Ḵẖurooj 35

sabat ka din

¹moosa nay israaeel kee pooree jamaaat ko ikattha karkay kaha, “rabb nay tum ko yah hukm diay hain : ²chhah din kaam-kaaj kiya jaaay, lekin saatvaan din makhsoos-o-muqaddas ho. vah rabb kay liyay aaraam ka sabat hai. jo bhee is din kaam karay usay saza-ay-maut dee jaaay. ³haftay kay din apnay tamaam gharon men aag tak na jalaana.”

mulaaqaat kay khaimay kay liyay saamaan

⁴moosa nay israaeel kee pooree jamaaat say kaha, “rabb nay hidaayat dee hai ⁵ki jo kuchh tumhaaray paas hai us men say hadiay la kar rabb ko uthaanay vaalee qurbaanee kay taur par pesh karo. jo bhee dilee khushee say dena chaahay vah in cheezon men say kuchh day : sona, chaandee, peetal; ⁶neelay, arghvaanee aur qirmizee rang ka dhaaga, baareek kataan, bakree kay baal, ⁷mendhon kee surkh rangee huee khaalen, takhas kee khaalen, keekar kee lakdee, ⁸shamaadaan kay liyay zaitoon ka tel, masah karnay kay liyay tel aur khushboodaar bakhoor kay liyay masaalay, ⁹aqeeq-ay-ahmar aur deegar javaahir jo imaam-ay-aazam kay baalaaposh aur seenay kay keesay men jaday jaaengay.

¹⁰tum men say jitnay maahir kaareegar hain vah a kar vah kuchh banaaen jo rabb nay farmaayaa ¹¹yaanee khaima aur vah ghilaaf jo us kay oopar lagaaay jaaengay, huken, deevaaron kay takhtay, shaheteer, satoon aur paaay, ¹²ahd ka sandooq, usay uthaanay kee lakdiyaan, us kay kaffaaray ka dhakna, muqaddastareen kamray kay darvaazay ka parda, ¹³makhsoos rotiyon kee mez, usay uthaanay kee lakdiyaan, us ka saara saamaan aur rotiyaan, ¹⁴shamaadaan aur us par rakhnay kay charaagh us kay saamaan samet, shamaadaan kay liyay tel, ¹⁵bakhoor jalaanay kee qurbaangaah, usay uthaanay kee lakdiyaan, masah ka tel, khushboodaar bakhoor, muqaddas khaimay kay darvaazay ka parda, ¹⁶jaanvaron ko chadhaanay kee qurbaangaah, us ka peetal ka jangla, usay uthaanay kee lakdiyaan aur baaqee saara saamaan, dhonay ka hauz aur vah dhaancha jis par hauz rakha jaata hai, ¹⁷chaardeevaaree kay parday un kay khambon aur paaiyon samet, sahen kay darvaazay ka parda, ¹⁸khaimay aur chaardeevaaree kee mekhen aur rassay, ¹⁹aur vah muqaddas libaas jo haaroon aur us kay betay maqdis men khidmat karnay kay liyay pahentay hain.”

²⁰yah sun kar israaeel kee pooree jamaaat moosa kay paas say chalee gaee. ²¹aur jo jo dilee khushee say dena chaahata tha vah mulaaqaat kay khaimay, us kay saamaan ya imaamon kay kapdon kay liyay koee hadiya lay kar vaapas aaya. ²²rabb kay hadiay kay liyay mard aur khavaateen dilee khushee say apnay sonay kay zevraat maslan jadaao pinen, baaliyaan aur chhallay lay aaay. ²³jis jis kay paas darkaar cheezon men say kuchh tha vah usay moosa kay paas lay aaya yaanee neelay, qirmizee aur arghvaanee rang ka dhaaga, baareek kataan, bakree kay baal, mendhon kee surkh rangee huee khaalen aur takhas kee khaalen. ²⁴chaandee, peetal aur keekar kee lakdee bhee hadiay kay taur par laaee gaee. ²⁵aur jitnee aurten kaatnay men maahir theen vah apnee kaatee huee cheezen lay aaeen yaanee neelay, qirmizee aur arghvaanee rang ka dhaaga aur baareek kataan. ²⁶isee tarah jo jo aurat bakree kay baal kaatnay men maahir thee aur dilee khushee say maqdis kay liyay kaam karna chaahatee thee vah yah kaat kar lay aaee. ²⁷sardaar aqeeq-ay-ahmar aur deegar javaahir lay aaay jo imaam-ay-aazam kay baalaaposh aur seenay kay keesay kay liyay darkaar thay. ²⁸vah shamaadaan, masah kay tel aur khushboodaar bakhoor kay liyay masaalay aur zaitoon ka tel bhee lay aaay.

²⁹yoon israaeel kay tamaam mard aur khavaateen jo dilee khushee say rabb ko kuchh dena chaahatay thay us saaray kaam kay liyay hadiay lay aaay jo rabb nay moosa kee maarifat karnay ko kaha tha.

bazaleeel aur uhaliyaab

³⁰phir moosa nay israaeeliyon say kaha, “rabb nay yahoodaah kay qabeelay kay bazaleeel bin ooree bin hoor ko chun liya hai. ³¹us nay usay ilaahee rooh say maamoor karkay hikmat, samajh aur taameer kay har kaam kay liyay darkaar ilm day diya hai. ³²vah naqshay bana kar un kay mutaabiq sonay, chaandee aur peetal kee cheezen bana sakta hai. ³³vah javaahir ko kaat kar jadnay kee qaabiliyat rakhta hai. vah lakdee ko taraash kar us say mukhtalif cheezen bana sakta hai. vah bahut saaray aur kaamon men bhee mahaarat rakhta hai. ³⁴saath hee rabb nay usay aur daan kay qabeelay kay uhaliyaab bin akheesamak ko doosron ko sikhaanay kee qaabiliyat bhee dee hai. ³⁵us nay unhen vah mahaarat aur hikmat dee hai jo har kaam kay liyay darkaar hai yaanee kaareegree kay har kaam kay liyay, kadaaee kay kaam kay liyay, neelay, arghvaanee aur qirmizee rang kay dhaagay aur baareek kataan say kapda banaanay kay liyay aur bunaaee kay kaam kay liyay. vah maahir kaareegar hain aur naqshay bhee bana saktay hain.