Ḵẖurooj 34
patthar kee naee takhtiyaan
1rabb nay moosa say kaha, “apnay liyay patthar kee do takhtiyaan taraash lay jo pahelee do kee maanind hon. phir main un par vah alfaaz likhoonga jo pahelee takhtiyon par likhay thay jinhen too nay patakh diya tha. 2subah tak tayyaar ho kar seena pahaad par chadhna. chotee par meray saamnay khada ho ja. 3teray saath koee bhee na aaay balki pooray pahaad par koee aur shakhs nazar na aaay, yahaan tak ki bhed-bakriyaan aur gaay-bail bhee pahaad kay daaman men na charen.”
4chunaanchay moosa nay do takhtiyaan taraash leen jo pahelee kee maanind theen. phir vah subah-saveray uth kar seena pahaad par chadh gaya jis tarah rabb nay usay hukm diya tha. us kay haathon men patthar kee donon takhtiyaan theen. 5jab vah chotee par pahuncha to rabb baadal men utar aaya aur us kay paas khaday ho kar apnay naam rabb ka elaan kiya. 6moosa kay saamnay say guzartay huay us nay pukaara, “rabb, rabb, raheem aur meharbaan khuda. tahemmul, shafqat aur vafa say bharpoor. 7vah hazaaron par apnee shafqat qaaim rakhta aur logon ka qusoor, naafarmaanee aur gunaah muaaf karta hai. lekin vah har ek ko us kee munaasib saza bhee deta hai. jab vaalidain gunaah karen to un kee aulaad ko bhee teesree aur chauthee pusht tak saza kay nataaij bhugatnay padengay.”
8moosa nay jaldee say jhuk kar sijda kiya. 9us nay kaha, “ai rabb, agar mujh par tera karam ho to hamaaray saath chal. beshak yah qaum hatdharm hai, to bhee hamaara qusoor aur gunaah muaaf kar aur bakhsh day ki ham dubaara teray hee ban jaaen.”
10tab rabb nay kaha, “main tumhaaray saath ahd baandhoonga. teree qaum kay saamnay hee main aisay mojizay karoonga jo ab tak duniya bhar kee kisee bhee qaum men naheen kiay gaay. pooree qaum jis kay darmiyaan too raheta hai rabb ka kaam dekhegee aur us say dar jaaegee jo main teray saath karoonga. 11jo ahkaam main aaj deta hoon un par amal karta rah. main amoree, kan’aanee, hittee, farizzee, hivvee aur yaboosee aqvaam ko teray aagay aagay mulk say nikaal doonga. 12khabardaar, jo us mulk men rahetay hain jahaan too ja raha hai un say ahd na baandhna. varna vah teray darmiyaan rahetay huay tujhay gunaahon men phansaatay rahengay. 13un kee qurbaangaahen dha dena, un kay buton kay satoon tukday tukday kar dena aur un kee devee yaseerat kay khambay kaat daalna.
14kisee aur maabood kee parastish na karna, kyoonki rabb ka naam ghayoor hai, allaah ghairatmand hai. 15khabardaar, us mulk kay baashindon say ahd na karna, kyoonki teray darmiyaan rahetay huay bhee vah apnay maaboodon kee pairvee karkay zina karengay aur unhen qurbaaniyaan chadhaaengay. aakhirkaar vah tujhay bhee apnee qurbaaniyon men shirkat kee daavat dengay. 16khatra hai ki too un kee betiyon ka apnay beton kay saath rishta baandhay. phir jab yah apnay maaboodon kee pairvee karkay zina karengee to un kay sabab say teray betay bhee un kee pairvee karnay lagengay.
17apnay liyay devta na dhaalna.
saalaana eeden
18bekhameeree rotee kee eed manaana. abeeb kay maheene [a] maarch ya aprail. men saat din tak teree rotee men khameer na ho jis tarah main nay hukm diya hai. kyoonki is maheenay men too misr say nikla.
19har pahelautha mera hai. teray maal maveshiyon ka har pahelautha mera hai, chaahay bachhda ho ya lela. 20lekin pahelauthay gadhay kay ivz bhed dena. agar yah mumkin na ho to us kee gardan tod daalna. apnay pahelauthay beton kay liyay bhee ivzee dena. koee meray paas khaalee haath na aaay.
21chhah din kaam-kaaj karna, lekin saatven din aaraam karna. khwaah hal chalaana ho ya fasal kaatnee ho to bhee saatven din aaraam karna.
22gandum kee fasal kee kataaee kee eed [b] sitambar ya aktoobar. us vaqt manaana jab too gehoon kee pahelee fasal kaatega. angoor aur phal jama karnay kee eed israaeelee saal kay ikhtitaam par manaanee hai. 23laazim hai ki teray tamaam mard saal men teen martaba rabb qaadir-ay-mutlaq kay saamnay jo israaeel ka khuda hai haazir hon. 24main teray aagay aagay qaumon ko mulk say nikaal doonga aur teree sarhadden badhaata jaaoonga. phir jab too saal men teen martaba rabb apnay khuda kay huzoor aaega to koee bhee teray mulk ka laalach naheen karega.
25jab too kisee jaanvar ko zabah karkay qurbaanee kay taur par pesh karta hai to us kay khoon kay saath aisee rotee pesh na karna jis men khameer ho. eed-ay-fasah kee qurbaanee say aglee subah tak kuchh baaqee na rahay.
26apnee zameen kee pahelee paidaavaar men say behtareen hissa rabb apnay khuda kay ghar men lay aana.
bakree ya bhed kay bachchay ko us kee maan kay doodh men na pakaana.”
moosa kay chiharay par chamak
27rabb nay moosa say kaha, “yah tamaam baaten likh lay, kyoonki yah us ahd kee bunyaad hain jo main nay teray aur israaeel kay saath baandha hai.”
28moosa chaalees din aur chaalees raat vaheen rabb kay huzoor raha. is dauraan na us nay kuchh khaaya na piya. us nay patthar kee takhtiyon par ahd kay das ahkaam likhay.
29is kay baad moosa shareeat kee donon takhtiyon ko haath men liyay huay seena pahaad say utra. us kay chiharay kee jild chamak rahee thee, kyoonki us nay rabb say baat kee thee. lekin usay khud is ka ilm naheen tha. 30jab haaroon aur tamaam israaeeliyon nay dekha ki moosa ka chihara chamak raha hai to vah us kay paas aanay say dar gaay. 31lekin us nay unhen bulaaya to haaroon aur jamaaat kay tamaam sardaar us kay paas aaay, aur us nay un say baat kee. 32baad men baaqee israaeelee bhee aaay, aur moosa nay unhen tamaam ahkaam sunaaay jo rabb nay usay koh-ay-seena par diay thay.
33yah sab kuchh kahenay kay baad moosa nay apnay chiharay par niqaab daal liya. 34jab bhee vah rabb say baat karnay kay liyay mulaaqaat kay khaimay men jaata to niqaab ko khaimay say nikaltay vaqt tak utaar leta. aur jab vah nikal kar israaeeliyon ko rabb say milay huay ahkaam sunaataa 35to vah dekhtay ki us kay chiharay kee jild chamak rahee hai. is kay baad moosa dubaara niqaab ko apnay chiharay par daal leta, aur vah us vaqt tak chiharay par raheta jab tak moosa rabb say baat karnay kay liyay mulaaqaat kay khaimay men na jaata tha.