Ḵẖurooj 3

jaltee huee jhaadee

¹moosa apnay susar yitro kee bhed-bakriyon kee nigahbaanee karta tha (midiyaan ka imaam raooel yitro bhee kahelaata tha). ek din moosa revad ko registaan kee parlee jaanib lay gaya aur chaltay chaltay allaah kay pahaad horib yaanee seena tak pahunch gaya. ²vahaan rabb ka farishta aag kay sholay men us par zaahir hua. yah shola ek jhaadee men bhadak raha tha. moosa nay dekha ki jhaadee jal rahee hai lekin bhasm naheen ho rahee. ³moosa nay socha, “yah to ajeeb baat hai. kya vajah hai ki jaltee huee jhaadee bhasm naheen ho rahee? main zara vahaan ja kar yah hairat’angez manzar dekhoon.”

⁴jab rabb nay dekha ki moosa jhaadee ko dekhnay a raha hai to us nay usay jhaadee men say pukaara, “moosa, moosa!” moosa nay kaha, “jee, main haazir hoon.” ⁵rabb nay kaha, “is say ziyaada qareeb na aana. apnee jootiyaan utaar, kyoonki too muqaddas zameen par khada hai. ⁶main teray baap ka khuda, ibraaheem ka khuda, ishaaq ka khuda aur yaaqoob ka khuda hoon.” yah sun kar moosa nay apna munh dhaank liya, kyoonki vah allaah ko dekhnay say dara.

⁷rabb nay kaha, “main nay misr men apnee qaum kee buree haalat dekhee aur ghulaamee men un kee cheekhen sunee hain, aur main un kay dukhon ko khoob jaanta hoon. ⁸ab main unhen misriyon kay qaaboo say bachaanay kay liyay utar aaya hoon. main unhen misr say nikaal kar ek achchhay vasee mulk men lay jaaoonga, ek aisay mulk men jahaan doodh aur shahed kee kasrat hai, go is vaqt kan’aanee, hittee, amoree, farizzee, hivvee aur yaboosee us men rahetay hain. ⁹israaeeliyon kee cheekhen mujh tak pahunchee hain. main nay dekha hai ki misree un par kis tarah ka zulm dha rahay hain. ¹⁰chunaanchay ab ja. main tujhay firaaun kay paas bhejta hoon, kyoonki tujhay meree qaum israaeel ko misr say nikaal kar laana hai.”

¹¹lekin moosa nay allaah say kaha, “main kaun hoon ki firaaun kay paas ja kar israaeeliyon ko misr say nikaal laaoon?” ¹²allaah nay kaha, “main to teray saath hoonga. aur is ka saboot ki main tujhay bhej raha hoon yah hoga ki logon kay misr say nikalnay kay baad tum yahaan a kar is pahaad par meree ibaadat karogay.”

¹³lekin moosa nay etiraaz kiya, “agar main israaeeliyon kay paas ja kar unhen bataaoon ki tumhaaray baapdaada kay khuda nay mujhay tumhaaray paas bheja hai to vah poochhengay, ‘us ka naam kya hai?’ phir main un ko kya javaab doon?”

¹⁴allaah nay kaha, “main jo hoon so main hoon. un say kahena, ‘main hoon nay mujhay tumhaaray paas bheja hai. ¹⁵rabb jo tumhaaray baapdaada ka khuda, ibraaheem ka khuda, ishaaq ka khuda aur yaaqoob ka khuda hai usee nay mujhay tumhaaray paas bheja hai.’ yah abad tak mera naam rahega. log yahee naam lay kar mujhay nasal-dar-nasal yaad karengay.

¹⁶ab ja aur israaeel kay buzurgon ko jama karkay un ko bata day ki rabb tumhaaray baapdaada ibraaheem, ishaaq aur yaaqoob ka khuda mujh par zaahir hua hai. vah farmaata hai, ‘main nay khoob dekh liya hai ki misr men tumhaaray saath kya sulook ho raha hai. ¹⁷is liyay main nay faisla kiya hai ki tumhen misr kee museebat say nikaal kar kan’aaniyon, hittiyon, amoriyon, farizziyon, hivviyon aur yaboosiyon kay mulk men lay jaaoon, aisay mulk men jahaan doodh aur shahed kee kasrat hai.’ ¹⁸buzurg teree sunengay. phir un kay saath misr kay baadshaah kay paas ja kar us say kahena, ‘rabb ibraaniyon ka khuda ham par zaahir hua hai. is liyay hamen ijaazat den ki ham teen din ka safar karkay registaan men rabb apnay khuda kay liyay qurbaaniyaan chadhaaen.’

¹⁹lekin mujhay maaloom hai ki misr ka baadshaah sirf is soorat men tumhen jaanay dega ki koee zabardastee tumhen lay jaaay. ²⁰is liyay main apnee qudrat zaahir karkay apnay mojizon kee maarifat misriyon ko maaroonga. phir vah tumhen jaanay dega. ²¹us vaqt main misriyon kay dilon ko tumhaaray liyay narm kar doonga. tumhen khaalee haath naheen jaana padega. ²²tamaam ibraanee aurten apnee misree padosanon aur apnay ghar men rahenay vaalee misree aurton say chaandee aur sonay kay zevraat aur nafees kapday maang kar apnay bachchon ko pahenaaengee. yoon misriyon ko loot liya jaaega.”