Ḵẖurooj 30
bakhoor jalaanay kee qurbaangaah
1keekar kee lakdee kee qurbaangaah banaana jis par bakhoor jalaaya jaaay. 2vah dedh fut lambee, itnee hee chaudee aur teen fut oonchee ho. us kay chaaron konon men say seeng niklen jo qurbaangaah kay saath ek hee tukday say banaaay gaay hon. 3us kee oopar kee satah, us kay chaar pahelooon aur us kay seengon par khaalis sona chadhaana. oopar kee satah kay ird-gird sonay kee jhaalar ho. 4sonay kay do kaday bana kar unhen us jhaalar kay neechay ek doosray kay muqaabil pahelooon par lagaana. in kadon men qurbaangaah ko uthaanay kee lakdiyaan daalee jaaengee. 5yah lakdiyaan keekar kee hon, aur un par bhee sona chadhaana.
6is qurbaangaah ko khaimay kay muqaddas kamray men us parday kay saamnay rakhna jis kay peechhay ahd ka sandooq aur us ka dhakna hongay, vah dhakna jahaan main tujh say mila karoonga. 7jab haaroon har subah shamaadaan kay charaagh tayyaar karay us vaqt vah us par khushboodaar bakhoor jalaaay. 8sooraj kay ghuroob honay kay baad bhee jab vah dubaara charaaghon kee dekh-bhaal karega to vah saath saath bakhoor jalaaay. yoon rabb kay saamnay bakhoor mutvaatir jalta rahay. laazim hai ki baad kee naslen bhee is usool par qaaim rahen.
9is qurbaangaah par sirf jaaiz bakhoor istemaal kiya jaaay. is par na to jaanvaron kee qurbaaniyaan chadhaaee jaaen, na ghalla ya mai kee nazren pesh kee jaaen. 10haaroon saal men ek dafa us ka kaffaara day kar usay paak karay. is kay liyay vah kaffaaray kay din us qurbaanee ka kuchh khoon seengon par lagaaay. yah usool bhee abad tak qaaim rahay. yah qurbaangaah rabb kay liyay nihaayat muqaddas hai.”
mardumashumaaree kay paise
11rabb nay moosa say kaha, 12“jab bhee too israaeeliyon kee mardumashumaaree karay to laazim hai ki jin ka shumaar kiya gaya ho vah rabb ko apnee jaan ka fidya den taaki un men vaba na phailay. 13jis jis ka shumaar kiya gaya ho vah chaandee kay aadhay sikkay kay baraabar raqam uthaanay vaalee qurbaanee kay taur par day. sikkay ka vazan maqdis kay sikkon kay baraabar ho. yaanee chaandee kay sikkay ka vazan 11 graam ho, is liyay chhah graam chaandee denee hai. 14jis kee bhee umr 20 saal ya is say zaaid ho vah rabb ko yah raqam uthaanay vaalee qurbaanee kay taur par day. 15ameer aur ghareeb donon itna hee den, kyoonki yahee nazraana rabb ko pesh karnay say tumhaaree jaan ka kaffaara diya jaata hai. 16kaffaaray kee yah raqam mulaaqaat kay khaimay kee khidmat kay liyay istemaal karna. phir yah nazraana rabb ko yaad dilaata rahega ki tumhaaree jaanon ka kaffaara diya gaya hai.”
dhonay ka hauz
17rabb nay moosa say kaha, 18“peetal ka dhaancha banaana jis par peetal ka hauz bana kar rakhna hai. yah hauz dhonay kay liyay hai. usay sahen men mulaaqaat kay khaimay aur jaanvaron ko chadhaanay kee qurbaangaah kay darmiyaan rakh kar paanee say bhar dena. 19haaroon aur us kay betay apnay haath-paaon dhonay kay liyay us ka paanee istemaal karen. 20mulaaqaat kay khaimay men daakhil honay say pahelay hee vah apnay aap ko dhoen varna vah mar jaaengay. isee tarah jab bhee vah khaimay kay baahar kee qurbaangaah par jaanvaron kee qurbaaniyaan chadhaaen 21to laazim hai ki pahelay haath-paaon dho len, varna vah mar jaaengay. yah usool haaroon aur us kee aulaad kay liyay hamesha tak qaaim rahay.”
masah ka tel
22rabb nay moosa say kaha, 23“masah kay tel kay liyay umda qism kay masaalay istemaal karna. 6 kilograam aab-ay-mur, 3 kilograam khushboodaar daarcheenee, 3 kilograam khushboodaar bed 24aur 6 kilograam tejpaat. yah cheezen maqdis kay baaton kay hisaab say tol kar chaar litar zaitoon kay tel men daalna. 25sab kuchh mila kar khushboodaar tel tayyaar karna. vah muqaddas hai aur sirf us vaqt istemaal kiya jaaay jab koee cheez ya shakhs meray liyay makhsoos-o-muqaddas kiya jaaay.
26yahee tel lay kar mulaaqaat ka khaima aur us ka saara saamaan masah karna yaanee khaima, ahd ka sandooq, 27mez aur us ka saamaan, shamaadaan aur us ka saamaan, bakhoor jalaanay kee qurbaangaah, 28jaanvaron ko chadhaanay kee qurbaangaah aur us ka saamaan, dhonay ka hauz aur us ka dhaancha. 29yoon too yah tamaam cheezen makhsoos-o-muqaddas karega. is say vah nihaayat muqaddas ho jaaengee. jo bhee unhen chhuega vah muqaddas ho jaaega.
30haaroon aur us kay beton ko bhee is tel say masah karna taaki vah muqaddas ho kar meray liyay imaam ka kaam sar’anjaam day saken. 31israaeeliyon ko kah day ki yah tel hamesha tak meray liyay makhsoos-o-muqaddas hai. 32is liyay isay apnay liyay istemaal na karna aur na is tarkeeb say apnay liyay tel banaana. yah tel makhsoos-o-muqaddas hai aur tumhen bhee isay yoon thaheraana hai. 33jo is tarkeeb say aam istemaal kay liyay tel banaata hai ya kisee aam shakhs par lagaata hai usay us kee qaum men say mita daalna hai.”
bakhoor kee qurbaanee
34rabb nay moosa say kaha, “bakhoor is tarkeeb say banaana hai : mastkee, onikaa [a] onayachahay (unaguis odortus) , bireeja aur khaalis lubaan baraabar kay hisson men 35mila kar khushboodaar bakhoor banaana. itrasaaz ka yah kaam namkeen, khaalis aur muqaddas ho. 36is men say kuchh pees kar paaudar banaana aur mulaaqaat kay khaimay men ahd kay sandooq kay saamnay daalna jahaan main tujh say mila karoonga.
is bakhoor ko muqaddastareen thaheraana. 37isee tarkeeb kay mutaabiq apnay liyay bakhoor na banaana. isay rabb kay liyay makhsoos-o-muqaddas thaheraana hai. 38jo bhee apnay zaatee istemaal kay liyay is qism ka bakhoor banaaay usay us kee qaum men say mita daalna hai.”