Ḵẖurooj 32

sonay ka bachhdaa

¹pahaad kay daaman men log moosa kay intizaar men rahay, lekin bahut der ho gaee. ek din vah haaroon kay gird jama ho kar kahenay lagay, “aaen, hamaaray liyay devta bana den jo hamaaray aagay aagay chaltay huay hamaaree raahanumaaee karen. kyoonki kya maaloom ki us banday moosa ko kya hua hai jo hamen misr say nikaal laaya.”

²javaab men haaroon nay kaha, “aap kee beeviyaan, betay aur betiyaan apnee sonay kee baaliyaan utaar kar meray paas lay aaen.” ³sab log apnee baaliyaan utaar utaar kar haaroon kay paas lay aae ⁴to us nay yah zevraat lay kar bachhda dhaal diya. bachhday ko dekh kar log bol uthay, “ai israaeel, yah teray devta hain jo tujhay misr say nikaal laaay.”

⁵jab haaroon nay yah dekha to us nay bachhday kay saamnay qurbaangaah bana kar elaan kiya, “kal ham rabb kee taazeem men eed manaaengay.” ⁶aglay din log subah-saveray uthay aur bhasm honay vaalee qurbaaniyaan aur salaamatee kee qurbaaniyaan chadhaaeen. vah khaanay-peenay kay liyay baith gaay aur phir uth kar rangraliyon men apnay dil bahelaanay lagay.

moosa apnee qaum kee shafaaat karta hai

⁷us vaqt rabb nay moosa say kaha, “pahaad say utar ja. teray log jinhen too misr say nikaal laaya badee sharaaraten kar rahay hain. ⁸vah kitnee jaldee say us raastay say hat gaay hain jis par chalnay kay liyay main nay unhen hukm diya tha. unhon nay apnay liyay dhaala hua bachhda bana kar usay sijda kiya hai. unhon nay usay qurbaaniyaan pesh karkay kaha hai, ‘ai israaeel, yah teray devta hain. yahee tujhay misr say nikaal laaay hain’.” ⁹allaah nay moosa say kaha, “main nay dekha hai ki yah qaum badee hatdharm hai. ¹⁰ab mujhay roknay kee koshish na kar. main un par apna ghazab undel kar un ko roo-ay-zameen par say mita doonga. un kee jagah main tujh say ek badee qaum bana doonga.”

¹¹lekin moosa nay kaha, “ai rabb, too apnee qaum par apna ghussa kyoon utaarna chaahata hai? too khud apnee azeem qudrat say usay misr say nikaal laaya hai. ¹²misree kyoon kahen, ‘rabb israaeeliyon ko sirf is buray maqsad say hamaaray mulk say nikaal lay gaya hai ki unhen pahaadee ilaaqay men maar daalay aur yoon unhen roo-ay-zameen par say mitaaay’? apna ghussa thanda honay day aur apnee qaum kay saath bura sulook karnay say baaz rah. ¹³yaad rakh ki too nay apnay khaadimon ibraaheem, ishaaq aur yaaqoob say apnee hee qasam kha kar kaha tha, ‘main tumhaaree aulaad kee taadaad yoon badhaaoonga ki vah aasmaan kay sitaaron kay baraabar ho jaaegee. main unhen vah mulk doonga jis ka vaada main nay kiya hai, aur vah usay hamesha kay liyay meeraas men paaengay’.”

¹⁴moosa kay kahenay par rabb nay vah naheen kiya jis ka elaan us nay kar diya tha balki vah apnee qaum say bura sulook karnay say baaz raha.

butparastee kay nataaij

¹⁵moosa mud kar pahaad say utra. us kay haathon men shareeat kee donon takhtiyaan theen. un par aagay peechhay likha gaya tha. ¹⁶allaah nay khud takhtiyon ko bana kar un par apnay ahkaam kanda kiay thay.

¹⁷utartay utartay yashooa nay logon ka shor suna aur moosa say kaha, “khaimaagaah men jang ka shor mach raha hai!” ¹⁸moosa nay javaab diya, “na to yah fatahmandon kay naaray hain, na shikast khaaay huon kee cheekh-pukaar. mujhay gaanay vaalon kee aavaaz sunaaee day rahee hai.”

¹⁹jab vah khaimaagaah kay nazdeek pahuncha to us nay logon ko sonay kay bachhday kay saamnay naachtay huay dekha. baday ghussay men a kar us nay takhtiyon ko zameen par patakh diya, aur vah tukday tukday ho kar pahaad kay daaman men gir gaeen. ²⁰moosa nay israaeeliyon kay banaaay huay bachhday ko jala diya. jo kuchh bach gaya usay us nay pees pees kar paaudar bana daala aur paaudar paanee par chhidak kar israaeeliyon ko pila diya.

²¹us nay haaroon say poochha, “in logon nay tumhaaray saath kya kiya ki tum nay unhen aisay baday gunaah men phansa diya?” ²²haaroon nay kaha, “meray aaqa. ghussay na hon. aap khud jaantay hain ki yah log badee par tulay rahetay hain. ²³unhon nay mujh say kaha, ‘hamaaray liyay devta bana den jo hamaaray aagay aagay chaltay huay hamaaree raahanumaaee karen. kyoonki kya maaloom ki us banday moosa ko kya hua hai jo hamen misr say nikaal laaya.’ ²⁴is liyay main nay un ko bataaya, ‘jis kay paas sonay kay zevraat hain vah unhen utaar laaay.’ jo kuchh unhon nay mujhay diya usay main nay aag men phaink diya to hotay hotay sonay ka yah bachhda nikal aaya.”

²⁵moosa nay dekha ki log bekaaboo ho gaay hain. kyoonki haaroon nay unhen belagaam chhod diya tha, aur yoon vah israaeel kay dushmanon kay liyay mazaaq ka nishaana ban gaay thay. ²⁶moosa khaimaagaah kay darvaazay par khaday ho kar bola, “jo bhee rabb ka banda hai vah meray paas aaay.” javaab men laavee kay qabeelay kay tamaam log us kay paas jama ho gaay. ²⁷phir moosa nay un say kaha, “rabb israaeel ka khuda farmaata hai, ‘har ek apnee talvaar lay kar khaimaagaah men say guzray. ek siray kay darvaazay say shuroo karkay doosray siray kay darvaazay tak chaltay chaltay har milnay vaalay ko jaan say maar do, chaahay vah tumhaara bhaaee, dost ya rishtedaar hee kyoon na ho. phir mud kar maartay maartay pahelay darvaazay par vaapas a jaao’.”

²⁸laaviyon nay moosa kee hidaayat par amal kiya to us din taqreeban 3,000 mard halaak huay. ²⁹yah dekh kar moosa nay laaviyon say kaha, “aaj apnay aap ko maqdis men rabb kee khidmat karnay kay liyay makhsoos-o-muqaddas karo, kyoonki tum apnay beton aur bhaaiyon kay khilaaf ladnay kay liyay tayyaar thay. is liyay rabb tum ko aaj barkat dega.”

³⁰aglay din moosa nay israaeeliyon say baat kee, “tum nay nihaayat sangeen gunaah kiya hai. to bhee main ab rabb kay paas pahaad par ja raha hoon. shaayad main tumhaaray gunaah ka kaffaara day sakoon.”

³¹chunaanchay moosa nay rabb kay paas vaapas ja kar kaha, “haay, is qaum nay nihaayat sangeen gunaah kiya hai. unhon nay apnay liyay sonay ka devta bana liya. ³²meharbaanee karkay unhen muaaf kar. lekin agar too unhen muaaf na karay to phir mujhay bhee apnee us kitaab men say mita day jis men too nay apnay logon kay naam darj kiay hain.” ³³rabb nay javaab diya, “main sirf us ko apnee kitaab men say mitaata hoon jo mera gunaah karta hai. ³⁴ab ja, logon ko us jagah lay chal jis ka zikr main nay kiya hai. mera farishta teray aagay aagay chalega. lekin jab saza ka muqarrara din aaega tab main unhen saza doonga.”

³⁵phir rabb nay israaeeliyon kay darmiyaan vaba phailnay dee, is liyay ki unhon nay us bachhday kee pooja kee thee jo haaroon nay banaaya tha.