboot kiay gaay. ³⁰yoon pichhlay yaanee maghribee takhton kee pooree taadaad 8 thee aur in kay liyay chaandee kay paaiyon kee taadaad 16, har takhtay kay neechay do paaay.

^31-32 phir bazaleeel nay keekar kee lakdee kay shaheteer banaaay, teenon deevaaron kay liyay paanch paanch shaheteer. vah har deevaar kay takhton par yoon lagaanay kay liyay thay ki un say takhtay ek doosray kay saath milaaay jaaen. ³³darmiyaanee shaheteer yoon banaaya gaya ki vah deevaar kee aadhee oonchaaee par deevaar kay ek siray say doosray siray tak lag sakta tha. ³⁴us nay tamaam takhton aur shaheteeron par sona chadhaaya. shaheteeron ko takhton kay saath lagaanay kay liyay us nay sonay kay kaday banaaay jo takhton men lagaanay thay.

muqaddas khaimay kay parde

³⁵ab bazaleeel nay ek aur parda banaaya. us kay liyay bhee baareek kataan aur neelay, arghvaanee aur qirmizee rang ka dhaaga istemaal hua. us par bhee kisee maahir kaareegar kay kadaaee kay kaam say karoobee farishton ka dizaain banaaya gaya. ³⁶phir us nay parday ko latkaanay kay liyay keekar kee lakdee kay chaar satoon, sonay kee huken aur chaandee kay chaar paaay banaaay. satoonon par sona chadhaaya gaya.

³⁷bazaleeel nay khaimay kay darvaazay kay liyay bhee parda banaaya. vah bhee baareek kataan aur neelay, arghvaanee aur qirmizee rang kay dhaagay say banaaya gaya, aur us par kadaaee ka kaam kiya gaya. ³⁸is parday ko latkaanay kay liyay us nay sonay kee huken aur keekar kee lakdee kay paanch satoon banaaay. satoonon kay oopar kay siron aur pattiyon par sona chadhaaya gaya jabki un kay paaay peetal kay thay.