Ḵẖurooj 33

¹rabb nay moosa say kaha, “is jagah say ravaana ho ja. un logon ko lay kar jin ko too misr say nikaal laaya hai us mulk ko ja jis ka vaada main nay ibraaheem, ishaaq aur yaaqoob say kiya hai. un hee say main nay qasam kha kar kaha tha, ‘main yah mulk tumhaaree aulaad ko doonga.’ ²main teray aagay aagay farishta bhej kar kan’aanee, amoree, hittee, farizzee, hivvee aur yaboosee aqvaam ko us mulk say nikaal doonga. ³uth, us mulk ko ja jahaan doodh aur shahed kee kasrat hai. lekin main saath naheen jaaoonga. tum itnay hatdharm ho ki agar main saath jaaoon to khatra hai ki tumhen vahaan pahunchnay say pahelay hee barbaad kar doon.”

⁴jab israaeeliyon nay yah sakht alfaaz sunay to vah maatam karnay lagay. kisee nay bhee apnay zevar na pahenay, ⁵kyoonki rabb nay moosa say kaha tha, “israaeeliyon ko bata ki tum hatdharm ho. agar main ek lamha bhee tumhaaray saath chaloon to khatra hai ki main tumhen tabaah kar doon. ab apnay zevraat utaar daalo. phir main faisla karoonga ki tumhaaray saath kya kiya jaaay.”

⁶in alfaaz par israaeeliyon nay horib yaanee seena pahaad par apnay zevar utaar diay.

mulaaqaat ka khaimaa

⁷us vaqt moosa nay khaima lay kar usay kuchh faasilay par khaimaagaah kay baahar laga diya. us nay us ka naam ‘mulaaqaat ka khaima’ rakha. jo bhee rabb kee marzee darayaaft karna chaahata vah khaimaagaah say nikal kar vahaan jaata. ⁸jab bhee moosa khaimaagaah say nikal kar vahaan jaata to tamaam log apnay khaimon kay darvaazon par khaday ho kar moosa kay peechhay dekhnay lagtay. us kay mulaaqaat kay khaimay men ojhal honay tak vah usay dekhtay rahetay.

⁹moosa kay khaimay men daakhil honay par baadal ka satoon utar kar khaimay kay darvaazay par thaher jaata. jitnee der tak rabb moosa say baaten karta utnee der tak vah vahaan thahera raheta. ¹⁰jab israaeelee mulaaqaat kay khaimay kay darvaazay par baadal ka satoon dekhtay to vah apnay apnay khaimay kay darvaazay par khaday ho kar sijda kartay. ¹¹rabb moosa say roo-ba-roo baaten karta tha, aisay shakhs kee tarah jo apnay dost say baaten karta hai. is kay baad moosa nikal kar khaimaagaah ko vaapas chala jaata. lekin us ka javaan madadgaar yashooa bin noon khaimay ko naheen chhodta tha.

moosa rabb ka jalaal dekhta hai

¹²moosa nay rabb say kaha, “dekh, too mujh say kaheta aaya hai ki is qaum ko kan’aan lay chal. lekin too meray saath kis ko bhejega? too nay ab tak yah baat mujhay naheen bataaee haalaanki too nay kaha hai, ‘main tujhay banaam jaanta hoon, tujhay mera karam haasil hua hai.’ ¹³agar mujhay vaaqaee tera karam haasil hai to mujhay apnay raastay dikha taaki main tujhay jaan loon aur tera karam mujhay haasil hota rahay. is baat ka khayaal rakh ki yah qaum teree hee ummat hai.”

¹⁴rabb nay javaab diya, “main khud teray saath chaloonga aur tujhay aaraam doonga.” ¹⁵moosa nay kaha, “agar too khud saath naheen chalega to phir hamen yahaan say ravaana na karna. ¹⁶agar too hamaaray saath na jaaay to kis tarah pata chalega ki mujhay aur teree qaum ko tera karam haasil hua hai? ham sirf isee vajah say duniya kee deegar qaumon say alag aur mumtaaz hain.”

¹⁷rabb nay moosa say kaha, “main teree yah darakhwaast bhee pooree karoonga, kyoonki tujhay mera karam haasil hua hai aur main tujhay banaam jaanta hoon.”

¹⁸phir moosa bola, “baraah-ay-karam mujhay apna jalaal dikha.” ¹⁹rabb nay javaab diya, “main apnee pooree bhalaaee teray saamnay say guzarnay doonga aur teray saamnay hee apnay naam rabb ka elaan karoonga. main jis par meharbaan hona chaahoon us par meharbaan hota hoon, aur jis par rahem karna chaahoon us par rahem karta hoon. ²⁰lekin too mera chihara naheen dekh sakta, kyoonki jo bhee mera chihara dekhay vah zinda naheen rah sakta.” ²¹phir rabb nay farmaaya, “dekh, meray paas ek jagah hai. vahaan kee chataan par khada ho ja. ²²jab mera jalaal vahaan say guzrega to main tujhay chataan kay ek shigaaf men rakhoonga aur apna haath teray oopar phailaaoonga taaki too meray guzarnay kay dauraan mahfooz rahay. ²³is kay baad main apna haath hataaoonga aur too meray peechhay dekh sakega. lekin mera chihara dekha naheen ja sakta.”